ਭਾਰਤੀ ਫ਼ੌਜ ਨੇ ਨੰਨ੍ਹੇ ਯੋਧੇ ਸ਼ਵਨ ਸਿੰਘ ਨੂੰ ਲਿਆ ਗੋਦ

ਫ਼ਿਰੋਜ਼ਪੁਰ, 20 ਜੁਲਾਈ (ਗੁਰਿੰਦਰ ਸਿੰਘ)-ਆਪ੍ਰੇਸ਼ਨ ਸੰਧੂਰ ਦੌਰਾਨ ਆਪਣੀ ਜਾਨ ਦੀ ਪ੍ਰਵਾਹ ਕੀਤੇ ਬਗੈਰ ਸਰਹੱਦ 'ਤੇ ਤਾਇਨਾਤ ਫ਼ੌਜੀ ਜਵਾਨਾਂ ਲਈ ਸਹਾਇਤਾ ਪਹੁੰਚਾਉਣ ਵਾਲੇ ਨੰਨ੍ਹੇ ਯੋਧੇ ਸ਼ਵਨ ਸਿੰਘ ਦੀ ਅਸਾਧਾਰਨ ਹਿੰਮਤ ਤੇ ਦਿ੍ੜਤਾ ਨੂੰ ਦੇਖਦੇ ਹੋਏ ਭਾਰਤੀ ਫ਼ੌਜ ਦੇ ਗੋਲਡਨ ਐਰੋ ਡਵੀਜ਼ਨ ਨੇ ਸ਼ਵਨ ਦੀ ਸਿੱਖਿਆ ਨੂੰ ਪੂਰੀ ਤਰ੍ਹਾਂ ਸਪਾਂਸਰ ਕਰਨ ਲਈ ਵਚਨਬੱਧਤਾ ਪ੍ਰਗਟਾਈ ਹੈ ਤਾਂ ਜੋ ਇਹ ਯਕੀਨੀ ਬਣਾਇਆ ਜਾ ਸਕੇ ਕਿ ਵਿੱਤੀ ਰੁਕਾਵਟਾਂ ਉਸਦੇ ਵਿਕਾਸ ਤੇ ਇੱਛਾਵਾਂ ਵਿਚ ਰੁਕਾਵਟ ਨਾ ਬਣਨ | ਫ਼ਿਰੋਜ਼ਪੁਰ ਵਿਖੇ ਇਕ ਵਿਸ਼ੇਸ਼ ਸਮਾਰੋਹ ਦੌਰਾਨ ਪੱਛਮੀ ਕਮਾਂਡ ਦੇ ਜੀਓਸੀ-ਇਨ-ਸੀ, ਲੈਫ਼ਟੀਨੈਂਟ ਜਨਰਲ ਮਨੋਜ ਕੁਮਾਰ ਕਟਿਆਰ ਨੇ ਨਿੱਜੀ ਤੌਰ 'ਤੇ ਮਾਸਟਰ ਸ਼ਵਨ ਨੂੰ ਸਨਮਾਨਿਤ ਕੀਤਾ, ਜੋ ਕਿ ਭਾਰਤੀ ਫ਼ੌਜ ਦੇ ਪੰਜਾਬ ਦੇ ਲੋਕਾਂ ਨਾਲ ਅਟੁੱਟ ਰਿਸ਼ਤੇ ਤੇ ਅਗਲੀ ਪੀੜ੍ਹੀ ਪ੍ਰਤੀ ਜ਼ਿੰਮੇਵਾਰੀ ਦੀ ਡੂੰਘੀ ਭਾਵਨਾ ਨੂੰ ਦਰਸਾਉਂਦਾ ਹੈ | ਲੈਫ਼ਟੀਨੈਂਟ ਜਨਰਲ ਕਟਿਆਰ ਨੇ ਕਿਹਾ ਕਿ ਸ਼ਵਨ ਦੀ ਕਹਾਣੀ ਉਨ੍ਹਾਂ ਨਾਇਕਾਂ ਦੀ ਯਾਦ ਦਿਵਾਉਂਦੀ ਹੈ, ਜੋ ਸਤਿਕਾਰ ਅਤੇ ਮਾਣ ਦੇ ਹੱਕਦਾਰ ਹਨ | ਇਸ ਪਹਿਲਕਦਮੀ ਤਹਿਤ, ਸ਼ਵਨ ਨੂੰ ਵਿਆਪਕ ਵਿੱਦਿਅਕ ਸਹਾਇਤਾ ਯਕੀਨੀ ਬਣਾਈ ਜਾਵੇਗੀ | ਭਾਰਤੀ ਫ਼ੌਜ ਦਾ ਗੋਲਡਨ ਐਰੋ ਡਿਵੀਜ਼ਨ ਸ਼ਵਨ ਦੀ ਦਾਖ਼ਲੇ ਤੋਂ ਲੈ ਕੇ ਵਿੱਦਿਅਕ ਜ਼ਰੂਰਤਾਂ ਤੱਕ, ਸਕੂਲਿੰਗ ਦੇ ਸਾਰੇ ਪਹਿਲੂਆਂ ਨੂੰ ਕਵਰ ਕਰੇਗਾ | ਇਸਦਾ ਉਦੇਸ਼ ਸ਼ਵਨ ਨੂੰ ਉਸ ਦੀ ਵਿੱਦਿਅਕ ਯਾਤਰਾ ਵਿਚ ਉੱਤਮਤਾ ਪ੍ਰਾਪਤ ਕਰਨ ਲਈ ਜ਼ਰੂਰੀ ਮੌਕੇ ਤੇ ਸਰੋਤ ਪ੍ਰਦਾਨ ਕਰਨਾ ਹੈ | ਲੈਫ਼ਟੀਨੈਂਟ ਜਨਰਲ ਕਟਿਆਰ ਨੇ ਜ਼ੋਰ ਦੇ ਕੇ ਕਿਹਾ ਕਿ ਸਾਡੀ ਫੌਜ ਸ਼ਵਨ ਦੇ ਸਫ਼ਰ ਦੇ ਹਰ ਕਦਮ 'ਤੇ ਉਸ ਦੇ ਨਾਲ ਖੜ੍ਹੀ ਹੈ | ਇਹ ਪਹਿਲ ਨਾ ਸਿਰਫ਼ ਭਾਰਤੀ ਫੌਜ ਦੀ ਆਪਣੇ ਨਾਗਰਿਕਾਂ ਦੀ ਭਲਾਈ ਪ੍ਰਤੀ ਵਚਨਬੱਧਤਾ ਨੂੰ ਦਰਸਾਉਂਦੀ ਹੈ, ਸਗੋਂ ਹਮਦਰਦੀ ਤੇ ਸਮਰਥਨ ਦੀ ਇੱਕ ਪ੍ਰੇਰਨਾਦਾਇਕ ਮਿਸਾਲ ਵੀ ਕਾਇਮ ਕਰਦੀ ਹੈ |