ਨਵੀਂ ਦਿੱਲੀ, 6 ਸਤੰਬਰ (ਪੀ.ਟੀ.ਆਈ.)-ਪਿਆਜ਼ ਦੀਆਂ ਤੇਜ਼ੀ ਨਾਲ ਵਧ ਰਹੀਆਂ ਕੀਮਤਾਂ ਨੂੰ ਕਾਬੂ ਕਰਨ ਲਈ ਸਰਕਾਰ ਵਲੋਂ ਸਬਸਿਡੀ ਵਾਲੀ ਦਰ ’ਤੇ ਕੀਤੀ ਜਾ ਰਹੀ ਵਿਕਰੀ ਤਹਿਤ ਪਹਿਲੇ 10 ਦਿਨਾਂ ’ਚ ਦੇਸ਼ ਦੇ 17 ਸ਼ਹਿਰਾਂ ’ਚ ਲਗਭਗ 4,000 ਟਨ ਬਫਰ ਪਿਆਜ਼ ਵੇਚਿਆ ਜਾ ਚੁੱਕਾ ਹੈ। ਇਹ ਜਾਣਕਾਰੀ ਖਪਤਕਾਰ ਮਾਮਲਿਆਂ ਦੀ ਸਕੱਤਰ ਨਿਧੀ ਖਰੇ ਨੇ ਦਿੱਤੀ ਹੈ। ਕੇਂਦਰ ਸਰਕਾਰ ਦੀਆਂ ਏਜੰਸੀਆਂ ਐੱਨ.ਸੀ.ਸੀ.ਐੱਫ. ਤੇ ਨੈਫੈਡ ਕੋਲ ਸਾਲ 2026 ਲਈ 1.21 ਲੱਖ ਟਨ ਪਿਆਜ਼ ਦਾ ਬਫਰ ਸਟਾਕ ਮੌਜੂਦ ਹੈ। ਇਨ੍ਹਾਂ ਏਜੰਸੀਆਂ ਵਲੋਂ ਪਿਆਜ਼ ਪੈਦਾ ਕਰਨ ਵਾਲੇ ਸੂਬਿਆਂ ਤੋਂ ਵੱਡੀ ਮਾਤਰਾ ’ਚ ਸਟੋਰ ਕੀਤਾ ਪਿਆਜ਼ ਖਪਤ ਵਾਲੇ ਕੇਂਦਰਾਂ ਤੱਕ ਪਹੁੰਚਾਇਆ ਜਾ ਰਿਹਾ ਹੈ
। ਇਸ ਲਈ ਵਿਸ਼ੇਸ਼ ਰੇਲ ਰੇਕ ‘ਕੰਦਾ ਐਕਸਪ੍ਰੈੱਸ’ ਤੇ ਟਰੱਕਾਂ ਦੀ ਵਰਤੋਂ ਕੀਤੀ ਜਾ ਰਹੀ ਹੈ। ਕੀਮਤਾਂ ਘਟਾਉਣ ਲਈ ਚੁਣੇ ਗਏ ਕੀਮਤ-ਸੰਵੇਦਨਸ਼ੀਲ ਸ਼ਹਿਰਾਂ ’ਚ ਪਿਆਜ਼ 35 ਰੁਪਏ ਪ੍ਰਤੀ ਕਿਲੋ ਦੀ ਸਬਸਿਡੀ ਵਾਲੀ ਦਰ ’ਤੇ ਵੇਚਿਆ ਜਾ ਰਿਹਾ ਹੈ। ਨਿਧੀ ਖਰੇ ਨੇ ਦੱਸਿਆ ਕਿ ਹੁਣ ਤੱਕ 17 ਸ਼ਹਿਰਾਂ ’ਚ ਲਗਭਗ 4,000 ਟਨ ਬਫਰ ਪਿਆਜ਼ ਵੇਚਿਆ ਜਾ ਚੁੱਕਾ ਹੈ। ਉਨ੍ਹਾਂ ਕਿਹਾ ਕਿ ‘ਕੰਦਾ ਐਕਸਪ੍ਰੈੱਸ’ ਰਾਹੀਂ ਪਿਆਜ਼ ਦੀਆਂ ਵੱਡੀਆਂ ਖੇਪਾਂ ਦਿੱਲੀ ਤੇ ਚੇਨਈ ਪਹੁੰਚ ਚੁੱਕੀਆਂ ਹਨ।
ਹੁਣ ਤੀਜੀ ਰੇਲ ਰੇਕ ਗੁਹਾਟੀ ਭੇਜਣ ਲਈ ਲੋਡ ਕੀਤੀ ਜਾ ਰਹੀ ਹੈ, ਜਿਸ ਨੂੰ ਆਉਣ ਵਾਲੇ ਦਿਨਾਂ ’ਚ ਰਵਾਨਾ ਕੀਤਾ ਜਾਵੇਗਾ।ਖਰੇ ਨੇ ਕਿਹਾ ਕਿ ਬਫਰ ਪਿਆਜ਼ ਦੀ ਵੰਡ ਨਾਲ ਖਪਤਕਾਰਾਂ ਨੂੰ ਕੁਝ ਰਾਹਤ ਮਿਲੀ ਹੈ ਤੇ ਕੀਮਤਾਂ ’ਚ ਥੋੜ੍ਹੀ ਕਮੀ ਆਈ ਹੈ। ਉਨ੍ਹਾਂ ਕਿਹਾ ਕਿ ਸਰਕਾਰ ਦੇ ਬਫਰ ਸਟਾਕ ’ਚ ਮੌਜੂਦ ਪਿਆਜ਼ ਦੀ ਮਾਤਰਾ ਤੇ ਗੁਣਵੱਤਾ ਨਿੱਜੀ ਵਪਾਰੀਆਂ ਵੱਲੋਂ ਵੇਚੇ ਜਾ ਰਹੇ ਪਿਆਜ਼ ਦੇ ਬਰਾਬਰ ਹੈ।
