ਫ਼ਤਹਿਗੜ੍ਹ ਸਾਹਿਬ, 1 ਫਰਵਰੀ (ਮਨਪ੍ਰੀਤ ਸਿੰਘ)-ਗਰੀਨ ਫੀਲਡਜ਼ ਸਕੂਲ ਸਰਹਿੰਦ ਵਲੋਂ ਭਗਤ ਰਵਿਦਾਸ ਜੀ ਦੇ ਜਨਮ ਦਿਹਾੜੇ ਮੌਕੇ ਚੇਅਰਮੈਨ ਦੀਦਾਰ ਸਿੰਘ ਭੱਟੀ ਦੀ ਅਗਵਾਈ ਹੇਠ ਪਿ੍ੰਸੀਪਲ ਡਾ. ਸ਼ਾਲੂ ਰੰਧਾਵਾ ਦੁਆਰਾ ਬੱਚਿਆਂ ਤੇ ਸਟਾਫ਼ ਦੇ ਸਹਿਯੋਗ ਨਾਲ ਗੁਰਦੁਆਰਾ ਜੋਤੀ ਸਰੂਪ ਸਾਹਿਬ ਜੀ ਦੇ ਨੇੜੇ ਜ਼ਰੂਰਤਮੰਦਾਂ ਲਈ ਕੱਪੜਿਆਂ ਦਾ ਲੰਗਰ ਲਗਾਇਆ ਗਿਆ | ਇਨ੍ਹਾਂ ਕੱਪੜਿਆਂ ਵਿਚ ਗਰਮੀਆਂ ਤੇ ਸਰਦੀਆਂ ਦੇ ਕੱਪੜੇ, ਸਵੈਟਰ ਕੋਟੀਆਂ, ਕੋਟ, ਜੈਕਟਾਂ, ਟੋਪੀਆਂ, ਪਜਾਮੇ, ਬੂਟ, ਜੁਰਾਬਾਂ, ਬੱਚਿਆਂ ਦੇ ਖਿਡੌਣੇ ਆਦਿ ਸ਼ਾਮਿਲ ਸਨ | ਇਸ ਮੌਕੇ ਸਾਰੇ ਕੱਪੜੇ ਬਹੁਤ ਤਰਤੀਬ ਨਾਲ ਰੱਖੇ ਹੋਏ ਸਨ ਤਾਂ ਕਿ ਜ਼ਰੂਰਤਮੰਦ ਨੂੰ ਕੱਪੜੇ ਦੇਖਣ ਵਿਚ ਬਹੁਤ ਆਸਾਨੀ ਹੋ ਸਕੇ ਤੇ ਉਹ ਆਪਣੀ ਜ਼ਰੂਰਤ ਪੂਰੀ ਕਰ ਸਕਣ | ਇਸ ਮੌਕੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਪਿ੍ੰ: ਸ਼ਾਲੂ ਰੰਧਾਵਾ ਨੇ ਕਿਹਾ ਕਿ ਭਗਤ ਰਵਿਦਾਸ ਜੀ ਨੇ ਆਪਣਾ ਸਾਰਾ ਜੀਵਨ ਲੋਕਾਂ 'ਚ ਭੇਦਭਾਵ ਦੀ ਭਾਵਨਾ ਮਿਟਾਉਣ ਤੇ ਧਾਰਮਿਕ ਬਿਰਤੀਆਂ 'ਚ ਲਗਾਇਆ, ਜਿਸ ਸਦਕਾ ਉਨ੍ਹਾਂ ਦੀ ਬਾਣੀ ਸ੍ਰੀ ਗੁਰੂ ਸਾਹਿਬ ਜੀ 'ਚ ਦਰਜ ਹੈ | ਉਨ੍ਹਾਂ ਦੱਸਿਆ ਕਿ ਭਗਤ ਜੀ ਦੀਆ ਧਾਰਨਾਵਾਂ ਰਲ ਮਿਲ ਕੇ ਰਹਿਣਾ ਤੇ ਵਧੀਆ ਸਮਾਜ ਦੀ ਸਿਰਜਣਾ ਕਰਨਾ ਸੀ, ਜਿਸ ਸਦਕਾ ਕਿ ਲੋਕਾਂ 'ਚ ਆਪਸੀ ਭਾਈਚਾਰਕ ਸਾਂਝ ਦੀ ਸਥਾਪਨਾ ਹੋਈ ਤੇ ਸਮਾਜ 'ਚ ਆਪਸੀ ਭਾਈਚਾਰਾ ਵਧਿਆ | ਉਨ੍ਹਾਂ ਬੱਚਿਆਂ ਨੂੰ ਦੱਸਿਆ ਕਿ ਗੁਰੂ ਗ੍ਰੰਥ ਸਾਹਿਬ ਵਿਚ ਰਵਿਦਾਸ ਜੀ ਦੇ 41 ਵਾਕ 16 ਰਾਗਾਂ ਵਿਚ ਦਰਜ ਹਨ | ਇਸ ਮੌਕੇ ਉਨ੍ਹਾਂ ਸਾਰਿਆ ਨੂੰ ਸ੍ਰੀ ਗੁਰੂ ਰਵਿਦਾਸ ਜੀ ਦੇ ਪ੍ਰਕਾਸ਼ ਪੁਰਬ ਦੀਆਂ ਵਧਾਈਆਂ ਵੀ ਦਿੱਤੀਆਂ |
