ਘਰੋਟਾ, 22 ਮਈ (ਸੰਜੀਵ ਗੁਪਤਾ)-ਪੀ.ਐਮ. ਸ੍ਰੀ ਸਕੂਲ ਜਵਾਹਰ ਨਵੋਦਿਆ ਵਿਦਿਆਲਿਆ ਨਾਜੋਚੱਕ ਵਿਖੇ ਭਾਰਤ ਸਕਾਊਟਸ ਐਂਡ ਗਾਈਡਜ਼ ਦੇ ਰਾਜ ਪੁਰਸਕਾਰ ਲਈ 5 ਦਿਨਾਂ ਟ੍ਰੇਨਿੰਗ ਕੈਂਪ ਦਾ ਆਯੋਜਨ ਕੀਤਾ ਗਿਆ, ਜੋ 26 ਮਈ ਤੱਕ ਚੱਲੇਗਾ | ਇਸ ਟ੍ਰੇਨਿੰਗ ਕੈਂਪ ਦਾ ਸ਼ੁੱਭ ਆਰੰਭ ਸਕੂਲ 'ਚ ਕੀਤਾ ਗਿਆ | ਕੈਂਪ 'ਚ ਚੰਡੀਗੜ੍ਹ ਸੰਭਾਗ ਦੇ ਕਲੱਸਟਰ ਪੰਜਾਬ ਦੇ 11 ਸਕੂਲਾਂ ਤੋਂ 60 ਵਿਦਿਆਰਥਣਾਂ ਤੇ 64 ਵਿਦਿਆਰਥੀਆਂ ਨੇ ਭਾਗ ਲਿਆ | ਪ੍ਰੋਗਰਾਮ ਦੀ ਸ਼ੁਰੂਆਤ ਸਕੂਲ ਦੇ ਪਿ੍ੰਸੀਪਲ ਡਾ: ਸੰਦੀਪ ਕੁਮਾਰ ਵਲੋਂ ਸਕਾਊਟ ਤੇ ਗਾਈਡ ਝੰਡਾ ਲਹਿਰਾ ਕੇ ਕੀਤੀ ਗਈ | ਇਸ ਮੌਕੇ ਲੀਡਰ ਆਫ ਕੋਰਸ ਕੰਵਰ ਰਾਜ ਕੁਮਾਰ, ਉਪ ਪਿ੍ੰਸੀਪਲ ਰਵਿੰਦਰ ਕੁਮਾਰ, ਕਰਨਦੀਪ ਕੌਰ, ਵਿਪੁਲ ਤੇ ਵੱਖ-ਵੱਖ ਸਕੂਲਾਂ ਤੋਂ ਆਏ ਅਨੁਰੱਖਕ ਵੀ ਮੌਜੂਦ ਰਹੇ | ਪਿ੍ੰਸੀਪਲ ਡਾ: ਸੰਦੀਪ ਕੁਮਾਰ ਨੇ ਸਕਾਊਟਸ ਤੇ ਗਾਈਡਜ਼ ਦੀ ਹੌਂਸਲਾ ਅਫ਼ਜਾਈ ਕਰਦਿਆਂ ਵਿਦਿਆਰਥੀਆਂ ਨੂੰ ਜੀਵਨ ਨੂੰ ਸਰਲ ਤੇ ਸਹਿਜ ਢੰਗ ਨਾਲ ਜੀਊਣ ਦੀ ਪੇ੍ਰਰਨਾ ਦਿੱਤੀ | ਉਨ੍ਹਾਂ ਵਿਦਿਆਰਥੀਆਂ ਨੂੰ ਅਨੁਸ਼ਾਸਨ, ਸੇਵਾ ਭਾਵਨਾ ਤੇ ਸੰਸਕਾਰਾਂ ਭਰਿਆ ਜੀਵਨ ਅਪਣਾਉਣ ਲਈ ਪ੍ਰੇਰਿਤ ਕੀਤਾ | ਵਿਦਿਆਰਥੀਆਂ ਨੇ ਸਕਾਊਟਸ ਤਾਲੀਆਂ ਰਾਹੀਂ ਉਨ੍ਹਾਂ ਦੇ ਸੰਦੇਸ਼ ਦਾ ਸਵਾਗਤ ਕੀਤਾ |
