ਦੁਬਈ- ਉੱਤਰੀ ਆਇਰਲੈਂਡ ਦੇ ਸਟਾਰ ਗੋਲਫਰ ਰੋਰੀ ਮੈਕਿਲਰੋਏ ਨੇ ਦੁਬਈ ਵਿਚ ਖੇਡੀ ਗਈ ਡੀਪੀ ਵਰਲਡ ਟੂਰ ਚੈਂਪੀਅਨਸ਼ਿਪ ਵਿਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਵੱਡੀ ਉਪਲਬਧੀ ਆਪਣੇ ਨਾਮ ਕੀਤੀ ਹੈ। ਭਾਵੇਂ ਉਹ ਟੂਰਨਾਮੈਂਟ ਵਿਚ ਦੂਜੇ ਸਥਾਨ ’ਤੇ ਰਹੇ, ਪਰ ਉਨ੍ਹਾਂ ਨੇ ਸੀਜ਼ਨ ਦੇ ਸਭ ਤੋਂ ਵੱਧ ਅੰਕ ਹਾਸਲ ਕਰਕੇ ‘ਰੇਸ ਟੂ ਦੁਬਈ’ ਦਾ ਖਿਤਾਬ 8ਵੀਂ ਵਾਰ ਜਿੱਤ ਲਿਆ।
15 ਨਵੰਬਰ ਨੂੰ ਜੁਮੇਰਾਹ ਗੋਲਫ ਅਸਟੇਟ ਵਿਖੇ ਹੋਏ ਫਾਈਨਲ ਮੁਕਾਬਲੇ ਵਿਚ ਮੈਕਿਲਰੋਏ ਨੇ ਆਖਰੀ ਰਾਊਂਡ ਵਿਚ ਬਿਨਾਂ ਕਿਸੇ ਬੋਗੀ ਦੇ 67 ਦਾ ਸਕੋਰ ਬਣਾਇਆ ਅਤੇ ਕੁੱਲ 10 ਅੰਡਰ ਪਾਰ ਨਾਲ ਦੂਜਾ ਸਥਾਨ ਹਾਸਲ ਕੀਤਾ।
ਇਸ ਜਿੱਤ ਨਾਲ ਮੈਕਿਲਰੋਏ ਨੇ ਸਕਾਟਲੈਂਡ ਦੇ ਮਹਾਨ ਗੋਲਫਰ ਕੋਲਿਨ ਮੋਂਟਗੋਮਰੀ ਦੇ 8 ਵਾਰ ‘ਆਰਡਰ ਆਫ ਮੈਰਿਟ’ ਖਿਤਾਬ ਜਿੱਤਣ ਦੇ ਰਿਕਾਰਡ ਦੀ ਬਰਾਬਰੀ ਕਰ ਲਈ ਹੈ। ਖਾਸ ਗੱਲ ਇਹ ਹੈ ਕਿ ਉਨ੍ਹਾਂ ਨੇ ਲਗਾਤਾਰ ਪੰਜਵੀਂ ਵਾਰ ਇਹ ਸੀਜ਼ਨਲ ਖਿਤਾਬ ਆਪਣੇ ਨਾਮ ਕੀਤਾ ਹੈ।
ਦੂਜੇ ਪਾਸੇ ਇੰਗਲੈਂਡ ਦੇ ਟਾਇਰਲ ਹੈਟਨ ਨੇ 15 ਅੰਡਰ ਪਾਰ ਦੇ ਸਕੋਰ ਨਾਲ ਡੀਪੀ ਵਰਲਡ ਟੂਰ ਚੈਂਪੀਅਨਸ਼ਿਪ ਦਾ ਖਿਤਾਬ ਜਿੱਤਿਆ। ਉਨ੍ਹਾਂ ਨੇ ਦੂਜੇ ਸਥਾਨ ’ਤੇ ਰਹੇ ਮੈਕਿਲਰੋਏ ਨੂੰ ਪੰਜ ਸ਼ਾਟਾਂ ਦੇ ਫਰਕ ਨਾਲ ਹਰਾਇਆ।
