ਅਮਰੀਕਾ ’ ਚ ਮਿਲਨਰ ਸ਼ਹਿਰ ਦੀ ਪੁਲਿਸ ਵਲੋਂ ਅਸਤੀਫ਼ੇ ਮੇਅਰ ਉਤੇ ਪੁਲਿਸ ਮੁਖੀ ਦੀ ਜਾਸੂਸੀ ਕਰਨ ਦੇ ਦੋਸ਼

ਅ

ਅਜੀਤ ਡੈਸਕ 23-10-2026

ਨਿਊਯਾਰਕ, 22 ਅਕਤੂਬਰ (ਰਾਜੂ ਸ਼ਹਿਬਾਜ਼ਪੁਰਾ)-ਅਮਰੀਕਾ ਦੇ ਜਾਰਜੀਆ ਸੂਬੇ ਦੇ ਮਿਲਨਰ ਸ਼ਹਿਰ ਵਿਚ ਮੇਅਰ ਅਤੇ ਪੁਲਿਸ ਮੁਖੀ ਵਿਚਾਲੇ ਵਿਵਾਦ ਕਾਰਨ ਪੂਰੇ ਪੁਲਿਸ ਵਿਭਾਗ ਨੇ ਅਸਤੀਫ਼ੇ ਦੇ ਦਿੱਤੇ ਹਨ। ਪੁਲਿਸ ਮੁਖੀ ਲਾਮਾਰ ਬੰਨ ਸਮੇਤ ਪੰਜ ਪੱਕੇ ਪੁਲਿਸ ਮੁਲਾਜ਼ਮਾਂ ਅਤੇ ਕਈ ਸਹਾਇਕ ਅਧਿਕਾਰੀਆਂ ਨੇ ਨੌਕਰੀ ਛੱਡਣ ਦਾ ਫ਼ੈਸਲਾ ਕੀਤਾ ਹੈ। ਸ਼ਹਿਰ ਦੀ ਪ੍ਰਬੰਧਕ ਤੌਸ਼ਾ ਗਰੋਜ਼ ਨੇ ਵੀ ਅਸਤੀਫ਼ਾ ਦੇ ਦਿੱਤਾ ਹੈ। ਪੁਲਿਸ ਮੁਖੀ ਲਾਮਾਰ ਬੰਨ ਨੇ ਮੇਅਰ ਕਰੇਗ ਟਿਮਨਜ਼ ਉਤੇ ਦੋਸ਼ ਲਗਾਇਆ ਹੈ ਕਿ ਉਨ੍ਹਾਂ ਨੇ ਬਿਨਾਂ ਇਜਾਜ਼ਤ ਉਸ ਦੀ ਨਿੱਜੀ ਗੱਡੀ ਵਿਚ ਨਿਗਰਾਨੀ ਕਰਨ ਵਾਲਾ ਯੰਤਰ ਲਗਾਇਆ ਅਤੇ ਨਗਰ ਭਵਨ ਦੇ ਕੈਮਰਿਆਂ ਰਾਹੀਂ ਵੀ ਉਸ ਉਤੇ ਨਜ਼ਰ ਰੱਖੀ। ਬੰਨ ਮੁਤਾਬਕ ਇਸ ਘਟਨਾ ਕਾਰਨ ਉਨ੍ਹਾਂ ਦਾ ਮੇਅਰ ਅਤੇ ਨਗਰ ਕੌਂਸਲ ਤੋਂ ਭਰੋਸਾ ਉੱਠ ਗਿਆ ਹੈ। ਉਹ ਕਾਨੂੰਨੀ ਕਾਰਵਾਈ ਬਾਰੇ ਵੀ ਵਿਚਾਰ ਕਰ ਰਹੇ ਹਨ। ਨਗਰ ਕੌਂਸਲ ਦੀ ਮੀਟਿੰਗ ਦੌਰਾਨ ਬੰਨ ਨੇ ਕਿਹਾ ਕਿ ਬਾਕੀ ਪੁਲਿਸ ਮੁਲਾਜ਼ਮਾਂ ਨੇ ਅਸਤੀਫ਼ੇ ਆਪਣੀ ਮਰਜ਼ੀ ਨਾਲ ਦਿੱਤੇ ਹਨ। ਦੂਜੇ ਪਾਸੇ, ਮੇਅਰ ਨੇ ਅਸਤੀਫ਼ਿਆਂ ਉਤੇ ਅਫ਼ਸੋਸ ਪ੍ਰਗਟ ਕੀਤਾ ਪਰ ਨਿਗਰਾਨੀ ਦੇ ਦੋਸ਼ਾਂ ਬਾਰੇ ਕੋਈ ਸਪੱਸ਼ਟ ਜਵਾਬ ਨਹੀਂ ਦਿੱਤਾ।ਪੁਲਿਸ ਮੁਲਾਜ਼ਮ 28 ਅਕਤੂਬਰ ਅਤੇ ਸ਼ਹਿਰ ਦੀ ਪ੍ਰਬੰਧਕ 30 ਅਕਤੂਬਰ ਤੱਕ ਆਪਣੀਆਂ ਜ਼ਿੰਮੇਵਾਰੀਆਂ ਨਿਭਾਉਣਗੇ। ਇਸ ਤੋਂ ਬਾਅਦ ਕਾਨੂੰਨ ਵਿਵਸਥਾ ਦੀ ਜ਼ਿੰਮੇਵਾਰੀ ਲਾਮਾਰ ਕਾਊਂਟੀ ਦੇ ਸ਼ੈਰਿਫ਼ ਦਫ਼ਤਰ ਵਲੋਂ ਸੰਭਾਲੇ ਜਾਣ ਦੀ ਉਮੀਦ ਹੈ।ਐਟਲਾਂਟਾ ਤੋਂ ਕਰੀਬ 45 ਮੀਲ ਦੂਰ ਸਥਿਤ ਮਿਲਨਰ ਦੀ ਆਬਾਦੀ ਇਕ ਹਜ਼ਾਰ ਤੋਂ ਘੱਟ ਹੈ। ਪੂਰੀ ਪੁਲਿਸ ਫੋਰਸ ਦੇ ਅਸਤੀਫ਼ਿਆਂ ਮਗਰੋਂ ਸ਼ਹਿਰ ਦੇ ਪ੍ਰਸ਼ਾਸਨਿਕ ਅਤੇ ਸੁਰੱਖਿਆ ਪ੍ਰਬੰਧਾਂ ਬਾਰੇ ਸਵਾਲ ਖੜ੍ਹੇ ਹੋ ਗਏ ਹਨ। ਫਿਲਹਾਲ ਮੇਅਰ ਉਤੇ ਲੱਗੇ ਦੋਸ਼ਾਂ ਦੀ ਪੁਸ਼ਟੀ ਨਹੀਂ ਹੋਈ।

ਪਿਛਲੀ ਖ਼ਬਰ ਭਾਰਤੀ ਮਿਆਰ ਬਿਊਰੋ ਵਲੋਂ ਗਹਿਣਿਆਂ ਦੇ ਇਕ ਵਪਾਰਕ ਅਦਾਰੇ ’ਤੇ ਵੱਡੀ ਕਾਰਵਾਈ ਅਗਲੀ ਖ਼ਬਰ ਅਮਰੀਕਾ ’ ਚ ਫਰਜ਼ੀ ਵਿਆਹਾਂ ਰਾਹੀਂ ਗ੍ਰੀਨ ਕਾਰਡ ਦਿਵਾਉਣ ਦਾ 60 ਲੱਖ ਡਾਲਰ ਦਾ ਧੰਦਾ ਬੇਨਕਾਬ , 6 ਖ਼ਿਲਾਫ਼ ਕੇਸ ਦਰਜ