ਪਟਿਆਲਾ, 15 ਜੂਨ (ਅ. ਸ. ਆਹਲੂਵਾਲੀਆ)-ਨਗਰ ਨਿਗਮ ਵਿਖੇ ਫਾਇਨਾਂਸ ਕੰਟਰੈਕਟ ਕਮੇਟੀ (ਐੱਫ. ਐਂਡ ਸੀ.ਸੀ.) ਦੀ ਬੈਠਕ ਮੇਅਰ ਕੁੰਦਨ ਗੋਗੀਆ ਦੀ ਪ੍ਰਧਾਨਗੀ ਹੇਠ ਹੋਈ | ਜਿਸ 'ਚ ਨਗਰ ਨਿਗਮ ਦੇ 60 ਵਾਰਡਾਂ ਅੰਦਰ ਪੈਂਦੀਆਂ ਛੋਟੀਆਂ ਡਰੇਨਾਂ ਦੇ ਨਾਲ-ਨਾਲ ਪਟਿਆਲਾ ਦੇ ਐੱਨ. ਵਿਚਾਲੇ ਨਿਕਲਦੀ ਜੈਕਬ ਡਰੇਨ ਦੀ ਸਫ਼ਾਈ ਲਈ ਲੋੜੀਂਦੀ ਰਕਮ ਅਤੇ ਠੇਕਾ ਦੇ ਦਿੱਤਾ ਗਿਆ | ਇਸ ਪਿਛੇ ਆਉਂਦੇ ਬਰਸਾਤੀ ਸੀਜ਼ਨ ਵਿਚ ਪਾਣੀ ਦੇ ਬਹਾਅ ਨੂੰ ਕਿਸੇ ਕਿਸਮ ਦੀ ਡਾਫ ਨਾ ਲੱਗਣਾ ਦਸਿਆ ਗਿਆ | ਕਈ ਵਾਰਡਾਂ 'ਚ ਲੱਖਾਂ ਰੁਪਏ ਦੀਆਂ ਸਟਰੀਟ ਲਾਈਟਾਂ ਲਗਵਾਉਣ ਲਈ ਵੀ ਮਨਜ਼ੂਰੀ ਦਿਤੀ ਗਈ | ਆਊਟਸੋਰਸ ਤੋਂ ਮਾਲੀ, ਬੇਲਦਾਰ ਰੱਖਣ ਦੇ ਮਤੇ 'ਤੇ ਵੀ ਪ੍ਰਵਾਨਗੀ ਦੇ ਦਿੱਤੀ ਗਈ ਹੈ | ਪਟਿਆਲਾ ਦੀਆਂ ਕੁਝ ਥਾਵਾਂ 'ਤੇ ਜਨਤਕ ਪਖਾਨੇ ਬਣਾਉਣ ਲਈ ਵੀ ਮਨਜ਼ੂਰੀ ਦਿਤੀ ਗਈ | ਸ਼ਹਿਰ ਅੰਦਰ ਕਈ ਸੜਕਾਂ ਲੁੱਕ ਬਜਰੀ ਮਿਸ਼ਰਣ ਅਤੇ ਕੰਕਰੀਟ ਨਾਲ ਬਣਾਉਣ ਨੂੰ ਵੀ ਮਨਜ਼ੂਰੀ ਦਿਤੀ ਗਈ | ਦਰਜਨ ਤੋਂ ਵਧ ਪਾਰਕਾਂ ਦੇ ਰੱਖ ਰਖਾਅ ਲਈ ਵੀ ਆਏ ਮਤੇ 'ਤੇ ਸਹਿਮਤੀ ਪ੍ਰਗਟਾਈ ਗਈ | ਇਥੇ ਦਸਿਆ ਗਿਆ ਕਿ ਇਨ੍ਹਾਂ ਕਾਰਜਾਂ ਲਈ ਕਰੋੜਾਂ ਰੁਪਿਆ ਖਰਚਾ ਆਵੇਗਾ ਜਿਸ ਨੂੰ ਸੁਚੱਜੇ ਢੰਗ ਨਾਲ ਲਗਾਇਆ ਜਾਵੇ ਲਈ ਵੀ ਇਕ ਮੋਨੀਟਰਿੰਗ ਕਮੇਟੀ ਨਿਗਰਾਨੀ ਕਰੇਗੀ | ਮੇਅਰ ਗੋਗੀਆ ਮੁਤਾਬਿਕ ਲੋਕਾਂ ਵਲੋਂ ਕਈ ਤਰ੍ਹਾਂ ਦੇ ਟੈਕਸਾਂ ਨਾਲ ਦਿੱਤਾ ਜਾਂਦਾ ਪੈਸੇ ਦਾ ਸਦਉਪਯੋਗ ਹੀ ਉਨ੍ਹਾਂ ਦੀ ਪਹਿਲੀ ਪਹਿਲਕਦਮੀ ਹੈ | ਇਸ ਮੌਕੇ ਕਮਿਸ਼ਨਰ ਪਰਮਜੀਤ ਸਿੰਘ, ਡਿਪਟੀ ਮੇਅਰ ਜਗਦੀਪ ਸਿੰਘ ਜੱਗਾ, ਸਿਮਰਪ੍ਰੀਤ ਕੌਰ ਆਡੀਸ਼ਨਲ ਕਮਿਸ਼ਨਰ, ਮਨਰੀਤ ਰਾਣਾ ਜੁਆਇੰਟ ਕਮਿਸ਼ਨਰ, ਡੀਸੀਐਫਏ ਨੀਰਜ ਰਹੇਜਾ, ਐੱਸ. ਈ. ਜੇ. ਪੀ. ਸਿੰਘ ਆਦਿ ਹਾਜ਼ਰ ਸਨ |
