ਗੀਤ

ਸਹੁੰ ਤੇਰੀ ਛੱਡ ਜਾਵਣ ਦੇ।
ਪੈਣ ਛਰਾਟੇ ਸਾਵਣ ਦੇ।
ਠੰਡੀਆਂ ਠਾਰ ਹਵਾਵਾਂ ਨੇ।
ਚੰੜ੍ਹੀਆਂ ਘੋਰ ਘਟਾਵਾਂ ਨੇ।
ਗੀਤ ਖੁਸ਼ੀ ਦੇ ਗਾਵਣ ਦੇ।
ਪੈਣ ਛਰਾਟੇ ਸਾਵਣ ਦੇ।
ਹੁੰਮਸ ਤਪਸ਼ ਚੁਮਾਸੇ ਨੇ।
ਗਰਮੀ ਦੇ ਧਰਵਾਸੇ ਨੇ।
ਸਾਹ ਕੁਝ ਸੌਖਾ ਆਵਣ ਦੇ।
ਪੈਣ ਛਰਾਟੇ ਸਾਵਣ ਦੇ।
ਬੱਚਿਆਂ ਦੇ ਮੁਟਿਆਰਾਂ ਨੂੰ।
ਖਿੜ ਰਹੇ ਗੁਲਜ਼ਾਰਾਂ ਨੂੰ।
ਮਸਤੀ ਵਿਚ ਨਹਾਵਣ ਦੇ।
ਪੈਣ ਛਰਾਟੇ ਸਾਵਣ ਦੇ।
ਸ਼ੁਭ ਅਸੀਸਾਂ ਮਾਲੀ ਨੂੰ।
ਫਸਲਾਂ ਤੇ ਹਰਿਆਲੀ ਨੂੰ।
ਸੋਨਾ ਹੋਰ ਉਗਾਵਣ ਦੇ।
ਪੈਣ ਛਰਾਟੇ ਸਾਵਣ ਦੇ।
ਕਾਗਜ਼ ਵਾਲੀ ਬੇੜੀ ਹੈ।
ਬੱਚਿਆਂ ਨੀਰ 'ਚ ਰੇੜੀ ਹੈ।
ਸ਼ੋਰ ਸ਼ਰਾਬਾ ਪਾਵਣ ਦੇ।
ਪੈਣ ਛਰਾਟੇ ਸਾਵਣ ਦੇ
ਗਿੱਧੇ ਪੀਂਘਾਂ ਤੀਜ ਦੀਆਂ।
ਪੁੰਨਿਆਂ ਤੀਕਰ ਰੀਝ ਦੀਆਂ।
ਖੀਰਾਂ ਪੂੜੇ ਖਾਵਣ ਦੇ।
ਪੈਣ ਛਰਾਟੇ ਸਾਵਣ ਦੇ।
ਜ਼ਿੰਦਾ ਰਹਿਣਾ ਸੱਭਿਆਚਾਰ।
ਦੇਸ਼ ਵਿਦੇਸ਼ਾਂ ਵਿਚ ਪ੍ਰਚਾਰ।
ਇਹ ਤਿਉਹਾਰ ਮਨਾਵਣ ਦੇ।
ਪੈਣ ਛਰਾਟੇ ਸਾਵਣ ਦੇ।
ਧੁੱਪਾਂ ਛਾਂਵਾਂ ਕਹਿਣਗੀਆਂ।
ਕੌਮਾਂ ਜ਼ਿੰਦਾ ਰਹਿਣਗੀਆਂ।
'ਬਾਲਮ' ਨੂੰ ਸਮਝਾਵਣ ਦੇ।
ਪੈਣ ਛਰਾਟੇ ਸਾਵਣ ਦੇ।

* ਬਲਵਿੰਦਰ ਬਾਲਮ ਗੁਰਦਾਸਪੁਰ *

ਉਂਕਾਰ ਨਗਰ ਗੁਰਦਾਸਪੁਰ।
ਫੋਨ : 98156-25409