ਵਿਜੇਵਾੜਾ, 25 ਦਸੰਬਰ (ਇੰਟ.)-ਭਾਰਤ ਨੇ ਬੰਗਾਲ ਦੀ ਖਾੜੀ 'ਚ ਪ੍ਰਮਾਣੂ-ਸ਼ਕਤੀਸ਼ਾਲੀ ਪਣਡੁੱਬੀ ਆਈ. ਐਨ. ਐਸ. ਅਰੀਘਾਟ ਤੋਂ 3500 ਕਿਲੋਮੀਟਰ ਦੀ ਰੇਂਜ ਵਾਲੀ ਕੇ.-4 ਬੈਲਿਸਟਿਕ ਮਿਜ਼ਾਈਲ ਦਾ ਸਫਲਤਾਪੂਰਵਕ ਪ੍ਰੀਖਣ ਕੀਤਾ | ਰੱਖਿਆ ਸੂਤਰਾਂ ਦੇ ਹਵਾਲੇ ਨਾਲ ਮੀਡੀਆ ਰਿਪੋਰਟਾਂ 'ਚ ਕਿਹਾ ਗਿਆ ਕਿ ਇਹ ਪ੍ਰੀਖਣ ਮੰਗਲਵਾਰ ਨੂੰ ਵਿਸ਼ਾਖਾਪਟਨਮ ਤੱਟ ਤੋਂ ਕੀਤਾ ਗਿਆ | ਭਾਰਤ ਹੁਣ ਜ਼ਮੀਨ ਤੇ ਹਵਾ ਦੇ ਨਾਲ-ਨਾਲ ਸਮੁੰਦਰ ਤੋਂ ਵੀ ਪ੍ਰਮਾਣੂ ਹਥਿਆਰ ਲਾਂਚ ਕਰਨ ਦੇ ਯੋਗ ਹੋਵੇਗਾ | ਇਹ ਮਿਜ਼ਾਈਲ 2 ਟਨ ਤੱਕ ਦੇ ਪ੍ਰਮਾਣੂ ਹਥਿਆਰ ਲਿਜਾਣ ਦੇ ਸਮਰੱਥ ਹੈ | ਕੇ. ਲੜੀ ਦੀਆਂ ਮਿਜ਼ਾਈਲਾਂ 'ਚ 'ਕੇ' ਅੱਖਰ ਡਾ. ਏ.ਪੀ.ਜੇ. ਅਬਦੁਲ ਕਲਾਮ ਨੂੰ ਸਮਰਪਿਤ ਹੈ, ਜਿਨ੍ਹਾਂ ਨੇ ਭਾਰਤ ਦੇ ਮਿਜ਼ਾਈਲ ਪ੍ਰੋਗਰਾਮ 'ਚ ਮੁੱਖ ਭੂਮਿਕਾ ਨਿਭਾਈ | ਇਸ ਨੂੰ ਪਣਡੁੱਬੀ ਤੋਂ ਲਾਂਚ ਕਰਨ ਲਈ ਤਿਆਰ ਕੀਤਾ ਗਿਆ ਹੈ | ਇਸ ਨੂੰ ਅਰਿਹੰਤ-ਸ਼੍ਰੇਣੀ ਦੀਆਂ ਪਣਡੁੱਬੀਆਂ ਤੋਂ ਵੀ ਲਾਂਚ ਕੀਤਾ ਜਾ ਸਕਦਾ ਹੈ |
