ਸ਼ਾਹਬਾਜ਼ ਸ਼ਰੀਫ਼ ਨੇ ਤੁਰਕੀ ਲਈ ਪਾਕਿ ਦੇ ਅਟੁੱਟ ਸਮਰਥਨ ਨੂੰ ਦੁਹਰਾਇਆ

ਅੰਮ੍ਰਿਤਸਰ, 5 ਜੁਲਾਈ (ਸੁਰਿੰਦਰ ਕੋਛੜ)-ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਸ਼ਾਹਬਾਜ਼ ਸ਼ਰੀਫ਼ ਨੇ ਤੁਰਕੀ ਲਈ ਆਪਣੇ ਦੇਸ਼ ਦੇ ਅਟੁੱਟ ਸਮਰਥਨ ਨੂੰ ਦੁਹਰਾਇਆ ਹੈ। ਉਨ੍ਹਾਂ ਨੇ ਕਿਹਾ ਕਿ ਤੁਰਕੀ ਦੀ ਸਫ਼ਲਤਾ ਪਾਕਿ ਦੀ ਸਫ਼ਲਤਾ ਹੈ ਅਤੇ ਪਾਕਿ ਦੀ ਤਰੱਕੀ ਤੁਰਕੀ ਦੀ ਤਰੱਕੀ ਹੈ। ਇਸਤਾਂਬੁਲ ‘ਚ ਇਕ ਸਾਂਝੀ ਪ੍ਰੈੱਸ ਕਾਨਫ਼ਰੰਸ ਨੂੰ ਸੰਬੋਧਨ ਕਰਦੇ ਹੋਏ ਸ਼ਰੀਫ਼ ਨੇ ਤੁਰਕੀ ਦੇ ਰਾਸ਼ਟਰਪਤੀ ਰੇਸੇਪ ਤੈਯਪ ਏਰਦੋਗਨ ਨੂੰ ਦੁਵੱਲੀ ਭਾਈਵਾਲੀ ਨੂੰ ਹੋਰ ਮਜ਼ਬੂਤ ਕਰਨ ਦਾ ਭਰੋਸਾ ਦਿੱਤਾ। ਇਸ ਦੌਰਾਨ ਰਾਸ਼ਟਰਪਤੀ ਏਰਦੋਗਨ ਨੇ ਦੋਵਾਂ ਦੇਸ਼ਾਂ ਵਿਚਕਾਰ ਰੱਖਿਆ ਸਹਿਯੋਗ ਨੂੰ ਆਰਥਿਕ ਸੰਬੰਧਾਂ ਦਾ ਅਧਾਰ ਦੱਸਿਆ। ਪਾਕਿ ਅਤੇ ਤੁਰਕੀ ਨੇ ਆਪਣੇ ਆਰਥਿਕ ਸੰਬੰਧਾਂ ਨੂੰ ਵਧਾਉਣ ਅਤੇ ਦੁਵੱਲੇ ਵਪਾਰ ਨੂੰ 5 ਅਰਬ ਡਾਲਰ ਤੱਕ ਵਧਾਉਣ ਦਾ ਵਾਅਦਾ ਕੀਤਾ ਹੈ। ਸਿੱਧੇ ਸ਼ਬਦਾਂ ‘ਚ ਪਾਕਿ ਅਤੇ ਤੁਰਕੀ ਵਿਚਕਾਰ ਇਹ ਦੋਸਤੀ ਭਾਰਤ ਲਈ ਇਕ ਨਵੀਂ ਸਿਰਦਰਦੀ ਹੈ, ਕਿਉਂਕਿ ਤੁਰਕੀ ਕੋਲ ਖ਼ਤਰਨਾਕ ਫ਼ੌਜੀ ਡਰੋਨ ਅਤੇ ਮਿਜ਼ਾਈਲ ਤਕਨਾਲੋਜੀ ਹੈ, ਜੋ ਉਹ ਪਾਕਿ ਨੂੰ ਪ੍ਰਦਾਨ ਕਰ ਰਿਹਾ ਹੈ। ਇਸ ਤੋਂ ਇਲਾਵਾ ਰਾਸ਼ਟਰਪਤੀ ਏਰਦੋਗਨ ਨੇ ਕਸ਼ਮੀਰ ਮੁੱਦੇ ‘ਤੇ ਵੀ ਲਗਾਤਾਰ ਪਾਕਿ ਦਾ ਸਮਰਥਨ ਕੀਤਾ ਹੈ।