ਨਵੀਂ ਦਿੱਲੀ, 8 ਸਤੰਬਰ (ਪੀ.ਟੀ.ਆਈ.)-ਦਿੱਲੀ ਦੇ ਸਤਿਆ ਨਿਕੇਤਨ ਵਿਚ ਪੀ.ਜੀ. ਰਿਹਾਇਸ਼ ਦੀ ਇਮਾਰਤ ਢਹਿਣ ਦੇ ਮਾਮਲੇ ਵਿਚ ਪੁਲਿਸ ਨੇ ਉੱਤਰ ਪ੍ਰਦੇਸ਼ ਦੇ ਕਾਸਗੰਜ ਤੋਂ ਇੱਕ ਲੇਬਰ ਠੇਕੇਦਾਰ ਨੂੰ ਹਿਰਾਸਤ ਵਿਚ ਲਿਆ ਹੈ, ਜੋ ਇਮਾਰਤ ’ਚ ਕੰਮ ਕਰਵਾ ਰਿਹਾ ਸੀ। ਪੁਲਿਸ ਨੇ ਮੰਗਲਵਾਰ ਨੂੰ ਦੱਸਿਆ ਕਿ ਠੇਕੇਦਾਰ ਸਨੋਜ ਇਮਾਰਤ ਵਿਚ ਚੱਲ ਰਹੇ ਉਸਾਰੀ ਅਤੇ ਮੁਰੰਮਤ ਦੇ ਕੰਮ ਦੀ ਜਾਂਚ ਦੇ ਸਿਲਸਿਲੇ ਵਿਚ ਪੁੱਛਗਿੱਛ ਲਈ ਦਿੱਲੀ ਆ ਰਿਹਾ ਸੀ। ਪੁਲਿਸ ਮੁਤਾਬਿਕ ਪਿਛਲੇ 8 ਤੋਂ 10 ਦਿਨਾਂ ਤੋਂ ਇਮਾਰਤ ਦੇ ਬੇਸਮੈਂਟ ਵਿਚ ਮੁਰੰਮਤ ਦਾ ਕੰਮ ਚੱਲ ਰਿਹਾ ਸੀ, ਕਿਉਂਕਿ ਕਈ ਦਿਨਾਂ ਦੀ ਬਾਰਿਸ਼ ਕਾਰਨ ਉਥੇ ਕੂੜਾ ਅਤੇ ਪਾਣੀ ਇਕੱਠਾ ਹੋ ਗਿਆ ਸੀ। ਕਥਿਤ ਤੌਰ ’ਤੇ ਵਪਾਰਕ ਉਦੇਸ਼ਾਂ ਲਈ ਵਿਸਥਾਰ ਕਰਨ ਵਾਸਤੇ ਗਰਾਊਂਡ ਫਲੋਰ ’ਤੇ ਵੀ ਮੁਰੰਮਤ ਦਾ ਕੰਮ ਚੱਲ ਰਿਹਾ ਸੀ। ਐਫ.ਆਈ.ਆਰ. ਵਿਚ ਕਿਹਾ ਗਿਆ ਹੈ ਕਿ ਨਵੀਂ ਉਸਾਰੀ ਕਾਰਨ ਇਮਾਰਤ ਦੇ ਢਾਂਚੇ ’ਤੇ ਵਾਧੂ ਦਬਾਅ ਪਿਆ।ਪੁਲਿਸ ਨੇ ਦੋਸ਼ ਲਗਾਇਆ ਹੈ ਕਿ ਮਾਲਕਾਂ ਨੂੰ ਪਤਾ ਸੀ ਕਿ ਇਮਾਰਤ ਦੀ ਮੌਜੂਦਾ ਨੀਂਹ ਵਾਧੂ ਭਾਰ ਝੱਲਣ ਦੇ ਯੋਗ ਨਹੀਂ ਸੀ। ਜਾਂਚ ਦੌਰਾਨ ਇਮਾਰਤ ਦੇ ਵਸਨੀਕਾਂ ਨਾਲ ਕੀਤੇ ਕਿਰਾਇਆ ਸਮਝੌਤੇ ਦੀ ਸ਼ਰਤ ਵੀ ਜਾਂਚ ਦੇ ਘੇਰੇ ਵਿਚ ਆ ਗਈ ਹੈ।
