ਰਾਮ ਤੀਰਥ, 6 ਨਵੰਬਰ (ਧਰਵਿੰਦਰ ਸਿੰਘ ਔਲਖ)-ਉੱਘੇ ਕਾਂਗਰਸੀ ਆਗੂ ਤੇ ਸਾਬਕਾ ਵਿਧਾਇਕ ਸੁਖਵਿੰਦਰ ਸਿੰਘ ਡੈਨੀ ਅੱਜ ਅਚਾਨਕ ਭਗਵਾਨ ਵਾਲਮੀਕਿ ਤੀਰਥ ਵਿਖੇ ਆਏ ਅਤੇ ਸਤਿਗੁਰੂ ਗਿਆਨ ਨਾਥ ਆਸ਼ਰਮ ਵਿਖੇ ਨਤਮਸਤਕ ਹੋਏ | ਜਿੱਥੇ ਪਹਿਲਾਂ ਤੋਂ ਹੀ ਮੌਜੂਦ ਕੁਝ ਕਾਂਗਰਸੀ ਵਰਕਰਾਂ ਵਲੋਂ ਉਨ੍ਹਾਂ ਦਾ ਸਵਾਗਤ ਕੀਤਾ ਗਿਆ | ਉੱਥੇ ਉਨ੍ਹਾਂ ਨੂੰ ਆਸ਼ਰਮ ਦੇ ਮੁਖੀ ਮਹੰਤ ਗਿਰਧਾਰੀ ਨਾਥ ਦੇ ਦਫ਼ਤਰ ਵਿਚ ਬਿਠਾ ਦਿੱਤਾ ਗਿਆ | ਮਹੰਤ ਜੀ ਵਲੋਂ ਚਾਹ ਬਣਾਈ ਜਾ ਰਹੀ ਸੀ | ਵੇਖਦਿਆਂ ਹੀ ਵੇਖਦਿਆਂ ਉਥੇ ਬਹੁਤ ਸਾਰੇ ਮੀਡੀਆ ਕਰਮੀ ਪਹੁੰਚ ਗਏ, ਜਿਨ੍ਹਾਂ ਨੂੰ ਵੇਖਦਿਆਂ ਹੀ ਸੁਖਵਿੰਦਰ ਸਿੰਘ ਡੈਨੀ ਬਿਨਾਂ ਚਾਹ ਪੀਤਿਆਂ ਹੀ ਚੁੱਪ ਚਾਪ ਖਿਸਕ ਗਏ ਤੇ ਮੀਡੀਆ ਕਰਮੀ ਵੇਖਦੇ ਹੀ ਰਹਿ ਗਏ |