ਜਲੰਧਰ ਛਾਉਣੀ, 20 ਨਵੰਬਰ (ਪਵਨ ਖਰਬੰਦਾ)-ਪੀ.ਏ.ਪੀ. ਸਿਖਲਾਈ ਕੇਂਦਰ ਜਲੰਧਰ ਛਾਉਣੀ ਵਿਖੇ ਈਸ਼ਵਰ ਸਿੰਘ ਆਈ.ਪੀ.ਐਸ ਸਪੈਸ਼ਲ ਡੀ.ਜੀ.ਪੀ., ਐਚ.ਆਰ.ਡੀ. ਦੇ ਦਿਸ਼ਾ ਨਿਰਦੇਸ਼ 'ਤੇ ਕੁਲਜੀਤ ਸਿੰਘ, ਪੀ.ਪੀ.ਐਸ ਕਮਾਂਡੈਂਟ ਸਿਖਲਾਈ ਦੀ ਦੇਖ-ਰੇਖ 'ਚ ਅੱਜ ਬੈਚ ਨੰਬਰ 182 ਦੇ ਰਿਕਰੂਟ ਇੰਟੈਂਲੀਜੈਂਸ ਅਸਿਸਟੈਂਟ ਦੀ ਪਾਸਿੰਗ ਆਊਟ ਪਰੇਡ ਹੋਈ, ਜਿਸ ਵਿੱਚ ਇੰਟੈਲੀਜੈਂਸ ਕੇਡਰ ਦੇ ਕੁੱਲ 313 (205 ਪੁਰਸ ਅਤੇ 108 ਮਹਿਲਾ) ਰਿਕਰੂਟ ਇੰਟੈਂਲੀਜੈਂਸ ਅਸਿਸਟੈਂਟ ਆਪਣੀ ਮੁੱਢਲੀ ਸਿਖਲਾਈ ਹਾਸਿਲ ਕਰਨ ਤੋਂ ਬਾਅਦ ਪਾਸ ਆਊਟ ਹੋਏ | ਇਨ੍ਹਾਂ ਜਵਾਨਾਂ ਨੂੰ ਮੁੱਢਲੀ ਸਿਖਲਾਈ ਦੌਰਾਨ ਆਊਟਡੋਰ ਅਤੇ ਇੰਨਡੋਰ ਵਿਸ਼ਿਆਂ ਵਿੱਚ ਸਿਖਲਾਈ ਦਿੱਤੀ ਗਈ ਹੈ | ਪਾਸਿੰਗ ਆਊਟ ਪਰੇਡ ਦੇ ਮੁੱਖ ਮਹਿਮਾਨ ਕੁਲਜੀਤ ਸਿੰਘ, ਪੀ.ਪੀ.ਐਸ ਕਮਾਂਡੈਂਟ ਸਿਖਲਾਈ ਜਲੰਧਰ ਛਾਉਣੀ ਨੇ ਸ਼ਾਨਦਾਰ ਪਾਸਿੰਗ ਆਊਟ ਪਰੇਡ ਤੋਂ ਸਲਾਮੀ ਲਈ ਅਤੇ ਪਰੇਡ ਦਾ ਨਿਰੀਖਨ ਕੀਤਾ | ਮੁੱਖ ਮਹਿਮਾਨ ਨੇ ਟਰੇਨਿੰਗ ਵਿੱਚੋ ਪਾਸ ਹੋਣ 'ਤੇ ਸਿਖਆਰਥੀਆਂ ਨੂੰ ਵਧਾਈ ਦਿੱਤੀ ਅਤੇ ਚੰਗੇ ਪੁਲਿਸ ਅਫਸਰ ਬਣਨ ਅਤੇ ਅਨੁਸਾਸਨ 'ਚ ਰਹਿ ਕੇ ਕਾਨੂੰਨ ਅਨੁਸਾਰ ਸਮਾਜ ਦੀ ਨਿਰਪਖਤਾ ਨਾਲ ਸੇਵਾ ਕਰਨ ਦੀ ਪ੍ਰੇਰਨਾ ਦਿੱਤੀ | ਮੁੱਖ ਮਹਿਮਾਨ ਵਲੋਂ ਸਿਖਲਾਈ ਦੌਰਾਨ ਵਧੀਆਂ ਕਾਰਗੁਜ਼ਾਰੀ ਦਿਖਾਉਣ ਵਾਲੇ ਜਵਾਨਾਂ ਭੁਪਿੰਦਰ ਸਿੰਘ, ਅੰਜੂ ਭਾਟੀਆ, ਬਲਜੀਤ ਸਿੰਘ, ਦੀਪਕ, ਅਮਨਦੀਪ ਸਿੰਘ ਨੂੰ ਇਨਾਮ ਦੇ ਕੇ ਸਨਮਾਨਿਤ ਕੀਤਾ ਗਿਆ | ਪਾਸਿੰਗ ਆਊਟ ਪਰੇਡ ਤੋਂ ਬਾਅਦ ਮਾਸ ਪੀ.ਟੀ. ਸ਼ੋਅ, ਬੈਂਡ ਡਿਸਪਲੇ, ਭੰਗੜਾ ਅਤੇ ਗਿੱਧੇ ਦਾ ਸ਼ੋਅ ਪੇਸ਼ ਕੀਤਾ ਗਿਆ | ਇਸ ਮੋਕੇ ਵੱਖ-ਵੱਖ ਯੂਨਿਟਾਂ ਦੇ ਅਧਿਕਾਰੀ, ਆਰ.ਟੀ.ਸੀ ਸਟਾਫ ਅਤੇ ਜਵਾਨਾ ਦੇ ਪਰਿਵਾਰਿਕ ਮੈਂਬਰ ਹਾਜ਼ਰ ਸਨ |
