ਮੰਡੀ ਅਰਨੀਵਾਲਾ,17 ਅਪ੍ਰੈਲ (ਨਿਸ਼ਾਨ ਸਿੰਘ ਮੋਹਲ਼ਾ)-ਮਾਲਵਾ ਖੇਤਰ ਦੀਆਂ ਨਹਿਰਾਂ ਵਿਚ ਵਿਸ਼ੈਲਾ ਪਾਣੀ ਆ ਰਿਹਾ ਹੈ | ਜਿਸ ਨੂੰ ਲੈ ਕੇ ਆਮ ਲੋਕ ਚਿੰਤਤ ਨੇ ਕਿਉਂਕਿ ਪਹਿਲਾਂ ਹੀ ਧਰਤੀ ਹੇਠਲਾ ਪਾਣੀ ਪੀਣ ਵਾਸਤੇ ਯੋਗ ਨਹੀਂ ਸਮਝਿਆ ਜਾਂਦਾ | ਮਾਲਵਾ ਖੇਤਰ ਦੇ ਇਸ ਹਿੱਸੇ ਦੇ ਲੋਕ ਧਰਤੀ ਹੇਠਲਾ ਜੋ ਪਾਣੀ ਪੀਂਦੇ ਹਨ ਉਸ ਵਿਚ ਭਾਰੀ ਤੱਤ ਪਾਏ ਜਾਂਦੇ ਹਨ | ਇਸ ਦਾ ਖ਼ੁਲਾਸਾ ਕਈ ਰਿਪੋਰਟਾਂ ਵਿਚ ਵੀ ਹੋ ਚੁੱਕਾ ਹੈ | ਮਾਲਵਾ ਖ਼ਿੱਤੇ ਦੀ ਵੱਡੀ ਆਬਾਦੀ ਨਹਿਰੀ ਪਾਣੀ ਤੇ ਵੀ ਨਿਰਭਰ ਹੈ | ਹਰ ਸਾਲ ਇਹਨਾਂ ਦਿਨਾਂ ਦੇ ਵਿਚ ਨਹਿਰਾਂ ਵਿਚ ਜੋ ਪਾਣੀ ਆਉਂਦਾ ਹੈ ਉਹ ਕੁਆਲਿਟੀ ਪੱਖੋਂ ਬੇਹੱਦ ਮਾੜਾ ਅਤੇ ਜ਼ਹਿਰੀਲਾ ਮੰਨਿਆ ਜਾਂਦਾ ਹੈ ਇਸ ਦਾ ਰੰਗ ਵੀ ਕਾਲਾ ਹੁੰਦਾ ਹੈ | ਕਈ ਪਿੰਡਾਂ ਦੇ ਜਲ ਘਰਾਂ ਵਿਚ ਇਸ ਨੂੰ ਸਟੋਰ ਕਰਕੇ ਅੱਗੇ ਪੀਣ ਲਈ ਵਰਤਿਆ ਜਾਂਦਾ ਹੈ | ਆਮ ਲੋਕਾਂ ਦੀ ਇਹ ਵੱਡੀ ਮਜਬੂਰੀ ਬਣ ਗਈ ਹੈ ਕਿ ਉਨ੍ਹਾਂ ਕੋਲ ਪੀਣ ਦੇ ਪਾਣੀ ਦਾ ਬਦਲ ਨਾ ਹੋਣ ਕਰਕੇ ਉਹ ਨਹਿਰੀ ਪਾਣੀ ਤੇ ਨਿਰਭਰ ਹਨ | ਧਰਤੀ ਹੇਠਲਾ ਪਾਣੀ ਵੀ ਮਾੜਾ ਹੋਣ ਅਤੇ ਨਹਿਰੀ ਪਾਣੀ ਵੀ ਮਾੜਾ ਹੋਣ ਕਰਕੇ ਲੋਕ ਗੰਦਾ ਪਾਣੀ ਪੀਣ ਲਈ ਮਜਬੂਰ ਹਨ | ਸਰਕਾਰ ਨੂੰ ਇਸ ਪਾਸੇ ਤੁਰੰਤ ਧਿਆਨ ਦੇਣ ਦੀ ਲੋੜ ਹੈ |
