ਦਿੱਲੀ 'ਚ ਮੀਂਹ ਦੌਰਾਨ ਹੋਈ ਗਣਤੰਤਰ ਦਿਵਸ ਪਰੇਡ ਦੀ ਫੁਲ ਡਰੈੱਸ ਰਿਹਰਸਲ

ਨਵੀਂ ਦਿੱਲੀ, 23 ਜਨਵਰੀ (ਪੀ. ਟੀ. ਆਈ.)-ਸ਼ੁੱਕਰਵਾਰ ਨੂੰ ਰਾਸ਼ਟਰੀ ਰਾਜਧਾਨੀ 'ਚ 77ਵੀਂ ਗਣਤੰਤਰ ਦਿਵਸ ਪਰੇਡ ਦੀ ਫੁਲ ਡਰੈੱਸ ਰਿਹਰਸਲ ਹੋਈ | ਸਵੇਰ ਦੇ ਮੀਂਹ ਵਿਚਾਲੇ ਫੌਜ ਦੇ ਜਵਾਨਾਂ ਅਤੇ ਕਲਾਕਾਰਾਂ ਨੇ ਕਰਤੱਵ ਪਥ 'ਤੇ ਮਾਰਚ ਕੀਤਾ, ਜਿਸ ਕਾਰਨ ਰਸਮੀ ਬੁਲੇਵਾਰਡ 'ਤੇ ਪ੍ਰੋਗਰਾਮ 'ਚ ਥੋੜ੍ਹੀ ਦੇਰੀ ਹੋ ਗਈ | ਬੇਸ਼ੱਕ, ਖਰਾਬ ਮੌਸਮ ਨੂੰ ਦੇਖਦਿਆਂ ਅਧਿਕਾਰੀਆਂ ਨੇ ਦੱਸਿਆ ਫਲਾਈਪਾਸਟ ਅਤੇ ਪਰੇਡ 'ਚ ਕੁਝ ਸੱਭਿਆਚਾਰਕ ਪ੍ਰੋਗਰਾਮ ਨਹੀਂ ਹੋ ਸਕੇ | ਪਰੇਡ ਦੀ ਫੁਲ ਰਿਹਰਸਲ ਸਵੇਰੇ ਕਰੀਬ 10.30 ਵਜੇ ਸ਼ੁਰੂ ਹੋਈ ਅਤੇ ਕਰੀਬ 11.45 ਵਜੇ ਖਤਮ ਹੋਈ | ਹਰ ਸਾਲ ਵੱਖ-ਵੱਖ ਥਾਵਾਂ 'ਤੇ ਬਣੇ ਸਟੈਂਡ 'ਤੇ ਫੁਲ ਰਿਹਰਸਲ ਦੇ ਦਿਨ ਵੀ ਵੱਡੀ ਭੀੜ ਹੁੰਦੀ ਹੈ, ਜਿਸ ਦੇ ਲਈ ਸਰਕਾਰੀ ਪਾਸ ਜਾਰੀ ਕੀਤੇ ਜਾਂਦੇ ਹਨ | ਬੇਸ਼ੱਕ, ਸ਼ੁੱਕਰਵਾਰ ਨੂੰ ਖਰਾਬ ਮੌਸਮ ਦੇ ਕਾਰਨ ਸਟੈਂਡ 'ਤੇ ਭੀੜ ਘੱਟ ਰਹੀ | ਮੀਂਹ ਕਾਰਨ ਸ਼ਹਿਰ ਦੇ ਕੁਝ ਹਿੱਸਿਆਂ 'ਚ ਟ੍ਰੈਫਿਕ ਵੀ ਰੁਕਿਆ, ਪੰ੍ਰਤੂ ਮਾਰਚਿੰਗ ਟੁਕੜੀਆਂ ਦਾ ਜੋਸ਼ ਘੱਟ ਨਹੀਂ ਹੋਇਆ | ਫੌਜੀ ਜਵਾਨ ਵਿਜੇ ਚੌਕ ਤੋਂ ਲਾਲ ਕਿਲ੍ਹੇ ਤੱਕ, ਜੋ ਪਰੇਡ ਦਾ ਰੂਟ ਹੈ, ਵੱਖ-ਵੱਖ ਪਲੇਟਫਾਰਮਾਂ 'ਤੇ ਵੱਖ-ਵੱਖ ਹਥਿਆਰਾਂ ਦੇ ਨਾਲ ਮਾਰਚ ਕਰਦੇ ਹੋਏ ਗਏ ਅਤੇ ਭਿੱਜਣ ਦੇ ਬਾਵਜੂਦ ਪੂਰੇ ਜੋਸ਼ ਅਤੇ ਉਤਸ਼ਾਹ ਦਾ ਪ੍ਰਦਰਸ਼ਨ ਕੀਤਾ | ਇਸ ਰਿਹਰਸਲ ਦੌਰਾਨ ਕਈ ਝਾਕੀਆਂ ਵੀ ਵਿਖਾਈਆਂ ਗਈਆਂ |