ਜਲਾਲਾਬਾਦ,3ਅਕਤੂਬਰ(ਜਤਿੰਦਰ ਪਾਲ ਸਿੰਘ)- ਪੀ.ਓ. ਸਟਾਫ਼ ਨੇ ਸਾਲ 2020 ਤੋਂ ਚੋਰੀ ਅਤੇ ਨਜਾਇਜ਼ ਮਾਈਨਿੰਗ ਦੇ ਮਾਮਲਿਆਂ ’ਚ ਫ਼ਰਾਰ ਚੱਲ ਰਹੇ ਇਕ ਭਗੌੜੇ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕਰਨ ’ਚ ਕਾਮਯਾਬੀ ਹਾਸਲ ਕੀਤੀ ਹੈ। ਮਾਮਲੇ ਦੇ ਸਬੰਧ ‘ਚ ਜਾਣਕਾਰੀ ਦਿੰਦਿਆਂ ਪੀ.ਓ. ਸਟਾਫ਼ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਦੋਸ਼ੀ ਜਗਦੇਵ ਸਿੰਘ ਪੁੱਤਰ ਨਛੱਤਰ ਸਿੰਘ ਨਿਵਾਸੀ ਚੱਕ ਬੁੱਧੋ ਕੇ ਥਾਣਾ ਵੈਰੋਂ ਕੇ ਨੂੰ ਕਾਬੂ ਕੀਤਾ ਗਿਆ ਹੈ। ਮੁਲਜ਼ਮ ਜਗਦੇਵ ਸਿੰਘ ਖ਼ਿਲਾਫ਼ ਥਾਣਾ ਵੈਰੋਂ ਕੇ ‘ਚ ਸਾਲ 2020 ਦੌਰਾਨ ਅਪਰਾਧਿਕ ਮੁਕੱਦਮੇ ਦਰਜ ਕੀਤੇ ਗਏ ਸਨ। ਪਹਿਲਾ ਮਾਮਲਾ ਐੱਫ਼.ਆਈ.ਆਰ. ਨੰਬਰ 108 ਤਾਰੀਖ਼ 4 ਅਗਸਤ 2020 ਨੂੰ ਦਰਜ ਹੋਇਆ ਸੀ, ਜਿਸ ‘ਚ ਅਦਾਲਤ ਵਲ਼ੋਂ ਧਾਰਾ 299 ਸੀ.ਆਰ.ਪੀ.ਸੀ. ਤਹਿਤ ਕਾਰਵਾਈ ਕਰਦੇ ਹੋਏ ਮੁਲਜ਼ਮ ਨੂੰ 18 ਮਾਰਚ ਨੂੰ ਭਗੌੜਾ ਕਰਾਰ ਦਿੱਤਾ ਗਿਆ ਸੀ ਉੱਥੇ ਹੀ ਦੂਜਾ ਮਾਮਲਾ ਇਸੇ ਥਾਣੇ ’ਚ ਐੱਫ਼.ਆਈ.ਆਰ.ਨੰਬਰ 162 ਤਾਰੀਖ਼ 8 ਅਗਸਤ 2020 ਨੂੰ ਦਰਜ ਕੀਤਾ ਗਿਆ ਸੀ, ਜਿਸ ‘ਚ ਅਦਾਲਤ ਵਲ਼ੋਂ ਮੁਲਜ਼ਮ ਨੂੰ 28 ਮਾਰਚ 2026 ਨੂੰ ਭਗੌੜਾ ਕਰਾਰ ਦਿੱਤਾ ਗਿਆ ਸੀ। ਪੀ.ਓ.ਸਟਾਫ਼ ਦੀ ਟੀਮ ਨੇ ਗੁਪਤ ਸੂਚਨਾ ਅਤੇ ਠੋਸ ਕਾਰਵਾਈ ਦੇ ਆਧਾਰ ’ਤੇ 3 ਅਕਤੂਬਰ 2026 ਨੂੰ ਕਾਰਵਾਈ ਕਰਦੇ ਹੋਏ ਮੁਲਜ਼ਮ ਜਗਦੇਵ ਸਿੰਘ ਨੂੰ ਗ੍ਰਿਫ਼ਤਾਰ ਕਰ ਲਿਆ।
