ਬੀਜਿੰਗ, 8 ਮਈ (ਪੀ.ਟੀ.ਆਈ)-ਚੀਨ ਨੇ ਪਹਿਲੀ ਵਾਰ ਇਸ ਗੱਲ ਦੀ ਪੁਸ਼ਟੀ ਕੀਤੀ ਹੈ ਕਿ ਉਸ ਨੇ ਪਿਛਲੇ ਸਾਲ ਭਾਰਤ ਖ਼ਿਲਾਫ਼ ਜੰਗ 'ਚ ਪਾਕਿਸਤਾਨ ਦੀ ਮਦਦ ਕੀਤੀ ਸੀ | ਇਸ ਜੰਗ ਦੇ ਇਕ ਸਾਲ ਬਾਅਦ ਪਹਿਲੀ ਵਾਰ ਚੀਨ ਨੇ ਪਾਕਿਸਤਾਨ ਨੂੰ ਤਕਨੀਕੀ ਮਦਦ ਦੇਣ ਦੀ ਗੱਲ ਸਵੀਕਾਰ ਕੀਤੀ ਹੈ | ਚੀਨੀ ਸਰਕਾਰੀ ਮੀਡੀਆ ਰਿਪੋਰਟਾਂ 'ਚ ਇਹ ਜਾਣਕਾਰੀ ਦਿੱਤੀ ਗਈ ਹੈ | ਚੀਨ ਦੇ ਸਰਕਾਰੀ ਸੀ.ਸੀ.ਟੀ.ਵੀ. ਨੇ ਝਾਂਗ ਹੇਂਗ ਦੀ ਇਕ ਇੰਟਰਵਿਊ ਪ੍ਰਸਾਰਿਤ ਕੀਤੀ ਹੈ | ਝਾਂਗ ਨੇ ਇੰਟਰਵਿਊ 'ਚ ਕਿਹਾ ਕਿ ਉਨ੍ਹਾਂ ਦੇ ਦੇਸ਼ ਨੇ ਜੰਗ ਦੌਰਾਨ ਪਾਕਿਸਤਾਨ ਨੂੰ ਜੇ-10ਸੀਈ ਜਹਾਜ਼ ਲਈ ਤਕਨੀਕੀ ਸਹਾਇਤਾ ਦਿੱਤੀ ਸੀ | ਝਾਂਗ ਏਵੀਏਸ਼ਨ ਇੰਡਸਟਰੀ ਕਾਰਪੋਰੇਸ਼ਨ ਆਫ਼ ਚਾਈਨਾ (ਏ.ਵੀ.ਆਈ.ਸੀ.) ਦੇ ਚੇਂਗਦੂ ਏਅਰਕ੍ਰਾਫਟ ਡਿਜ਼ਾਈਨ ਐਂਡ ਰਿਸਰਚ ਇੰਸਟੀਚਿਊਟ 'ਚ ਇੰਜੀਨੀਅਰ ਹੈ | ਇਹ ਸੰਸਥਾ ਚੀਨ 'ਚ ਲੜਾਕੂ ਜਹਾਜ਼ਾਂ ਅਤੇ ਮਨੁੱਖ ਰਹਿਤ ਹਵਾਈ ਵਾਹਨਾਂ (ਯੂ.ਏ.ਵੀ.) ਦੀ ਮੁੱਖ ਵਿਕਾਸਕਾਰ ਸੰਸਥਾ ਹੈ | ਪਾਕਿਸਤਾਨ ਦੀ ਹਵਾਈ ਫ਼ੌਜ ਚੀਨ 'ਚ ਤਿਆਰ ਕੀਤੇ ਜੇ-10ਸੀਈ ਜੈੱਟ ਜਹਾਜ਼ਾਂ ਦਾ ਬੇੜਾ ਸੰਚਾਲਿਤ ਕਰਦੀ ਹੈ, ਜਿਨ੍ਹਾਂ ਨੂੰ ਏ.ਵੀ.ਆਈ.ਸੀ. ਦੀ ਇਕ ਸਹਾਇਕ ਕੰਪਨੀ ਨੇ ਤਿਆਰ ਕੀਤਾ ਹੈ | ਭਾਰਤ ਨਾਲ ਜੰਗ ਦੌਰਾਨ ਇਸਦੇ ਜੈੱਟ ਮੈਦਾਨ 'ਚ ਸਨ ਅਤੇ ਪਾਕਿ ਹਵਾਈ ਫ਼ੌਜ ਚੀਨ ਦੀ ਮਦਦ ਨਾਲ ਭਾਰਤੀ ਲੜਾਕੂ ਜਹਾਜ਼ਾਂ ਦਾ ਸਾਹਮਣਾ ਕਰ ਰਹੀ ਸੀ | ਪਾਕਿ ਨੂੰ ਚੀਨ ਦੀ ਮਦਦ ਸੰਬੰਧੀ ਕਈ ਰਿਪੋਰਟਾਂ ਸਾਹਮਣੇ ਆਈਆਂ ਹਨ ਪਰ ਚੀਨ ਵਲੋਂ ਪਹਿਲੀ ਵਾਰ ਇਸ ਸੰਬੰਧੀ ਅਧਿਕਾਰਤ ਪੁਸ਼ਟੀ ਸਾਹਮਣੇ ਆਈ ਹੈ |
