ਚੰਡੀਗੜ੍ਹ, 18 ਜੁਲਾਈ (ਮਾਰਕੰਡਾ)-ਪੰਜਾਬ ਇੰਜੀਨੀਅਰਿੰਗ ਕਾਲਜ ਚੰਡੀਗੜ੍ਹ ਦੇ ਕੰਪਿਊਟਰ ਸੈਂਟਰ ਨੇ ਚੰਡੀਗੜ੍ਹ ਪੁਲਿਸ ਵਿਭਾਗ ਦੇ ਅਧਿਕਾਰੀਆਂ ਲਈ ਜੁਲਾਈ 2025 ਤੱਕ ਇਕ ਵਿਸ਼ੇਸ਼ ਆਈ.ਸੀ.ਟੀ (ਸੂਚਨਾ ਅਤੇ ਸੰਚਾਰ ਤਕਨਾਲੋਜੀ) ਸਿਖਲਾਈ ਪ੍ਰੋਗਰਾਮ ਕਰਵਾਇਆ ਜੋ ਕਿ ਇੱਕ ਮਹੀਨੇ ਲਈ ਜਾਰੀ ਰਿਹਾ | ਇਸ ਦਾ ਮੁੱਖ ਉਦੇਸ਼ ਪੁਲਿਸ ਅਧਿਕਾਰੀਆਂ ਨੂੰ ਡਿਜੀਟਲ ਨਾਲ ਲੈਸ ਕਰਨਾ ਸੀ ਤਾਂ ਜੋ ਉਹ ਨਵੇਂ ਤਕਨਾਲੋਜੀ ਰੁਝਾਨਾਂ ਨੂੰ ਅਪਣਾ ਸਕਣ ਅਤੇ ਆਪਣੀਆਂ ਰੋਜ਼ਾਨਾ ਦੀਆਂ ਗਤੀਵਿਧੀਆਂ ਨੂੰ ਪੂਰਾ ਕਰ ਸਕਣ | ਇਸ ਕੰਮ ਵਿਚ ਆਈ.ਸੀ.ਟੀ. ਸੰਦਾਂ ਦੀ ਵਰਤੋਂ ਕਰ ਸਕਦੇ ਹਨ | ਇਸ ਪ੍ਰੋਗਰਾਮ ਦੀ ਕੋਆਰਡੀਨੇਟਰ ਡਾ. ਸੁਨੀਤਾ ਮਹਿਤਾ ਸਨ | ਕੰਪਿਊਟਰ ਸੈਂਟਰ ਦੇ ਮੁਖੀ ਡਾ. ਸੰਜੇ ਬਾਤਿਸ਼ ਨੋਡਲ ਅਫ਼ਸਰ ਵਜੋਂ ਸ਼ਾਮਿਲ ਹੋਏ | ਸੈਸ਼ਨਾਂ ਦੀ ਅਗਵਾਈ ਬਹੁਤ ਹੀ ਤਜਰਬੇਕਾਰ ਮਾਹਿਰਾਂ ਦੀ ਇਕ ਟੀਮ ਦੁਆਰਾ ਕੀਤੀ ਗਈ | ਜਿਸ ਵਿਚ ਸੁਸ਼ੀਲ ਕੁਮਾਰ, ਪ੍ਰਭਸਿਮਰਨ ਸਿੰਘ ਬਿੰਦਰਾ, ਸੰਦੀਪ ਪਾਠਕ ਅਤੇ ਤੇਜਿੰਦਰ ਸਿੰਘ ਸ਼ਾਮਿਲ ਸਨ | ਉਨ੍ਹਾਂ ਨੇ ਅਧਿਕਾਰੀਆਂ ਨੂੰ ਨਾ ਸਿਰਫ਼ ਸਿਧਾਂਤਕ ਜਾਣਕਾਰੀ ਦਿੱਤੀ ਸਗੋਂ ਵਿਹਾਰਕ ਸਿਖਲਾਈ ਵੀ ਦਿੱਤੀ | ਸਿਖਲਾਈ ਕੰਪਿਊਟਰ ਦੇ ਮੁੱਢਲੇ ਗਿਆਨ ਨਾਲ ਸ਼ੁਰੂ ਹੋਈ | ਜਿਸ ਵਿਚ ਹਾਰਡਵੇਅਰ, ਸਾਫਟਵੇਅਰ, ਡਰਾਈਵਰ ਸ਼ਾਮਲ ਸਨ ਅਤੇ ਫਾਈਲ ਫਾਰਮੈਟ ਨੂੰ ਵਿਸਥਾਰ ਵਿਚ ਸਮਝਾਇਆ ਗਿਆ | ਇਸ ਤੋਂ ਬਾਅਦ ਅਧਿਕਾਰੀਆਂ ਨੂੰ ਸਰਕਾਰੀ ਡਿਜੀਟਲ ਪੋਰਟਲਾਂ ਅਤੇ ਨੈਸ਼ਨਲ ਡਿਜੀਟਲ ਪੋਰਟਲ ਤੱਕ ਜਾਣਕਾਰੀ ਦਿੱਤੀ ਗਈ | ਇਹ ਸਿਖਲਾਈ ਪ੍ਰੋਗਰਾਮ ਪੰਜਾਬ ਇੰਜੀਨੀਅਰਿੰਗ ਕਾਲਜ ਵਲੋਂ ਸਰਕਾਰੀ ਅਧਿਕਾਰੀਆਂ ਵਿਚ ਤਕਨੀਕੀ ਹੁਨਰ ਪ੍ਰਦਾਨ ਕਰਨ ਲਈ ਕਰਵਾਈ ਗਈ | ਪੁਲਿਸ ਅਧਿਕਾਰੀਆਂ ਨੂੰ ਦਿੱਤੀ ਜਾਣ ਵਾਲੀ ਇਹ ਸਿਖਲਾਈ ਨਾ ਸਿਰਫ਼ ਉਨ੍ਹਾਂ ਦੀ ਕਾਰਜਸ਼ੀਲ ਸਮਰੱਥਾ ਨੂੰ ਮਜ਼ਬੂਤ ਕਰਦੀ ਹੈ, ਸਗੋਂ ਸਰਕਾਰੀ ਸੇਵਾਵਾਂ ਵਿਚ ਤਕਨਾਲੋਜੀ ਦੀ ਪ੍ਰਭਾਵਸ਼ਾਲੀ ਅਤੇ ਲਾਗੂ ਵਰਤੋਂ ਦੀ ਇੱਕ ਉਦਾਹਰਣ ਵੀ ਸਥਾਪਿਤ ਕਰਦੀ ਹੈ |
