ਚੰਡੀਗੜ੍ਹ ਰਾਸ਼ਟਰੀ ਸ਼ਿਲਪ ਮੇਲੇ ਦੇ ਆਖ਼ਰੀ ਦਿਨ ਗਾਇਕ ਅੰਮਿ੍ਤ ਮਾਨ ਨੇ ਲਾਈਆਂ ਰੌਣਕਾਂ
ਅਜੀਤ ਡੈਸਕ
08-12-2025
ਲੋਕ ਨਾਚਾਂ ਨਾਲ ਦਿਨ ਦਾ ਸੈਸ਼ਨ ਰੰਗੀਨ
ਦਿਨਦੇ ਸਮੇਂ ਜੰਮੂ-ਕਸ਼ਮੀਰ ਦਾ 'ਰਾਊਫ ਨਾਚ', ਉੱਤਰਾਖੰਡ ਦਾ 'ਛਪੇਲੀ', ਆਸਾਮ ਦਾ 'ਬਿਹੂ' ਤੇ ਹਰਿਆਣਾ ਦਾ 'ਘੂਮਰ' ਨਾਚ ਮੰਚ 'ਤੇ ਕੇਂਦਰ ਬਣੇ | ਰਾਜਸਥਾਨ ਦੀ ਕਾਲ ਬੇਲੀਆ ਨਰਤਕਾਂ ਦੀ ਜੋਸ਼ੀਲੀ ਪੇਸ਼ਕਾਰੀ ਨੇ ਦਰਸ਼ਕਾਂ ਦੇ ਮਨ ਮੋਹ ਲਈ | ਪੰਜਾਬੀ ਭੰਗੜਾ, ਜੰਮੂ-ਕਸ਼ਮੀਰ ਦਾ ਜਾਗ੍ਰਣ ਨਾਚ ਤੇ ਹੋਰ ਲੋਕ ਪੇਸ਼ਕਾਰੀਆਂ ਨੂੰ ਵੀ ਭਰਪੂਰ ਤਾੜੀਆਂ ਮਿਲੀਆਂ | ਸ਼ਾਮ ਦੇ ਦੂਜੇ ਸੈਸ਼ਨ ਵਿਚ ਪੰਜਾਬ ਦੇ ਕਰਮ ਸਿੰਘ ਸਮੂਹ ਨੇ ਝੂਮਰ ਨਾਚ ਨਾਲ ਮੰਚ ਨੂੰ ਰੌਸ਼ਨ ਕਰ ਦਿੱਤਾ | ਰਾਜਸਥਾਨ ਦੇ 'ਚੱਕਰੀਂ ਨਾਚ' ਨੇ ਰੰਗੀਨ ਪੋਸ਼ਾਕਾਂ ਅਤੇ ਤੇਜ਼ ਘੁੰਮਣ ਦੀ ਕਲਾ ਨਾਲ ਸਭ ਨੂੰ ਹੈਰਾਨ ਕਰ ਦਿੱਤਾ | ਪੱਛਮੀ ਬੰਗਾਲ ਦੇ 'ਰਾਏਬੇਂਸ਼ੇ' ਨਾਚ ਨੇ ਮਾਰਸ਼ਲ ਆਰਟ ਤੇ ਐਕਰੋਬੈਟਿਕਸ ਦੇ ਮਿਲੇ-ਜੁਲੇ ਦਿ੍ਸ਼ ਨਾਲ ਭੀੜ ਦੀਆਂ ਵਾਹ-ਵਾਹੀਆਂ ਲੁੱਟੀਆਂ | ਦੁਪਹਿਰ ਸਮੇਂ ਰਾਜਸਥਾਨ ਦੇ ਮੁਰਲੀ ਰਾਜਸਥਾਨੀ ਨੇ ਆਪਣੀ ਰੂਹਾਨੀ ਲੋਕ ਗਾਇਕੀ ਨਾਲ ਮਾਹੌਲ ਸੁਰੀਲਾ ਬਣਾਇਆ | ਉਨ੍ਹਾਂ ਦੀ ਮਿੱਠੀ ਧੁਨ ਤੇ ਰਾਜਸਥਾਨੀ ਸੁਰਾਂ ਨੇ ਦਰਸ਼ਕਾਂ ਨੂੰ ਆਪਣੇ ਨਾਲ ਜੋੜ ਲਿਆ |
ਪੰਜਾਬੀ ਗੀਤ ਤੇ ਮਲਵਈ ਗਿੱਧਾ ਬਣੇ ਖ਼ਾਸ ਆਕਰਸ਼ਨ
ਪੰਜਾਬੀ ਆਰਕੈਸਟਰਾ, ਬੌਬੀ ਸਿੱਧੂ ਦੇ ਲੋਕ ਗੀਤ ਤੇ ਪ੍ਰੋਫੈਸਰ ਮੇਜਰ ਸਿੰਘ ਸਮੂਹ ਦੇ ਮਲਵਈ ਗਿੱਧੇ ਨੇ ਟੈਂਟ ਸਿਟੀ ਵਿਚ ਪੰਜਾਬੀ ਰੰਗ ਬਿਖੇਰ ਦਿੱਤਾ | ਇਸ ਤੋਂ ਇਲਾਵਾ ਦਾਲ-ਬਾਟੀ, ਦੁੱਧ-ਜਲੇਬਾ, ਸਰੋਂ ਦਾ ਸਾਗ, ਲਿਟੀ-ਚੋਖਾ, ਤੇਲੰਗਾਨਾ ਦੇ ਖ਼ਾਸ ਭੋਜਨ ਸਮੇਤ ਕਈ ਰਾਜਾਂ ਦੇ ਪਕਵਾਨਾਂ ਦਾ ਲੋਕਾਂ ਨੇ ਬੜੇ ਚਾਵ ਨਾਲ ਆਨੰਦ ਮਾਣਿਆ | ਕਾਰੀਗਰਾਂ ਦੇ ਸਟਾਲਾਂ 'ਤੇ ਵੀ ਖ਼ਰੀਦਦਾਰੀ ਲਈ ਚੰਗੀ-ਖਾਸੀ ਭੀੜ ਰਹੀ | ਰਾਜਸਥਾਨ ਦੀ ਕੱਚੀ ਘੋੜੀ, ਹਰਿਆਣਾ ਦੇ ਬੀਨ ਜੋਗੀ ਤੇ ਨਾਗ ਦਾ ਨਾਚ ਨੇ ਲਗਾਤਾਰ ਮਨੋਰੰਜਨ ਕੀਤਾ | ਪੰਜਾਬ ਦੀ 'ਬਾਜ਼ੀਗਰ ਟੀਮ' ਵਲੋਂ ਪੇਸ਼ ਕੀਤੇ ਦਮਦਾਰ ਸਟੰਟਾਂ 'ਤੇ ਦਰਸ਼ਕ ਝੂਮ ਉਠੇ |
