ਆਈ ਵਿਸਾਖੀ

* ਡਾ: ਸਰਬਜੀਤ ਕੌਰ ਸੰਧਾਵਾਲੀਆ *
ਰਾਂਗਲਾ ਵਿਸਾਖੀ ਦਾ ਦਿਹਾੜਾ ਆ ਗਿਆ,
ਸਾਰੀ ਕਾਇਨਾਤ 'ਤੇ ਹੁਲਾਸ ਛਾ ਗਿਆ।
ਬਾਜਾਂ ਵਾਲੇ ਇਸੇ ਦਿਨ ਪੰਥ ਸਾਜਿਆ,
ਪੁੱਤਰ ਬਣਾ ਕੇ ਖ਼ਾਲਸਾ ਨਿਵਾਜਿਆ।
ਬਾਬਲੇ ਦੇ ਪ੍ਰੇਮ ਦਾ ਖੁਮਾਰ ਛਾ ਗਿਆ,
ਰਾਂਗਲਾ ਵਿਸਾਖੀ...........।
ਸੋਨੇ ਰੰਗੀ ਚੁੰਨੀ ਲੈ ਜ਼ਮੀਨ ਹੱਸਦੀ,
ਪੈਲੀਆਂ ਦੇ ਵਿਚ ਹੈ ਬਹਾਰ ਨੱਚਦੀ।
ਪੱਤੀ-ਪੱਤੀ ਉੱਤੇ ਹੈ ਅਨੰਦ ਛਾ ਗਿਆ,
ਰਾਂਗਲਾ ਵਿਸਾਖੀ...........।
ਗੂੰਜਦਾ ਸੰਗੀਤ ਕਿਤੇ ਢੋਲ ਵੱਜਦੇ,
ਗੱਭਰੂ ਛਬੀਲੇ ਪਿੜਾਂ ਵਿਚ ਗੱਜਦੇ।
ਖੁਸ਼ੀਆਂ ਤੇ ਖੇੜਿਆਂ ਦਾ ਰੰਗ ਛਾ ਗਿਆ,
ਰਾਂਗਲਾ ਵਿਸਾਖੀ............।
ਬਾਗਾਂ ਵਿਚ ਮੋਰ ਤੇ ਬਬੀਹੇ ਬੋਲਦੇ,
ਗੀਤ ਨਾਦ ਕੰਨਾਂ ਵਿਚ ਰਸ ਘੋਲਦੇ।
ਬੇਲਿਆਂ ਦੇ ਵਿਚ ਵੀ ਸਰੂਰ ਛਾ ਗਿਆ,
ਰਾਂਗਲਾ ਵਿਸਾਖੀ............।
ਜ਼ਿੰਦਗੀ ਨੂੰ ਪਿਆ ਆਸਾਂ ਵਾਲਾ ਬੂਰ ਹੈ,
ਹਰ ਪਾਸੇ ਦਿਸੇ ਇਕ ਰੱਬੀ ਨੂਰ ਹੈ।
ਹਿਰਦੇ ਦਾ ਬੂਹਾ ਕੋਈ ਖੜਕਾ ਗਿਆ,
ਰਾਂਗਲਾ ਵਿਸਾਖੀ ਦਾ ਦਿਹਾੜਾ ਆ ਗਿਆ।