ਮਲੋਟ, 20 ਨਵੰਬਰ (ਪਾਟਿਲ)-ਮਲੋਟ ਇੰਸਟੀਚਿਊਟ ਆਫ ਮੈਨੇਜਮੈਂਟ ਐਂਡ ਇੰਨਫਰਮੇਸ਼ਨ ਟੈਕਨਾਲੋਜੀ (ਮਿਮਿਟ) ਮਲੋਟ ਵਿਖੇ ਦੋ ਰੋਜ਼ਾ ਜੈਂਡਰ ਸੰਵੇਦਨਸ਼ੀਲਤਾ ਤੇ ਜਿਨਸੀ ਪ੍ਰੇਸ਼ਾਨੀ ਵਿਰੋਧੀ ਨਿਯਮ (2016) ਬਾਰੇ ਜਾਗਰੂਕਤਾ ਸੈਸ਼ਨ ਕਰਵਾਇਆ ਗਿਆ | ਸੈਸ਼ਨ ਦਾ ਉਦੇਸ਼ ਵਿਦਿਆਰਥੀਆਂ ਤੇ ਸਟਾਫ਼ ਨੂੰ ਕੈਂਪਸ 'ਚ ਸੁਰੱਖਿਅਤ, ਸਤਿਕਾਰਯੋਗ ਤੇ ਜੈਂਡਰ ਸੰਵੇਦਨਸ਼ੀਲ ਮਾਹੌਲ ਬਣਾਉਣ ਲਈ ਬਣੇ ਨਿਯਮਾਂ ਨਾਲ ਜਾਣੂ ਕਰਵਾਉਣਾ ਸੀ | ਸੈਸ਼ਨ ਬਾਰੇ ਜਾਣਕਾਰੀ ਸਾਂਝੀ ਕਰਦੇ ਹੋਏ ਸੰਸਥਾ ਦੁਆਰਾ ਬਣਾਈ ਗਈ ਇੰਟਰਨਲ ਸ਼ਿਕਾਇਤ ਕਮੇਟੀ ਦੇ ਮੈਂਬਰ ਡਾ. ਰਾਜੀਵ ਜੈਨ ਨੇ ਦੱਸਿਆ ਕਿ ਦੋ ਦਿਨਾਂ ਸੈਸ਼ਨ ਦੌਰਾਨ ਪਹਿਲੇ ਦਿਨ ਫੈਕਲਟੀ ਤੇ ਸਟਾਫ਼ ਲਈ ਅਤੇ ਦੂਸਰੇ ਦਿਨ ਵਿਦਿਆਰਥੀਆਂ ਲਈ ਕਰਵਾਇਆ ਗਿਆ | ਡਾ. ਸੋਨੀਆ ਸ਼ਰਮਾ, ਪ੍ਰਧਾਨ, ਇੰਟਰਨਲ ਸ਼ਿਕਾਇਤ ਕਮੇਟੀ ਨੇ ਜ਼ੀਰੋ ਟੋਲਰੈਂਸ ਨੀਤੀ, ਸ਼ਿਕਾਇਤ ਦਰਜ ਕਰਨ ਦੀ ਪ੍ਰਕਿਰਿਆ ਤੇ ਇੰਟਰਨਲ ਕਮੇਟੀ ਦੀ ਭੂਮਿਕਾ ਬਾਰੇ ਜਾਣਕਾਰੀ ਦਿੱਤੀ | ਇਸ ਸਬੰਧੀ ਕਮੇਟੀ ਦੇ ਹੋਰ ਮੈਂਬਰ ਡਾ. ਅਮਨਜੋਤ ਕੌਰ, ਰਕਸ਼ਿਤ ਭਾਟੀਆ ਤੇ ਸੁਖਵਿੰਦਰ ਕੌਰ ਨੇ ਵੀ ਭਾਗੀਦਾਰਾਂ ਨਾਲ ਸੰਵਾਦ ਕੀਤਾ ਤੇ ਉਨ੍ਹਾਂ ਦੇ ਸਵਾਲਾਂ ਦਾ ਜਵਾਬ ਦਿੱਤਾ | ਇਸ ਮੌਕੇ ਇਹ ਵੀ ਐਲਾਨ ਕੀਤਾ ਗਿਆ ਕਿ ਸੰਸਥਾ 7 ਤੋਂ 16 ਦਸੰਬਰ ਤੱਕ ਕੰਮ ਵਾਲੀ ਥਾਂ ਤੇ ਅÏਰਤਾਂ ਦਾ ਜਿਨਸ਼ੀ ਸੋਸ਼ਣ ਰੋਕਥਾਮ ਹਫ਼ਤਾ ਮਨਾਏਗੀ | ਇਸ ਮੌਕੇ ਸੰਸਥਾ ਦੇ ਡਾਇਰੈਕਟਰ ਡਾ. ਜਸਕਰਨ ਸਿੰਘ ਭੁੱਲਰ ਨੇ ਕਮੇਟੀ ਦੇ ਯਤਨਾਂ ਦੀ ਸ਼ਲਾਘਾ ਕੀਤੀ | ਸੈਸ਼ਨ ਦੀ ਸਮਾਪਤੀ ਦੌਰਾਨ ਕੈਂਪਸ ਨੂੰ ਹਰਾਸਮੈਂਟ ਮੁਕਤ ਬਣਾਉਣ ਦੀ ਸਾਂਝੀ ਸਹੁੰ ਵੀ ਚੁਕਾਈ ਗਈ |
