ਨਿਊਯਾਰਕ, 4 ਨਵੰਬਰ (ਰਾਜੂ ਸ਼ਹਿਬਾਜ਼ਪੁਰਾ)-ਅਮਰੀਕਾ ਦੀਆਂ ਮੱਧਕਾਲੀ ਚੋਣਾਂ ਵਿਚ ਭਾਰਤੀ ਮੂਲ ਦੇ ਉਮੀਦਵਾਰਾਂ ਨੇ ਕਾਮਯਾਬੀਆਂ ਹਾਸਲ ਕੀਤੀਆਂ ਹਨ। ਸੁਹਾਸ ਸੁਬਰਾਮਣੀਅਮ ਵਰਜੀਨੀਆ ਤੋਂ ਪ੍ਰਤੀਨਿਧੀ ਸਭਾ ਲਈ ਮੁੜ ਚੁਣੇ ਗਏ ਹਨ, ਜਦਕਿ ਅਰੁਣਾ ਮਿਲਰ ਨੇ ਮੈਰੀਲੈਂਡ ਦੇ ਉਪ-ਗਵਰਨਰ ਦਾ ਅਹੁਦਾ ਬਰਕਰਾਰ ਰੱਖਿਆ ਹੈ। ਪੀਆ ਡਾਂਡੀਆ ਫਲੋਰੀਡਾ ਤੋਂ ਪਹਿਲੀ ਵਾਰ ਅਮਰੀਕੀ ਸੰਸਦ ਲਈ ਚੁਣੀ ਗਈ ਹੈ। ਸੁਹਾਸ ਸੁਬਰਮਣਿਅਮ ਨੇ ਵਰਜੀਨੀਆ ਦੇ ਦਸਵੇਂ ਚੋਣ ਹਲਕੇ ਤੋਂ ਜਿੱਤ ਦਰਜ ਕੀਤੀ।
ਭਾਰਤੀ ਮਾਪਿਆਂ ਦੇ ਘਰ ਹਿਊਸਟਨ ਵਿਚ ਜੰਮੇ ਸੁਹਾਸ ਸਾਬਕਾ ਰਾਸ਼ਟਰਪਤੀ ਬਰਾਕ ਓਬਾਮਾ ਦੇ ਤਕਨੀਕੀ ਨੀਤੀ ਸਲਾਹਕਾਰ ਰਹਿ ਚੁੱਕੇ ਹਨ। ਸੰਸਦ ਵਿਚ ਪਹੁੰਚਣ ਤੋਂ ਪਹਿਲਾਂ ਉਨ੍ਹਾਂ ਵਰਜੀਨੀਆ ਦੀ ਵਿਧਾਨ ਸਭਾ ਅਤੇ ਸੂਬਾਈ ਸੈਨੇਟ ਵਿਚ ਵੀ ਸੇਵਾ ਨਿਭਾਈ। ਮੈਰੀਲੈਂਡ ਵਿਚ ਅਰੁਣਾ ਮਿਲਰ ਦੀ ਮੁੜ ਜਿੱਤ ਨਾਲ ਸੂਬੇ ਦੀ ਅਗਵਾਈ ਵਿਚ ਉਨ੍ਹਾਂ ਦੀ ਭੂਮਿਕਾ ਜਾਰੀ ਰਹੇਗੀ।
ਫਲੋਰੀਡਾ ਦੇ 22ਵੇਂ ਚੋਣ ਹਲਕੇ ਤੋਂ ਜਿੱਤੀ ਪੀਆ ਡਾਂਡੀਆ ਸਾਬਕਾ ਅਧਿਆਪਕ ਅਤੇ ਸਕੂਲ ਪ੍ਰਿੰਸੀਪਲ ਹੈ। ਪਾਮ ਬੀਚ ਕਾਊਂਟੀ ਵਿਚ ਜੰਮੀ-ਪਲੀ ਪੀਆ ਦੇ ਮਾਪੇ ਭਾਰਤ ਤੋਂ ਅਮਰੀਕਾ ਆਏ ਸਨ। ਉਸ ਨੇ ਨਿਊਯਾਰਕ ਦੇ ਹਾਰਲਮ ਇਲਾਕੇ ਵਿਚ ਘੱਟ ਆਮਦਨ ਵਾਲੇ ਪਰਿਵਾਰਾਂ ਦੇ ਬੱਚਿਆਂ ਦੀ ਪੜ੍ਹਾਈ ਲਈ ਕੰਮ ਕੀਤਾ।
