ਸਰਕਾਰੀ ਹਸਪਤਾਲ ਦੁੱਧਨਸਾਧਾਂ ਖੁਦ 'ਬਿਮਾਰ', ਸਹੂਲਤਾਂ ਦੀ ਘਾਟ ਕਾਰਨ ਲੋਕ ਖ਼ੁਆਰ
ਅਜੀਤ ਡੈਸਕ
05-04-2026
ਹਸਪਤਾਲ ਦੀ ਇਮਾਰਤ ਦੀ ਸਫ਼ਾਈ ਲਈ ਸਿਰਫ਼ ਦੋ ਆਊਟਸੋਰਸ ਸਫ਼ਾਈ ਸੇਵਕ ਤਾਇਨਾਤ ਹਨ | ਨਿਯਮਾਂ ਮੁਤਾਬਕ ਹਸਪਤਾਲ ਵਿਚ ਦਿਨ ਵਿਚ ਘੱਟੋ-ਘੱਟ ਤਿੰਨ ਵਾਰ ਸਫ਼ਾਈ ਹੋਣੀ ਲਾਜ਼ਮੀ ਹੈ, ਪਰ ਸਟਾਫ਼ ਦੀ ਕਮੀ ਕਾਰਨ ਸਫ਼ਾਈ ਪੱਖੋਂ ਹਾਲਤ ਪਤਲੀ ਹੈ | ਇਸ ਤੋਂ ਵੀ ਵੱਡੀ ਮੁਸੀਬਤ ਹਸਪਤਾਲ ਦੇ ਬਿਲਕੁਲ ਸਾਹਮਣੇ ਲੰਘਦਾ 'ਗੰਦਾ ਨਾਲਾ' ਹੈ | ਇਹ ਨਾਲਾ ਬਿਮਾਰੀਆਂ ਦਾ ਕੇਂਦਰ ਬਣਿਆ ਹੋਇਆ ਹੈ | ਹੈਰਾਨੀ ਦੀ ਗੱਲ ਹੈ ਕਿ ਸਿਹਤ ਸਹੂਲਤਾਂ ਦੇਣ ਵਾਲੇ ਹਸਪਤਾਲ ਦੇ ਮੂਹਰੇ ਹੀ ਬਿਮਾਰੀਆਂ ਦਾ ਢੇਰ ਹੈ |
ਸਥਾਨਕ ਲੋਕਾਂ ਅਨੁਸਾਰ ਹਲਕਾ ਵਿਧਾਇਕ ਨੇ ਇਸ ਨਾਲੇ ਨੂੰ ਭਰਵਾਉਣ ਦਾ ਭਰੋਸਾ ਦਿੱਤਾ ਸੀ, ਪਰ 'ਪਰਨਾਲਾ ਉੱਥੇ ਦਾ ਉੱਥੇ ਹੀ' ਹੈ | ਇੱਕ ਦਿਲਚਸਪ ਅਤੇ ਦੁਖਦਾਈ ਕਿੱਸਾ ਇਹ ਹੈ ਕਿ ਬੀਤੇ ਦਿਨੀਂ ਜਦੋਂ ਮੁੱਖ ਮੰਤਰੀ ਪੰਜਾਬ ਨੇ ਦੇਵੀਗੜ੍ਹ ਇਲਾਕੇ ਦਾ ਦੌਰਾ ਕਰਨਾ ਸੀ, ਤਾਂ ਪ੍ਰਸ਼ਾਸਨ ਨੇ ਇਸ ਗੰਦੇ ਨਾਲੇ ਨੂੰ ਲੁਕਾਉਣ ਲਈ ਟੈਂਟ ਲਗਾ ਕੇ ਢਕ ਦਿੱਤਾ ਸੀ | ਲੋਕਾਂ ਦਾ ਕਹਿਣਾ ਹੈ ਕਿ ਜੇਕਰ ਸਰਕਾਰ ਗੰਦਗੀ ਨੂੰ ਢਕਣ ਦੀ ਬਜਾਏ ਹਸਪਤਾਲ ਦੀਆਂ ਸਹੂਲਤਾਂ ਸੁਧਾਰਨ 'ਤੇ ਜ਼ੋਰ ਦਿੰਦੀ ਤਾਂ ਸ਼ਾਇਦ ਅੱਜ ਲੋਕਾਂ ਨੂੰ ਸੁਖ ਦਾ ਸਾਹ ਆਉਂਦਾ | ਇਲਾਕੇ ਦੇ ਮੋਹਤਬਰਾਂ ਅਤੇ ਆਮ ਲੋਕਾਂ ਨੇ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਅਤੇ ਸਿਹਤ ਮੰਤਰੀ ਤੋਂ ਮੰਗ ਕੀਤੀ ਹੈ ਕਿ ਇਸ ਪਛੜੇ ਇਲਾਕੇ ਦੇ ਇਕੋ-ਇਕ ਹਸਪਤਾਲ ਵਿਚ ਤੁਰੰਤ ਸਪੈਸ਼ਲਿਸਟ ਡਾਕਟਰ, ਖਾਸ ਕਰਕੇ ਇਸਤਰੀ ਰੋਗਾਂ ਦੇ ਮਾਹਿਰ ਤਾਇਨਾਤ ਕੀਤੇ ਜਾਣ | ਇਸ ਦੇ ਨਾਲ ਹੀ ਅਲਟਰਾਸਾਊਾਡ ਸਹੂਲਤ ਸ਼ੁਰੂ ਕਰਨ ਅਤੇ ਗੰਦੇ ਨਾਲੇ ਦਾ ਪੱਕਾ ਹੱਲ ਕਰਨ ਦੀ ਅਪੀਲ ਕੀਤੀ ਗਈ ਹੈ ਤਾਂ ਜੋ ਲੋਕਾਂ ਨੂੰ ਸਰਕਾਰੀ ਸਿਹਤ ਸਹੂਲਤਾਂ ਦਾ ਅਸਲ ਲਾਭ ਮਿਲ ਸਕੇ |
