ਪਟਿਆਲਾ, 28 ਜੁਲਾਈ (ਅ. ਸ. ਆਹਲੂਵਾਲੀਆ)-ਭੁਪਿੰਦਰਾ ਰੋਡ ਪਾਰਕ ਮੈਂਬਰਾਂ ਵਲੋਂ ਨਾਭਾ ਰੋਡ ਸਥਿਤ ਭਾਖੜਾ ਕੈਨਾਲ ਪੁਲ ‘ਤੇ ਲੱਗੇ ਪੁਰਾਣੇ ਜਨਤਕ ਹੈਂਡ ਪੰਪ ਦੀ ਸਫ਼ਾਈ, ਮੁਰੰਮਤ ਤੇ ਮੁੜ ਬਹਾਲੀ ਕੀਤੀ ਗਈ। ਇਹ ਹੈਂਡ ਪੰਪ ਕਈ ਦਹਾਕਿਆਂ ਤੋਂ ਸੈਂਕੜਿਆਂ ਰਾਹਗੀਰਾਂ, ਸਾਈਕਲ ਸਵਾਰਾਂ, ਮਜ਼ਦੂਰਾਂ ਤੇ ਇਲਾਕਾ ਨਿਵਾਸੀਆਂ ਲਈ ਪੀਣ ਵਾਲੇ ਤਾਜ਼ੇ ਪਾਣੀ ਦਾ ਮਹੱਤਵਪੂਰਨ ਸਰੋਤ ਰਿਹਾ ਹੈ। ਸਮੇਂ ਦੇ ਨਾਲ ਇਹ ਖਸਤਾ ਹਾਲ ਹੋ ਗਿਆ ਸੀ। ਇਸ ਦੀ ਮਹੱਤਤਾ ਨੂੰ ਸਮਝਦਿਆਂ ਭੁਪਿੰਦਰਾ ਰੋਡ ਪਾਰਕ ਦੇ ਮੈਂਬਰਾਂ ਨੇ ਆਪਣੇ ਸਹਿਯੋਗ ਨਾਲ ਇਸ ਨੂੰ ਮੁੜ ਚਾਲੂ ਕਰਵਾਇਆ। ਇਸ ਮੌਕੇ ਮੈਂਬਰਾਂ ਨੇ ਕਿਹਾ ਕਿ ਜਨਤਕ ਸੰਪਤੀ ਦੀ ਸੰਭਾਲ ਕਰਨਾ ਹਰ ਨਾਗਰਿਕ ਦਾ ਫ਼ਰਜ਼ ਹੈ ਤੇ ਅਜਿਹੇ ਛੋਟੇ-ਛੋਟੇ ਉਪਰਾਲੇ ਸਮਾਜ ਵਿਚ ਵੱਡਾ ਬਦਲਾਅ ਲਿਆ ਸਕਦੇ ਹਨ। ਉਨ੍ਹਾਂ ਨੇ ਸ਼ਹਿਰ ਵਾਸੀਆਂ ਨੂੰ ਵੀ ਅਪੀਲ ਕੀਤੀ ਕਿ ਉਹ ਜਨਤਕ ਸੰਪਤੀ ਦੀ ਰੱਖਿਆ ਅਤੇ ਸਾਂਭ-ਸੰਭਾਲ ਵਿਚ ਆਪਣਾ ਯੋਗਦਾਨ ਪਾਉਣ। ਇਸ ਸੇਵਾ ਕਾਰਜ ਦੌਰਾਨ ਬਿੱਕਰ ਸਿੰਘ ਸੋਢੀ ਸੇਵਾਮੁਕਤ ਪੁਲਿਸ ਇੰਸਪੈਕਟਰ, ਰਾਕੇਸ਼ ਸ਼ਰਮਾ, ਤਰੁਣ ਜੋਸ਼ੀ, ਅਰਵਿੰਦਰ ਸਿੰਘ ਦਿਓਲ, ਗੁਰਨਾਮ ਸਿੰਘ, ਨਿਖਿਲ ਸ਼ਰਮਾ, ਸੁਖਵਿੰਦਰ ਸਿੰਘ, ਗੁਰਮੇਲ ਸਿੰਘ, ਸੋਨੂ ਚਾਵਲਾ, ਦੇਵਾਂਸ਼ ਚਾਵਲਾ, ਪਰਮਜੀਤ ਸਿੰਘ, ਰਾਹੁਲ ਅਤੇ ਮੇਜਰ ਸਿੰਘ ਵੀ ਹਾਜ਼ਰ ਸਨ।
