ਰੌਸ਼ਨੀਆਂ ਦਾ ਹਾਰ ਦੀਵਾਲੀ,
ਸਾਂਝਾਂ ਦਾ ਤਿਉਹਾਰ ਦੀਵਾਲੀ।
ਖੁਸ਼ੀਆਂ-ਖੇੜੇ ਲੈ ਕੇ ਆਵੇ,
ਬੱਚਿਆਂ ਲਈ ਉਪਹਾਰ ਦੀਵਾਲੀ।
ਬਦੀਆਂ ਦਾ ਗ਼ਰਦਾ ਝੜ ਜਾਵੇ ,
ਤਾਂ ਹੋਵੇ ਸਾਕਾਰ ਦੀਵਾਲੀ ।
ਧੀ ਲਛਮੀ ਦੀ ਹੋਵੇ ਪੂਜਾ,
ਬਣੇ ਨਾ ਸਿਰ ਦਾ ਭਾਰ ਦੀਵਾਲੀ।
ਪਰਦੇਸੀ ਧੀ-ਪੁੱਤਰਾਂ ਦੇ
ਪਰਤਣ ਦਾ ਇਕਰਾਰ ਦੀਵਾਲੀ।
ਚਿਰੀਂ-ਵਿਛੁੱਨੇ ਸੱਜਣਾਂ ਦੇ ਗਲ਼
ਮਿਲਣੇ ਦਾ ਇਤਬਾਰ ਦੀਵਾਲੀ।
ਬਲ਼ੇ ਬਨੇਰੇ ਮੋਹ ਦਾ ਦੀਪਕ,
ਔਰਤ ਦਾ ਸਤਿਕਾਰ ਦੀਵਾਲੀ।
ਨੌਕਰ ਤੇ ਮਾਲਕ ਦੋਵਾਂ ਲਈ,
ਹੋ ਜਾਵੇ ਇਕਸਾਰ ਦੀਵਾਲੀ ।
ਪ੍ਰਦੂਸ਼ਣ ਨਾ ਸ਼ੋਰ ਵਧਾਵੇ,
ਬਣੇ ਨਾ ਹਾਹਾਕਾਰ ਦੀਵਾਲੀ.
ਫੁੱਲ ਸਿਆਲ਼ੀ, ਬੂਟੇ ਲਾਵੋ,
ਖਿੜੇ-ਪੁੜੇ ਗ਼ੁਲਜ਼ਾਰ ਦੀਵਾਲੀ।
ਬਣੀ ਰਹੇ ਜੇ ਪਾਕਿ-ਪਵਿੱਤਰ
ਤਾਂ ਤੇ ਵਾਹਵਾਕਾਰ ਦੀਵਾਲੀ।
ਚਾਨਣ ਦਾ ਛੱਟਾ ਦੇ ਜਾਵੇ,
ਮਨ ਦੇ ਅੰਦਰਵਾਰ ਦੀਵਾਲੀ।
-ਮੋਬਾਈਲ: 98727-65490
