ਨਵਾਂਸ਼ਹਿਰ, 20 ਨਵੰਬਰ (ਹਰਮਿੰਦਰ ਸਿੰਘ ਪਿੰਟੂ) - ਰੋਟਰੀ ਕਲੱਬ ਵਲੋਂ ਸਥਾਨਕ ਰੋਟਰੀ ਭਵਨ ਵਿਖੇ ਸਮਾਜ ਸੇਵੀ ਅਗਵਾਈ ਨਿਭਾਉਣ ਲਈ ਲੋੜੀਂਦੀ ਯੋਗਤਾ, ਗੁਣਾਂ ਤੇ ਫਰਜ਼ਾਂ ਅਤੇ ਧੰਨਵਾਦ ਦੇ ਅਸਲ ਵਿਵਹਾਰ ਬਾਰੇ ਟ੍ਰੇਨਿੰਗ ਵਰਕਸ਼ਾਪ ਕੀਤੀ ਗਈ | ਰੋਟਰੀ ਕਲੱਬ ਦੇ ਪ੍ਰਧਾਨ ਰੋਟੇਰੀਅਨ ਮੈਡਮ ਰੀਆ ਅਰੋੜਾ, ਰੋਟੇ: ਜੀ. ਐਸ. ਤੂਰ, ਰੋਟੇ: ਗੁਰਚਰਨ ਅਰੋੜਾ ਤੇ ਰੋਟੇ: ਕੁਮਾਰ ਚੰਦਨ ਦੀ ਅਗਵਾਈ ਵਿੱਚ ਹੋਏ ਸਮਾਗਮ ਵਿੱਚ ਵਿਸ਼ੇਸ਼ ਬੁਲਾਰੇ ਡਾ: ਅਜੇ ਬੱਗਾ ਵਲੋਂ ਧੰਨਵਾਦੀ ਵਿਵਹਾਰ ਬਾਰੇ ਵਿਦਵਤਾ ਭਰਪੂਰ ਵਿਚਾਰ ਪੇਸ਼ ਕਰਦਿਆਂ ਦੱਸਿਆ ਕਿ ਧੰਨਵਾਦ ਰਸਮੀ ਸ਼ਬਦਾਂ 'ਤੇ ਅਧਾਰਿਤ ਨਹੀਂ ਹੋਣਾ ਚਾਹੀਦਾ ਬਲਕਿ ਦੋ ਤਰਫਾ ਅਮਲੀ ਧੰਨਵਾਦ ਹੋਣਾ ਚਾਹੀਦਾ ਹੈ | ਉਹਨਾਂ ਧੰਨਵਾਦ ਦੇ ਅਦਾਨ-ਪ੍ਰਦਾਨ ਲਈ ਜਜਬਾਤੀ ਉਦਾਹਰਣਾਂ ਪੇਸ਼ ਕਰਦਿਆਂ ਲੋੜੀਂਦੀ ਧੰਨਵਾਦੀ-ਕਲਾ ਦੀ ਸਾਂਝ ਪਾਈ | ਇਸ ਮੌਕੇ ਸਮਾਜ ਸੇਵੀ ਜੇ.ਐਸ.ਗਿੱਦਾ ਨੇ ਸਮਾਜ ਸੇਵੀ ਲੀਡਰਸ਼ਿਪ, ਯੋਗਤਾ, ਗੁਣਾਂ ਤੇ ਫਰਜ਼ਾਂ ਬਾਰੇ ਵਿਚਾਰ ਪੇਸ਼ ਕਰਦਿਆਂ ਧੀਆਂ ਬਚਾਓ ਲਹਿਰ ਬਾਰੇ ਨਵਾਂਸ਼ਹਿਰ ਮਾਡਲ ਦੀ ਵਿਆਖਿਆ | ਜਿਸ ਦੇ ਸਿੱਟੇ ਵਜੋਂ 775 ਲੜਕੀਆਂ ਪ੍ਰਤੀ ਹਜ਼ਾਰ ਲੜਕੇ ਤੱਕ ਡਿੱਗਿਆ ਲਿੰਗ-ਅਨੁਪਾਤ 962 ਲੜਕੀਆਂ ਪ੍ਰਤੀ ਹਜ਼ਾਰ ਲੜਕੇ ਤੱਕ ਪੁੱਜਾ ਜੋ ਪੰਜਾਬ ਵਿੱਚੋਂ ਅਵੱਲ ਰਿਹਾ | ਸਟੇਜ ਦਾ ਸੰਚਾਲਨ ਜੀ. ਐਸ ਤੂਰ ਨੇ ਨਿਭਾਇਆ | ਰੋਟਰੀ ਕਲੱਬ ਵਲੋਂ ਮਹਿਮਾਨ ਸਖਸ਼ੀਅਤਾਂ ਤੇ ਵਿਸ਼ੇਸ਼ ਬੁਲਾਰਿਆਂ ਡਾ. ਅਜੇ ਬੱਗਾ ਤੇ ਜੇ. ਐਸ ਗਿੱਦਾ ਦਾ ਸਨਮਾਨ ਕੀਤਾ ਗਿਆ | ਰੋਟਰੀ ਕਲੱਬ ਵਲੋਂ ਸ਼ੁੱਧ ਵਾਤਾਵਰਣ ਪ੍ਰਤੀ ਸੰਦੇਸ਼ ਸਾਂਝਾ ਕਰਨ ਲਈ ਰੋਟਰੀ ਭਵਨ ਦੇ ਵਿਹੜੇ ਵਿੱਚ ਫੁੱਲਾਂ ਦੇ ਬੂਟੇ ਲਗਾਏ ਗਏ | ਇਸ ਮੌਕੇ ਪ੍ਰਧਾਨ ਰਿਆ ਅਰੋੜਾ, ਜੀ. ਐਸ. ਤੂਰ, ਕੁਮਾਰ ਚੰਦਨ, ਡਾ. ਦੀਪਇੰਦਰ ਸਿੰਘ ਸੰਧੂ, ਡਾ. ਰਾਵਿੰਦਰ ਕਾਰਾ, ਡਾ: ਅਜੇ ਬੱਗਾ, ਜੇ. ਐਸ ਗਿੱਦਾ, ਪਿ੍ੰਸੀਪਲ ਪ੍ਰਕਾਸ਼ ਕੌਰ, ਸੁਰਿੰਦਰ ਕੌਰ ਤੂਰ, ਡਾ. ਪਵਨ ਕੁਮਾਰ, ਡਾ. ਗੁਰਪਾਲ, ਪ੍ਰੋ: ਅਰੁਣਾ ਪ੍ਰਭਾਕਰ, ਚੰਦਨ ਅਰੋੜਾ, ਵਿਨੋਦ ਜਾਂਗੜਾ, ਦੇਸ ਰਾਜ ਬਾਲੀ, ਸੁਮੀਤ ਗਿੱਲ ਸ਼ਾਮਲ ਸਨ |
