ਗੜ੍ਹਦੀਵਾਲ ਮੇਨ ਰੋਡ 'ਚ ਪੈ ਰਹੇ ਸੀਵਰੇਜ ਦੀ ਸੁਸਤ ਚਾਲ ਕਰਕੇ ਰਾਹਗੀਰ ਪ੍ਰੇਸ਼ਾਨ, ਸੰਬੰਧਿਤ ਮਹਿਕਮਾ ਸੁੱਤਾ ਕੁੰਭਕਰਨੀ ਨੀਂਦ <br/>

ਠੇਕੇਦਾਰ ਵਲੋਂ ਪਿਛਲੇ ਕਰੀਬ 15 ਦਿਨਾਂ ਤੋਂ ਹੌਦੀਆਂ ਬਣਾਉਣ ਦਾ ਅੱਧ-ਵਿਚਾਲੇ ਛੱਡਿਆ ਕੰਮ | ਤਸਵੀਰ : ਗੁਰਾਇਆ <br/> 20-07-2025

ਟਾਂਡਾ ਉੜਮੁੜ, 19 ਜੁਲਾਈ (ਕੁਲਬੀਰ ਸਿੰਘ ਗੁਰਾਇਆ)- ਟਾਂਡਾ ਦੇ ਦਾਰਾਪੁਰ ਬਾਈਪਾਸ ਤੋਂ ਗੜ੍ਹਦੀਵਾਲ ਨੂੰ ਜਾਂਦੀ ਮੇਨ ਰੋਡ 'ਤੇ ਪੈ ਰਹੇ ਸੀਵਰੇਜ ਦੀ ਢਿੱਲੀ ਰਫ਼ਤਾਰ ਕਰਕੇ ਰਾਹਗੀਰਾਂ ਦਾ ਲੰਘਣਾ ਮੁਸ਼ਕਿਲ ਹੋਇਆ ਪਿਆ ਹੈ | ਸਬੰਧਿਤ ਠੇਕੇਦਾਰ ਵਲੋਂ ਸੀਵਰੇਜ ਦੀ ਨਿਕਾਸੀ ਵਾਸਤੇ ਹੌਦੀਆਂ ਬਣਾਉਣ ਲਈ ਥਾਂ-ਥਾਂ ਤੋਂ ਵੱਡੇ-ਵੱਡੇ ਟੋਏ ਪੁੱਟੇ ਹਨ ਜੋ ਕਿ ਕਾਫ਼ੀ ਦਿਨਾਂ ਤੋਂ ਹੀ ਇਸੇ ਤਰ੍ਹਾਂ ਖੁੱਲੇ੍ਹ ਛੱਡੇ ਹਨ ਜਿਸ ਕਰਕੇ ਇੱਥੋਂ ਲੰਘਣਾ ਮੁਸ਼ਕਿਲ ਹੋਇਆ ਪਿਆ ਹੈ ਤੇ ਲੋਕ ਖੱਜਲ ਖ਼ੁਆਰ ਹੋ ਰਹੇ ਹਨ | ਇਨ੍ਹਾਂ ਪੁੱਟੇ ਹੋਏ ਖੁੱਲੇ੍ਹ ਟੋਇਆਂ ਵਿਚ ਕੋਈ ਵੀ ਰਾਹਗੀਰ ਰਾਤ ਵੇਲੇ ਡਿਗ ਕੇ ਆਪਣੀ ਜਾਨ ਗਵਾ ਸਕਦਾ ਹੈ | ਇਸ ਸਬੰਧੀ ਮਹਿਕਮੇ ਦੇ ਅਧਿਕਾਰੀਆਂ ਨੂੰ ਵੀ ਦੱਸਿਆ ਗਿਆ ਪਰ ਉਨ੍ਹਾਂ ਨੇ ਵੀ ਇਸ ਵੱਲ ਕੋਈ ਧਿਆਨ ਨਹੀਂ ਦਿੱਤਾ | ਇਨ੍ਹਾਂ ਹੌਦੀਆਂ ਨੂੰ ਬਣਾਉਣ ਲਈ ਪਹਿਲਾਂ ਬਹੁਤ ਹੀ ਹਲਕੀ ਕਿਸਮ ਦੀਆਂ ਇੱਟਾਂ ਲਿਆਂਦੀਆਂ ਗਈਆਂ ਸਨ ਪਰ ਮਹੱਲਾ ਵਾਸੀਆਂ ਦੇ ਵਿਰੋਧ ਕਰਨ ਤੇ ਹੁਣ ਇਹ ਇੱਟਾਂ ਬਦਲ ਦਿੱਤੀਆਂ ਗਈਆਂ ਹਨ | ਵਰਨਣਯੋਗ ਹੈ ਕਿ ਇਸੇ ਰੋਡ 'ਤੇ ਹਲਕਾ ਵਿਧਾਇਕ ਟਾਂਡਾ ਦੀ ਵੀ ਰਿਹਾਇਸ਼ ਹੈ ਪਰ ਫਿਰ ਵੀ ਪਤਾ ਨਹੀਂ ਕਿਉਂ ਸੰਬੰਧਿਤ ਸੀਵਰੇਜ ਬੋਰਡ ਦੇ ਅਧਿਕਾਰੀ ਇਸ ਵੱਲ ਧਿਆਨ ਨਹੀਂ ਦੇ ਰਹੇ | ਸਬੰਧਿਤ ਮਹਿਕਮੇ ਵਲੋਂ ਆਪਣੇ ਕਿਸੇ ਚਹੇਤੇ ਠੇਕੇਦਾਰ ਨੂੰ ਕੰਮ ਦਿੱਤਾ ਹੋਣ ਕਰਕੇ ਸ਼ਹਿਰ ਵਿਚ ਹੋਰ ਵੀ ਕਈ ਥਾਵਾਂ 'ਤੇ ਉਸ ਕੋਲ ਕੰਮ ਹਨ ਜਿਸ ਕਰਕੇ ਉਸ ਵਲੋਂ ਇਹ ਕੰਮ ਪੂਰਾ ਨਹੀਂ ਹੋ ਰਿਹਾ | ਮਹੱਲਾ ਵਾਸੀਆਂ ਦਾ ਕਹਿਣਾ ਹੈ ਕਿ ਜੇਕਰ ਠੇਕੇਦਾਰ ਕੋਲ ਟਾਈਮ ਨਹੀਂ ਸੀ ਤਾਂ ਉਸ ਨੂੰ ਇਸ ਤਰ੍ਹਾਂ ਇਹ ਰਸਤਾ ਨਹੀਂ ਪੁੱਟਣਾ ਚਾਹੀਦਾ ਸੀ, ਉਨ੍ਹਾਂ ਪ੍ਰਸ਼ਾਸਨ ਅਤੇ ਸਬੰਧਿਤ ਮਹਿਕਮੇ ਦੇ ਅਧਿਕਾਰੀਆਂ ਮੰਗ ਕੀਤੀ ਕਿ ਇਨ੍ਹਾਂ ਟੋਇਆਂ ਨੂੰ ਜਲਦ ਤੋਂ ਜਲਦ ਬਣਾ ਕੇ ਪੂਰਾ ਜਾਵੇ ਤਾਂ ਜੋ ਇੱਥੋਂ ਲੰਘਣ ਵਾਲੇ ਰਾਹਗੀਰਾਂ ਨੂੰ ਕਿਸੇ ਪ੍ਰੇਸ਼ਾਨੀ ਦਾ ਸਾਹਮਣਾ ਨਾ ਕਰਨਾ ਪਵੇ |

ਪਿਛਲੀ ਖ਼ਬਰ ਯੂਥ ਅਕਾਲੀ ਦਲ ਦੇ ਜ਼ਿਲ੍ਹਾ ਪ੍ਰਧਾਨ ਕੰਗ ਨੂੰ ਪੁਲਿਸ ਨੇ ਕੀਤਾ ਨਜ਼ਰਬੰਦ <br/> ਅਗਲੀ ਖ਼ਬਰ ਨਸ਼ੀਲੇ ਪਦਾਰਥਾਂ ਸਮੇਤ 2 ਕਾਬੂ