ਹਾਈ ਕੋਰਟ ਨੇ ਬੀ.ਐਮ.ਸੀ. ਨੂੰ ਵੀਡੀਓ ਮੁੜ ਅਪਲੋਡ ਕਰਨ ਲਈ ਕਿਹਾ
ਮੁੰਬਈ, 3 ਨਵੰਬਰ (ਪੀ.ਟੀ.ਆਈ)-ਬੰਬੇ ਹਾਈ ਕੋਰਟ ਨੇ ਮੰਗਲਵਾਰ ਨੂੰ ਅਦਾਕਾਰਾ ਦੀਆ ਮਿਰਜ਼ਾ ਦੀ ਉਸ ਵੀਡੀਓ ਨੂੰ ਲੈ ਕੇ ਹੋਏ ਵਿਵਾਦ ’ਤੇ ‘ਡੂੰਘਾ ਦੁੱਖ ਅਤੇ ਨਾਰਾਜ਼ਗੀ’ ਪ੍ਰਗਟਾਈ ਹੈ, ਜੋ ਬੀ.ਐਮ.ਸੀ. (ਬ੍ਰਿਹਨਮੁੰਬਈ ਮਿਊਂਸਪਲ ਕਾਰਪੋਰੇਸ਼ਨ) ਦੀ ਵਾਤਾਵਰਣ-ਅਨੁਕੂਲ ਤੇ ਪਟਾਕਾ-ਮੁਕਤ ਦੀਵਾਲੀ ਮੁਹਿੰਮ ਲਈ ਬਣਾਈ ਗਈ ਸੀ । ਅਦਾਲਤ ਨੇ ਨਗਰ ਨਿਗਮ ਨੂੰ ਇਹ ਵੀਡੀਓ ਕਲਿੱਪ ਦੁਬਾਰਾ ਅਪਲੋਡ ਕਰਨ ਲਈ ਕਿਹਾ ਹੈ ।
ਜਸਟਿਸ ਗਿਰੀਸ਼ ਕੁਲਕਰਨੀ ਅਤੇ ਜਸਟਿਸ ਨੀਲਾ ਗੋਖਲੇ ਦੇ ਬੈਂਚ ਨੇ ਇਸ ਮਾਮਲੇ ਦਾ ਖੁਦ ਨੋਟਿਸ ਲੈਂਦਿਆਂ ਕਿਹਾ ਕਿ ਉਹ ਕੁਝ ਲੋਕਾਂ ਦੀ ਸੋਚ ਤੋਂ ਬਹੁਤ ਦੁਖੀ ਹਨ, ਖਾਸ ਕਰਕੇ ਉਨ੍ਹਾਂ ਲੋਕਾਂ ਤੋਂ ਜੋ ਆਮ ਆਦਮੀ ਦੇ ਨੁਮਾਇੰਦੇ ਹੋਣ ਦਾ ਦਾਅਵਾ ਕਰਦੇ ਹਨ । ਹਾਈ ਕੋਰਟ ਨੇ ਕਿਹਾ ਕਿ ਇਹ ‘ਬਹੁਤ ਹੀ ਮੰਦਭਾਗੀ’ ਗੱਲ ਹੈ ਕਿ ਵਾਤਾਵਰਣ, ਹਵਾ ਤੇ ਸ਼ੋਰ ਪ੍ਰਦੂਸ਼ਣ ਬਾਰੇ ਜਾਗਰੂਕਤਾ ਫੈਲਾਉਣ ਲਈ ਬਣਾਈ ਗਈ ਵੀਡੀਓ ਨੂੰ ਅਜਿਹਾ ਰੰਗ ਦਿੱਤਾ ਗਿਆ ।
ਅਦਾਲਤ ਨੇ ਸਪਸ਼ਟ ਕੀਤਾ ਕਿ ਕੋਈ ਵੀ ਵਿਅਕਤੀ ਇਹ ਸਵਾਲ ਨਹੀਂ ਉਠਾ ਸਕਦਾ ਕਿ ਅਧਿਕਾਰੀਆਂ ਨੇ ਜਾਗਰੂਕਤਾ ਫੈਲਾਉਣ ਲਈ ਕਿਸੇ ਖਾਸ ਮਸ਼ਹੂਰ ਹਸਤੀ (ਸੈਲੀਬ੍ਰਿਟੀ) ਨੂੰ ਕਿਉਂ ਚੁਣਿਆ । ਮੁੰਬਈ ਭਾਜਪਾ ਆਗੂ ਅਮੀਤ ਸਤਮ ਦੇ ਇਤਰਾਜ਼ ਤੇ ਮੇਅਰ ਰਿਤੂ ਤਾਵਡੇ ਵਲੋਂ ਦੀਆ ਮਿਰਜ਼ਾ ਨੂੰ ‘ਹਿੰਦੂ-ਵਿਰੋਧੀ’ ਦੱਸਣ ਵਾਲੀਆਂ ਟਿੱਪਣੀਆਂ ਤੋਂ ਬਾਅਦ, ਬੀ.ਐਮ.ਸੀ. ਨੇ ਸੋਸ਼ਲ ਮੀਡੀਆ ਤੋਂ ਉਨ੍ਹਾਂ ਦੀ ਵੀਡੀਓ ਕਲਿੱਪ ਹਟਾ ਦਿੱਤੀ ਸੀ ।
