ਮੁਹਾਲੀ ਅਟੈਚੀ ਮਰਡਰ ਕੇਸ ਸਿਆਸੀ ਪਿਛੋਕੜ ਵਾਲੀ ਸੀਰਤ ਕੌਰ ਨੂੰ ਪਤੀ ਏਕਮ ਸਿੰਘ ਢਿੱਲੋਂ ਦੀ ਹੱਤਿਆ ਦੇ ਮਾਮਲੇ ’ਚ ਸੁਣਾਈ ਉਮਰ ਕੈਦ ਦੀ ਸਜ਼ਾ
ਅਜੀਤ ਡੈਸਕ
04-07-2026
ਸੀ. ਸੀ. ਟੀ. ਵੀ. ਤੇ ਵਿਗਿਆਨਕ ਸਬੂਤ ਬਣੇ ਅਹਿਮ ਕੜੀ : ਮੁਕੱਦਮੇ ਦੌਰਾਨ ਪੇਸ਼ ਕੀਤੀ ਗਈ ਸੀ. ਸੀ. ਟੀ. ਵੀ. ਫੁਟੇਜ਼ ਵਿਚ ਸੀਰਤ ਕੌਰ ਨੂੰ ਘਰ ਦੀ ਪਹਿਲੀ ਮੰਜ਼ਿਲ ਤੋਂ ਉਹੀ ਵੱਡੀ ਅਟੈਚੀ ਘਸੀਟਦੇ ਹੋਏ ਹੇਠਾਂ ਲਿਆਉਂਦੇ, ਉਸ ਨੂੰ ਧੱਕਾ ਦੇ ਕੇ ਪੌੜੀਆਂ ਤੋਂ ਹੇਠਾਂ ਸੁੱਟਦੇ ਅਤੇ ਬਾਅਦ ਵਿਚ ਬੀ. ਐੱਮ. ਡਬਲਿਊ. ਕਾਰ ਤੱਕ ਲੈ ਜਾਂਦੇ ਹੋਏ ਦੇਖਿਆ ਗਿਆ ਸੀ। ਫੁਟੇਜ਼ ਵਿਚ ਉਸ ਨੂੰ ਪੌੜੀਆਂ ਸਾਫ਼ ਕਰਦੇ ਅਤੇ ਖ਼ੂਨ ਦੇ ਨਿਸ਼ਾਨ ਮਿਟਾਉਣ ਦੀ ਕੋਸ਼ਿਸ਼ ਕਰਦੇ ਹੋਏ ਵੀ ਦੇਖਿਆ ਗਿਆ ਸੀ। ਜਾਂਚ ਦੌਰਾਨ ਘਰ ‘ਚੋਂ 7.65 ਐਮ. ਐਮ. ਦੀ ਪਿਸਤੌਲ, ਜਿੰਦਾ ਕਾਰਤੂਸ, ਖਾਲੀ ਖੋਲ, ਫਾਇਰ ਕੀਤੀ ਗੋਲੀ, ਖ਼ੂਨ ਨਾਲ ਲਿਬੜੇ ਨਮੂਨੇ ਅਤੇ ਹੋਰ ਫੋਰੈਂਸਿਕ ਸਬੂਤ ਵੀ ਬਰਾਮਦ ਹੋਏ ਸਨ।
ਨਾਬਾਲਗ ਪੁੱਤਰ ਦੀ ਗਵਾਹੀ ਰਹੀ ਮਹੱਤਵਪੂਰਨ : ਇਸਤਗਾਸਾ ਪੱਖ ਵਲੋਂ ਪੇਸ਼ 36 ਗਵਾਹਾਂ ‘ਚੋਂ ਇਕ ਮ੍ਰਿਤਕ ਅਤੇ ਦੋਸ਼ੀ ਦੇ ਨਾਬਾਲਗ ਪੁੱਤਰ ਨੇ ਅਦਾਲਤ ਵਿਚ ਬਿਆਨ ਦਿੱਤਾ ਸੀ ਕਿ ਉਸ ਦੇ ਮਾਤਾ-ਪਿਤਾ ਵਿਚਕਾਰ ਨਿਮਰਤਦੀਪ ਸਿੰਘ ਨੂੰ ਲੈ ਕੇ ਝਗੜਾ ਹੁੰਦਾ ਰਹਿੰਦਾ ਸੀ। ਘਟਨਾ ਵਾਲੀ ਰਾਤ ਉਸ ਨੇ ਗੋਲੀ ਚੱਲਣ ਦੀ ਆਵਾਜ਼ ਅਤੇ ਕੁਝ ਲੋਕਾਂ ਦੀਆਂ ਆਵਾਜ਼ਾਂ ਸੁਣੀਆਂ ਸਨ। ਉਸ ਨੇ ਇਹ ਵੀ ਦੱਸਿਆ ਕਿ ਉਹ ਵੱਖਰੇ ਕਮਰੇ ‘ਚ ਸੀ ਅਤੇ ਕਮਰੇ ਦਾ ਦਰਵਾਜ਼ਾ ਬਾਹਰੋਂ ਬੰਦ ਸੀ।
ਅਦਾਲਤ ਦੀ ਟਿੱਪਣੀ : ਅਦਾਲਤ ਨੇ ਆਪਣੇ ਫ਼ੈਸਲੇ ਵਿਚ ਕਿਹਾ ਕਿ ਦੋਸ਼ੀ ਦਾ ਘਟਨਾ ਤੋਂ ਬਾਅਦ ਦਾ ਵਰਤਾਓ ਕੁਦਰਤੀ ਨਹੀਂ ਸੀ। ਉਹ ਆਪਣੇ ਹੱਕ ਵਿਚ ਕੋਈ ਭਰੋਸੇਯੋਗ ਸਪੱਸ਼ਟੀਕਰਨ ਨਹੀਂ ਦੇ ਸਕੀ। ਉਲਟ ਉਸ ਨੇ ਖ਼ੂਨ ਦੇ ਨਿਸ਼ਾਨ ਸਾਫ਼ ਕਰਨ, ਸਬੂਤ ਮਿਟਾਉਣ ਅਤੇ ਘਟਨਾ ਨੂੰ ਛਿਪਾਉਣ ਦੀ ਕੋਸ਼ਿਸ਼ ਕੀਤੀ ਸੀ। ਹਾਲਾਤੀ ਸਬੂਤਾਂ, ਸੀ. ਸੀ. ਟੀ. ਵੀ. ਫੁਟੇਜ਼, ਫੋਰੈਂਸਿਕ ਰਿਪੋਰਟਾਂ ਅਤੇ ਗਵਾਹਾਂ ਦੀਆਂ ਗਵਾਹੀਆਂ ਦੀ ਲਗਾਤਾਰ ਕੜੀ ਦੇ ਆਧਾਰ ‘ਤੇ ਅਦਾਲਤ ਨੇ ਸੀਰਤ ਕੌਰ ਨੂੰ ਕਤਲ, ਸਬੂਤ ਮਿਟਾਉਣ ਅਤੇ ਆਰਮਜ਼ ਐਕਟ ਦੇ ਦੋਸ਼ਾਂ ‘ਚ ਦੋਸ਼ੀ ਕਰਾਰ ਦਿੱਤਾ ਹੈ।
