ਸ੍ਰੀ ਅਨੰਦਪੁਰ ਸਾਹਿਬ, 25 ਜੂਨ (ਜੇ ਐਸ ਨਿੱਕੂਵਾਲ)-ਗਰਮੀਆਂ ਦੀਆਂ ਛੁੱਟੀਆਂ ਨੂੰ ਲੈ ਕੇ ਗੁਰੂ ਨਗਰੀ ਸ੍ਰੀ ਅਨੰਦਪੁਰ ਸਾਹਿਬ ਦੇ ਸਾਰੇ ਬਾਜ਼ਾਰ ਪਹਿਲੇ ਦਿਨ ਮੁਕੰਮਲ ਤੌਰ ‘ਤੇ ਬੰਦ ਰਹੇ। ਜਿਸ ਕਾਰਨ ਬਾਜ਼ਾਰਾਂ ਵਿਚ ਸੁੰਨਸਾਨ ਤੇ ਸਨਾਟਾ ਛਾਇਆ ਹੋਇਆ ਸੀ ਅਤੇ ਕਰਫ਼ਿਊ ਵਰਗੀ ਸਥਿਤੀ ਬਣੀ ਹੋਈ ਸੀ। ਇਸ ਸਬੰਧੀ ਵਪਾਰ ਮੰਡਲ ਦੇ ਪ੍ਰਧਾਨ ਇੰਦਰਜੀਤ ਸਿੰਘ ਅਰੋੜਾ ਨੇ ਕਿਹਾ ਕਿ ਪ੍ਰਧਾਨ ਪ੍ਰਿਤਪਾਲ ਸਿੰਘ ਗੰਡਾ, ਵਪਾਰ ਵਿੰਗ ਦੇ ਪ੍ਰਧਾਨ ਦੀਪਕ ਆਗਰਾ ਅਤੇ ਰੇਹੜੀ ਫੜ੍ਹੀ ਯੂਨੀਅਨ ਦੇ ਪ੍ਰਧਾਨ ਸੁਨੀਲ ਅਡਵਾਲ ਵਲੋਂ ਸਾਂਝੇ ਤੌਰ ਸਹਿਮਤੀ ਜਿਤਾਉਂਦੇ ਹੋਏ ਸ਼ਹਿਰ ਦੇ ਸਾਰੇ ਬਾਜ਼ਾਰਾਂ ਨੂੰ ਚਾਰ ਦਿਨ ਲਈ ਬੰਦ ਰੱਖਣ ਦਾ ਫ਼ੈਸਲਾ ਕੀਤਾ ਸੀ। ਉਨ੍ਹਾਂ ਦੱਸਿਆ ਕਿ ਮੁੱਖ ਬਾਜ਼ਾਰ, ਪੁੱਡਾ ਮਾਰਕੀਟ, ਅਟਾਰੀ ਬਾਜ਼ਾਰ, ਨਵੀਂ ਅਬਾਦੀ ਬਜਾਰ, ਕਲਗ਼ੀਧਰ ਮਾਰਕੀਟ, ਚੋਈ ਬਜ਼ਾਰ, ਗੁਰੂ ਬਜ਼ਾਰ ਸਮੇਤ ਖੋਖਾ ਮਾਰਕੀਟ ਵੀ ਪਹਿਲੇ ਦਿਨ ਮੁਕੰਮਲ ਬੰਦ ਰਹੇ। ਜਿਸ ਲਈ ਉਹ ਸਮੂਹ ਵਪਾਰੀ ਵਰਗ ਦਾ ਸਹਿਯੋਗ ਲਈ ਤਹਿ ਦਿਲੋਂ ਧੰਨਵਾਦ ਕਰਦੇ ਹਨ। ਇਸ ਮੌਕੇ ਵਪਾਰ ਮੰਡਲ ਦੇ ਜਨਰਲ ਸਕੱਤਰ ਜਸਪਾਲ ਸਿੰਘ ਗੁੰਬਰ ਸਮੇਤ ਵਪਾਰੀ ਆਗੂ ਹਾਜ਼ਰ ਸਨ।
