ਦੀਵਾਲੀ ਤੋਂ 10 ਦਿਨ ਪਹਿਲਾਂ ਹੀ ਜਗਰਾਉਂ ’ਚ ਕੁਝ ਹਲਵਾਈਆਂ ਵਲੋਂ ਗੈਰਮਿਆਰੀ ਮਠਿਆਈਆਂ ਸਟੋਰ ਕਰਨ ਦੇ ਚਰਚੇ, ਸਿਹਤ ਵਿਭਾਗ ਕੁੰਭਕਰਨੀ ਨੀਂਦ ਸੁੱਤਾ
ਕੋਲਡ ਸਟੋਰਾਂ ਵਿਚ ਸਸਤੀਆਂ ਮਠਿਆਈਆਂ ਜਮ੍ਹਾਂ ਹੋਣ ਲੱਗੀਆਂ
ਜਗਰਾਉਂ, 28 ਅਕਤੂਬਰ (ਗੁਰਦੀਪ ਸਿੰਘ ਮਲਕ) ਤਿਉਹਾਰਾਂ ਦਾ ਸੀਜ਼ਨ ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਜਗਰਾਉਂ ਵਿਚ ਮਠਿਆਈਆਂ ਦੀ ਗੁਣਵੱਤਾ ’ਤੇ ਸਵਾਲ ਉੱਠਣ ਲੱਗ ਪਏ ਹਨ। ਇਕ ਪਾਸੇ ਛੋਟੇ ਹਲਵਾਈਆਂ ਤੋਂ ਲੈ ਕੇ ਵੱਡੇ ਮਿਠਾਈ ਕਾਰੋਬਾਰੀਆਂ ਤੱਕ ਨੇ ਤਿਆਰੀਆਂ ਸ਼ੁਰੂ ਕਰ ਦਿੱਤੀਆਂ ਹਨ, ਦੂਜੇ ਪਾਸੇ ਸ਼ਹਿਰ ਅਤੇ ਆਸਪਾਸ ਦੇ ਪਿੰਡਾਂ ਵਿਚ ਕਥਿਤ ਤੌਰ ’ਤੇ ਨਕਲੀ ਖੋਆ, ਪਨੀਰ ਅਤੇ ਸਸਤੀਆਂ ਮਠਿਆਈਆਂ ਦੀ ਸਪਲਾਈ ਹੋਣ ਦੀ ਗੱਲ ਸਾਹਮਣੇ ਆ ਰਹੀ ਹੈ।
ਜਗਰਾਉਂ, 28 ਅਕਤੂਬਰ (ਗੁਰਦੀਪ ਸਿੰਘ ਮਲਕ) ਤਿਉਹਾਰਾਂ ਦਾ ਸੀਜ਼ਨ ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਜਗਰਾਉਂ ਵਿਚ ਮਠਿਆਈਆਂ ਦੀ ਗੁਣਵੱਤਾ ’ਤੇ ਸਵਾਲ ਉੱਠਣ ਲੱਗ ਪਏ ਹਨ। ਇਕ ਪਾਸੇ ਛੋਟੇ ਹਲਵਾਈਆਂ ਤੋਂ ਲੈ ਕੇ ਵੱਡੇ ਮਿਠਾਈ ਕਾਰੋਬਾਰੀਆਂ ਤੱਕ ਨੇ ਤਿਆਰੀਆਂ ਸ਼ੁਰੂ ਕਰ ਦਿੱਤੀਆਂ ਹਨ, ਦੂਜੇ ਪਾਸੇ ਸ਼ਹਿਰ ਅਤੇ ਆਸਪਾਸ ਦੇ ਪਿੰਡਾਂ ਵਿਚ ਕਥਿਤ ਤੌਰ ’ਤੇ ਨਕਲੀ ਖੋਆ, ਪਨੀਰ ਅਤੇ ਸਸਤੀਆਂ ਮਠਿਆਈਆਂ ਦੀ ਸਪਲਾਈ ਹੋਣ ਦੀ ਗੱਲ ਸਾਹਮਣੇ ਆ ਰਹੀ ਹੈ। ਸੂਤਰਾਂ ਦਾ ਦਾਅਵਾ ਹੈ ਕਿ ਛੋਟਾ ਹਾਥੀ ਅਤੇ ਮਾਡੀਫਾਈਡ ਮਾਰੂਤੀ ਵੈਨ ਰਾਹੀਂ ਬਾਹਰੋਂ ਮਠਿਆਈਆਂ ਲਿਆ ਕੇ ਸ਼ਹਿਰ ਦੇ ਹਲਵਾਈਆਂ ਨੂੰ ਸਪਲਾਈ ਕੀਤੀਆਂ ਜਾ ਰਹੀਆਂ ਹਨ। ਇਨ੍ਹਾਂ ਮਠਿਆਈਆਂ ਦੇ ਦੱਸੇ ਜਾ ਰਹੇ ਰੇਟ ਕਾਫ਼ੀ ਘੱਟ ਹਨ, ਜਿਸ ਕਾਰਨ ਉਨ੍ਹਾਂ ਦੀ ਗੁਣਵੱਤਾ ਅਤੇ ਵਰਤੀ ਗਈ ਸਮੱਗਰੀ ’ਤੇ ਸਵਾਲ ਖੜ੍ਹੇ ਹੋ ਰਹੇ ਹਨ। ਦੂਜੇ ਪਾਸੇ ਮੌਸਮ ਵਿਚ ਬਦਲਾਅ ਅਤੇ ਠੰਢ ਦੀ ਸ਼ੁਰੂਆਤ ਦੇ ਵਿਚਕਾਰ ਕੁਝ ਹਲਵਾਈਆਂ ਨੇ ਤਿਆਰ ਮਠਿਆਈਆਂ ਨੂੰ ਖ਼ਰਾਬ ਹੋਣ ਤੋਂ ਬਚਾਉਣ ਲਈ ਕੋਲਡ ਸਟੋਰ ਵਿਚ ਰੱਖਣਾ ਸ਼ੁਰੂ ਕਰ ਦਿੱਤਾ ਹੈ।ਜਾਣਕਾਰੀ ਮੁਤਾਬਕ ਕੁਝ ਕਾਰੋਬਾਰੀ ਤਿਆਰ ਮਿਠਾਈਆਂ ਦੀ ਬਜਾਏ ਕੱਚਾ ਖੋਆ ਅਤੇ ਭੁੰਨੀ ਹੋਈ ਗਾਜਰ ਵੀ ਕੋਲਡ ਸਟੋਰ ਵਿਚ ਰੱਖ ਰਹੇ ਹਨ ਤਾਂ ਜੋ ਤਿਉਹਾਰ ਤੋਂ ਦੋ-ਤਿੰਨ ਦਿਨ ਪਹਿਲਾਂ ਇਨ੍ਹਾਂ ਨੂੰ ਕੱਢ ਕੇ ਮਠਿਆਈਆਂ ਤਿਆਰ ਕੀਤੀਆਂ ਜਾ ਸਕਣ। ਕੋਲਡ ਸਟੋਰ ਵਿਚ ਖਾਣ-ਪੀਣ ਦਾ ਸਮਾਨ ਰੱਖਣਾ ਆਪਣੇ ਆਪ ਵਿਚ ਗ਼ਲਤ ਨਹੀਂ ਹੈ, ਪਰ ਇਸ ਦਾ ਸੁਰੱਖਿਅਤ ਤਾਪਮਾਨ ਅਤੇ ਉਚਿਤ ਭੰਡਾਰਨ ਯਕੀਨੀ ਬਣਾਉਣਾ ਜ਼ਰੂਰੀ ਹੈ।ਸੂਤਰਾਂ ਮੁਤਾਬਕ ਛੋਟਾ ਹਾਥੀ ਚਲਾਉਣ ਵਾਲਾ ਇਕ ਵਿਅਕਤੀ ਮੁੱਲਾਪੁਰ ਦਾਖਾ ਖੇਤਰ ਤੋਂ ਜਗਰਾਉਂ ਆ ਕੇ ਸ਼ਹਿਰ ਤੋਂ ਇਲਾਵਾ ਆਸਪਾਸ ਦੇ ਪਿੰਡਾਂ ਵਿਚ ਵੀ ਕਥਿਤ ਤੌਰ ’ਤੇ ਖੋਆ, ਪਨੀਰ ਅਤੇ ਮਠਿਆਈਆਂ ਸਪਲਾਈ ਕਰਦਾ ਹੈ। ਉੱਥੇ ਹੀ ਇਕ ਮਾਡੀਫਾਈਡ ਮਾਰੂਤੀ ਵੈਨ ਰਾਹੀਂ ਵੀ ਮਠਿਆਈਆਂ ਪਹੁੰਚਾਏ ਜਾਣ ਦੀ ਚਰਚਾ ਹੈ। ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਵੈਨ ਨਾਲ ਜੁੜੇ ਵਿਅਕਤੀ ਦਾ ਚੌਕੀਮਾਨ ਦੇ ਨੇੜੇ ਇਕ ਗੋਦਾਮ ਵੀ ਹੈ ਅਤੇ ਪੁਲੀਸ ਸੰਬੰਧਿਤ ਗਤੀਵਿਧੀਆਂ ਦੀ ਜਾਂਚ ਲਈ ਯਤਨ ਕਰ ਰਹੀ ਹੈ। ਸੂਤਰਾਂ ਦਾ ਕਹਿਣਾ ਹੈ ਕਿ ਹੁਸ਼ਿਆਰਪੁਰ, ਮੁਕੇਰੀਆਂ, ਟਾਂਡਾ ਅਤੇ ਜਲੰਧਰ ਦੇ ਖੇਤਰਾਂ ਤੋਂ ਸਸਤੇ ਭਾਅ ’ਤੇ ਮਠਿਆਈਆਂ ਲਿਆ ਕੇ ਜਗਰਾਉਂ ਵਿਚ ਸਪਲਾਈ ਕੀਤੇ ਜਾਣ ਦੀ ਸੰਭਾਵਨਾ ਹੈ। ਇਸ ਲਈ ਇਹ ਜਾਂਚ ਜ਼ਰੂਰੀ ਹੈ ਕਿ ਮਠਿਆਈਆਂ ਕਿੱਥੇ ਤਿਆਰ ਹੁੰਦੀਆਂ ਹਨ, ਉਨ੍ਹਾਂ ਵਿਚ ਵਰਤੀ ਜਾਣ ਵਾਲੀ ਸਮੱਗਰੀ ਦੀ ਗੁਣਵੱਤਾ ਕੀ ਹੈ ਅਤੇ ਉਨ੍ਹਾਂ ਦੀ ਸਪਲਾਈ ਕਿਹੜੀਆਂ ਦੁਕਾਨਾਂ ਤੱਕ ਕੀਤੀ ਜਾ ਰਹੀ ਹੈ। 85 ਤੋਂ 175 ਰੁਪਏ ਕਿੱਲੋ ਤੱਕ ਮਠਿਆਈਆਂ ਵੇਚਣ ਦੀ ਚਰਚਾ ਕਥਿਤ ਸਪਲਾਈ ਨਾਲ ਜੁੜੇ ਸੂਤਰਾਂ ਨੇ ਮਠਿਆਈਆਂ ਦੇ ਜੋ ਦਾਮ ਦੱਸੇ ਹਨ, ਉਹ ਵੀ ਜਾਂਚ ਦਾ ਵਿਸ਼ਾ ਹਨ। ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਮਿਲਕ ਕੇਕ ਕਰੀਬ 175 ਰੁਪਏ ਕਿੱਲੋ, ਗੁਲਾਬ ਜਾਮੁਨ ਅਤੇ ਰਸਗੁੱਲੇ 100 ਰੁਪਏ ਕਿੱਲੋ, ਲੱਡੂ 90 ਰੁਪਏ ਕਿੱਲੋ ਤੇ ਸੋਹਨ ਪੱਪੜੀ (ਪਤੀਸਾ) 85 ਰੁਪਏ ਕਿੱਲੋ, ਖੋਆ 210 ਰੁਪਏ ਕਿੱਲੋ ਅਤੇ ਬਰਫ਼ੀ 140 ਰੁਪਏ ਕਿੱਲੋ ਦੁਕਾਨਦਾਰਾਂ ਨੂੰ ਸਪਲਾਈ ਹੋ ਰਹੀ ਹੈ। ਦੁਕਾਨਦਾਰਾਂ ਨੂੰ ਸਪਲਾਈ ਹੋਣ ਵਾਲੇ 10 ਕਿੱਲੋ ਦੇ ਗੱਤੇ ਦੇ ਡੱਬੇ ਦੀ ਪੈਕਿੰਗ ਵਿਚ ਹੈ। ਸਾਰੀਆਂ ਮਠਿਆਈਆਂ ਲਈ ਵੱਖ-ਵੱਖ ਰੰਗ ਦੇ ਡੱਬੇ ਬਣਾਏ ਗਏ ਹਨ। ਇਨ੍ਹਾਂ ਕੀਮਤਾਂ ਦੇ ਆਧਾਰ ’ਤੇ ਮਠਿਆਈਆਂ ਦੀ ਗੁਣਵੱਤਾ ’ਤੇ ਸਵਾਲ ਉਠਾਏ ਜਾ ਰਹੇ ਹਨ। ਸੂਤਰਾਂ ਦਾ ਇਹ ਵੀ ਦਾਅਵਾ ਹੈ ਕਿ ਗੁਲਾਬ, ਜਾਮੁਨ ਅਤੇ ਰਸਗੁੱਲੇ ਸਪਲਾਈ ਕਰਨ ਵਾਲੇ ਕੁਝ ਲੋਕ ਬਚੀ ਹੋਈ ਚਾਸ਼ਨੀ ਤੱਕ ਵਾਪਸ ਲੈਣ ਦੀ ਗੱਲ ਕਰਦੇ ਹਨ। ਇਹ ਮਠਿਆਈਆਂ ਪੀਪਿਆਂ ਵਿਚ ਭਰ ਕੇ ਵੇਚੇ ਜਾਣ ਦੀ ਚਰਚਾ ਹੈ। ਇਸ ਲਈ ਇਹ ਜਾਂਚਨਾ ਜ਼ਰੂਰੀ ਹੈ ਕਿ ਚਾਸ਼ਨੀ ਨੂੰ ਕਿਸ ਸਥਿਤੀ ਵਿਚ ਵਾਪਸ ਲਿਆ ਜਾਂਦਾ ਹੈ ਅਤੇ ਕੀ ਉਸ ਦਾ ਦੁਬਾਰਾ ਇਸਤੇਮਾਲ ਕੀਤਾ ਜਾਂਦਾ ਹੈ। ਖਾਣ-ਪੀਣ ਦੀ ਸਮੱਗਰੀ ਦਾ ਅਸੁਰੱਖਿਅਤ ਤਰੀਕੇ ਨਾਲ ਮੁੜ ਇਸਤੇਮਾਲ ਖ਼ਪਤਕਾਰਾਂ ਦੀ ਸਿਹਤ ਲਈ ਖ਼ਤਰਾ ਪੈਦਾ ਕਰ ਸਕਦਾ ਹੈ। ਤਿਉਹਾਰਾਂ ਦੌਰਾਨ ਮਠਿਆਈਆਂ ਦੀ ਮੰਗ ਵਧਣ ਕਾਰਨ ਖ਼ਾਦ ਸੁਰੱਖਿਆ ਵਿਭਾਗ ਦੀ ਜ਼ਿੰਮੇਵਾਰੀ ਵੀ ਵੱਧ ਜਾਂਦੀ ਹੈ। ਸ਼ਹਿਰ ਵਿਚ ਜੇਕਰ ਬਾਹਰੋਂ ਸ਼ੱਕੀ ਮਠਿਆਈਆਂ, ਖੋਆ ਅਤੇ ਪਨੀਰ ਲਿਆ ਕੇ ਵੇਚੇ ਜਾਣ ਦੀਆਂ ਸ਼ਿਕਾਇਤਾਂ ਮਿਲ ਰਹੀਆਂ ਹਨ ਤਾਂ ਵਿਭਾਗ ਨੂੰ ਦੁਕਾਨਾਂ, ਗੋਦਾਮਾਂ ਅਤੇ ਸਪਲਾਈ ਨਾਲ ਜੁੜੇ ਟਿਕਾਣਿਆਂ ਦੀ ਜਾਂਚ ਕਰਨੀ ਚਾਹੀਦੀ ਹੈ। ਮਿਠਾਈਆਂ ਦੇ ਨਮੂਨੇ ਲੈ ਕੇ ਉਨ੍ਹਾਂ ਦੀ ਗੁਣਵੱਤਾ ਦੀ ਜਾਂਚ ਕਰਵਾਉਣਾ ਅਤੇ ਖ਼ਾਦ ਸੁਰੱਖਿਆ ਮਾਪਦੰਡਾਂ ਦੀ ਪਾਲਣਾ ਯਕੀਨੀ ਬਣਾਉਣਾ ਜ਼ਰੂਰੀ ਹੈ, ਪਰ ਸਿਹਤ ਵਿਭਾਗ ਪਤਾ ਨੀ ਕਿਹੜੀ ਕੁੰਭਕਰਨੀ ਨੀਂਦ ਵਿਚ ਸੁੱਤਾ ਹੈ। ਜਗਰਾਉਂ ਦੇ ਇਕ ਹਲਵਾਈ ਨੇ ਆਪਣਾ ਨਾਮ ਗੁਪਤ ਰੱਖਣ ਦੀ ਸ਼ਰਤ ’ਤੇ ਦੱਸਿਆ ਕਿ ਜਗਰਾਉਂ ਸ਼ਹਿਰ ਦੇ ਕੁਝ ਅਜਿਹੇ ਹਲਵਾਈਆਂ ਦੇ ਉਹ ਟਿਕਾਣਿਆਂ ਦੀ ਪੂਰੀ ਜਾਣਕਾਰੀ ਹੈ, ਜਿਥੇ ਉਹ ਮਠਿਆਈਆਂ ਤਿਆਰ ਅਤੇ ਦਿਵਾਲੀ ਤੋਂ ਪਹਿਲਾ ਸਟੋਰ ਕਰਦੇ ਹਨ। ਜਿਸ ਨੂੰ ਉਹ ਜਲਦੀ ਜਨਥਕ ਕਰਨਗੇ। ਉਨ੍ਹਾਂ ਕਿਹਾ ਕਿ ਹਲਵਾਈਆਂ ਵਲੋਂ ਯੂਨੀਅਨ ਬਣਾ ਰੱਖੀ ਹੈ, ਜੋ ਸ਼ਹਿਰ ਦੇ ਸਾਰੇ ਹਲਵਾਈਆਂ ਤੋਂ ਪੈਸਾ ਇਕੱਤਰ ਕਰਦੇ ਹਨ। ਉਸ ਪੈਸੇ ਦੀ ਵੱਖ ਵੱਖ ਵਿਭਾਗਾਂ ਨੂੰ ਸੀਜਨ ਦੌਰਾਨ ਅੱਖਾਂ ਬੰਦ ਰੱਖਣ ਲੲਈ ਵਰਤੋਂ ਕੀਤੀ ਜਾਂਦੀ ਹੈ। ਉਨ੍ਹਾਂ ਦੱਸਿਆਂ ਕਿ ਕਿਸ ਤਰੀਕੇ ਨਾਲ ਯੂਨੀਅਨ ਵਲੋਂ ਫੰਡ ਦੀ ਵੰਡ ਕੀਤੀ ਜਾਦੀ ਹੈ ਉਸ ਦਾ ਕਾਲਾ ਚਿੱਠਾ ਜਲਦੀ ਉਹ ਜਨਤਕ ਕਰਨਗੇ। ਸ਼ਹਿਰ ਵਾਸੀਆਂ ਵਿਚਕਾਰ ਸਵਾਲ ਉੱਠ ਰਹੇ ਹਨ ਕਿ ਤਿਉਹਾਰਾਂ ਤੋਂ ਪਹਿਲਾਂ ਮਿਠਾਈਆਂ ਦੀ ਗੁਣਵੱਤਾ ਜਾਂਚਣ ਲਈ ਵਿਭਾਗ ਵਲੋਂ ਕੀ ਕਦਮ ਚੁੱਕੇ ਜਾ ਰਹੇ ਹਨ। ਸ਼ੱਕੀ ਖਾਣ-ਪੀਣ ਦੀ ਸਮੱਗਰੀ ਮਿਲਣ ’ਤੇ ਨਿਯਮਾਂ ਅਨੁਸਾਰ ਕਾਰਵਾਈ ਕੀਤੀ ਜਾਣੀ ਚਾਹੀਦੀ ਹੈ, ਤਾਂ ਜੋ ਲੋਕਾਂ ਨੂੰ ਸੁਰੱਖਿਅਤ ਖਾਣ-ਪੀਣ ਦਾ ਸਮਾਨ ਮਿਲ ਸਕੇ।
