ਗੋਲੂ ਕਾ ਮੋੜ, 5 ਨਵੰਬਰ (ਸੁਰਿੰਦਰ ਸਿੰਘ ਪੁਪਨੇਜਾ)-ਸਥਾਨਕ ਕਸਬੇ ਦੇ ਗੁਰੂਹਰਸਹਾਏ ਨੂੰ ਜਾਂਦੇ ਰਸਤੇ 'ਤੇ ਪਿਛਲੀ ਸਰਕਾਰ ਵੇਲੇ ਬਣਾਏ ਗਏ ਸਵਾਗਤੀ ਗੇਟ ਨੂੰ ਹੁਣ ਤੱਕ ਮਸਾਂ 4-5 ਸਾਲ ਹੀ ਹੋਏ ਹਨ ਪਰ ਉਸ ਉੱਪਰ ਲੱਗੀਆਂ ਪੱਥਰ ਦੀਆ ਟਾਇਲਾਂ ਡਿੱਗਣ ਵੀ ਲੱਗ ਪਈਆਂ ਹਨ | ਬੀਤੇ ਕੱਲ੍ਹ ਦਿਨ ਸਮੇਂ ਡਿੱਗੀਆਂ ਕੁੱਝ ਟਾਇਲਾਂ ਨਾਲ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ ਪਰ ਟਾਇਲਾਂ ਦੇ ਡਿੱਗਣ ਨਾਲ ਦੁਕਾਨਦਾਰ ਦਾ ਪਿਆ ਸਮਾਨ ਟੁੱਟ ਗਿਆ ਹੈ | ਇਸ ਮੌਕੇ ਅੱਡੇ ਦੇ ਦੁਕਾਨਦਾਰਾਂ ਨੇ ਕਿਹਾ ਕਿ ਇਸ ਸਵਾਗਤੀ ਗੇਟ ਉੱਪਰ ਠੇਕੇਦਾਰ ਵਲੋਂ ਲਗਾਇਆ ਗਿਆ ਮੈਟੀਰੀਅਲ ਅੱਤ ਘਟੀਆ ਹੋਣ ਕਾਰਨ ਇੰਨੀਂ ਜਲਦੀ ਟਾਇਲਾਂ ਡਿੱਗਣ ਲੱਗ ਪਈਆਂ ਹਨ | ਉਨ੍ਹਾਂ ਦੱਸਿਆ ਕਿ ਇਸ ਤੋਂ ਪਹਿਲਾਂ ਵੀ ਇਸ ਗੇਟ ਤੋਂ ਇਕ ਵਾਰ ਟਾਇਲਾਂ ਡਿਗ ਚੁੱਕੀਆਂ ਹਨ | ਅਗਰ ਇਹ ਟਾਇਲਾਂ ਡਿੱਗਣ ਦਾ ਸਿਲਸਿਲਾ ਇਸੇ ਤਰਾਂ ਜਾਰੀ ਰਿਹਾ ਤਾਂ ਇਸ ਨਾਲ ਕੋਈ ਵੱਡਾ ਹਾਦਸਾ ਜਾਂ ਜਾਨੀ ਨੁਕਸਾਨ ਵੀ ਹੋ ਸਕਦਾ ਹੈ | ਸਮੂਹ ਦੁਕਾਨਦਾਰਾਂ ਨੇ ਪੰਜਾਬ ਸਰਕਾਰ ਤੋਂ ਮੰਗ ਕੀਤੀ ਹੈ ਇਸ ਗੇਟ ਨੂੰ ਨਵੇਂ ਸਿਰ ਤੋਂ ਮੁਰੰਮਤ ਕਰਵਾ ਕੇ ਠੀਕ ਕੀਤਾ ਜਾਵੇ |
