ਇਸਲਾਮਾਬਾਦ, 1 ਨਵੰਬਰ (ਇੰਟ)-ਪਾਕਿਸਤਾਨ ਦੇ ਸਾਬਕਾ ਕ੍ਰਿਕਟਰ ਮੁਹੰਮਦ ਯੂਸਫ਼ ਨੇ ਸਟਾਰ ਬੱਲੇਬਾਜ਼ ਬਾਬਰ ਆਜ਼ਮ ਦੀ ਖਰਾਬ ਫਾਰਮ ਨੂੰ ਲੈ ਕੇ ਅਹਿਮ ਸਲਾਹ ਦਿੱਤੀ ਹੈ। ਉਨ੍ਹਾਂ ਨੇ ਪਾਕਿਸਤਾਨ ਕ੍ਰਿਕਟ ਬੋਰਡ (PCB) ਨੂੰ ਅਪੀਲ ਕੀਤੀ ਹੈ ਕਿ ਬਾਬਰ ਨੂੰ ਆਪਣੀਆਂ ਤਕਨੀਕੀ ਕਮੀਆਂ ਦੂਰ ਕਰਨ ਅਤੇ ਫਾਰਮ ਮੁੜ ਹਾਸਲ ਕਰਨ ਲਈ ਇੰਗਲੈਂਡ ਜਾਂ ਆਸਟ੍ਰੇਲੀਆ ਭੇਜਿਆ ਜਾਵੇ, ਜਿੱਥੇ ਉਹ ਵਿਸ਼ੇਸ਼ ਕੋਚਿੰਗ ਲੈ ਸਕਣ।
ਮੁਹੰਮਦ ਯੂਸਫ਼ ਦਾ ਮੰਨਣਾ ਹੈ ਕਿ ਬਾਬਰ ਆਜ਼ਮ ਨੂੰ ਇਸ ਸਮੇਂ ਆਪਣੀ ਬੱਲੇਬਾਜ਼ੀ ਤਕਨੀਕ 'ਤੇ ਖਾਸ ਧਿਆਨ ਦੇਣ ਦੀ ਲੋੜ ਹੈ। ਵਿਦੇਸ਼ ਵਿਚ ਤਜਰਬੇਕਾਰ ਕੋਚਾਂ ਦੀ ਨਿਗਰਾਨੀ ਹੇਠ ਅਭਿਆਸ ਕਰਨ ਨਾਲ ਉਹ ਆਪਣੀਆਂ ਕਮਜ਼ੋਰੀਆਂ ਨੂੰ ਸਮਝ ਕੇ ਉਨ੍ਹਾਂ ਵਿਚ ਸੁਧਾਰ ਕਰ ਸਕਦੇ ਹਨ।
ਘਰੇਲੂ ਕ੍ਰਿਕਟ ਵਿਚ ਵਾਪਸੀ ਨਾਲ ਆਤਮਵਿਸ਼ਵਾਸ ਹੋ ਸਕਦਾ ਹੈ ਪ੍ਰਭਾਵਿਤ
ਯੂਸਫ਼ ਨੇ ਚਿਤਾਵਨੀ ਦਿੱਤੀ ਕਿ ਬਾਬਰ ਨੂੰ ਸਿੱਧਾ ਘਰੇਲੂ ਕ੍ਰਿਕਟ ਵਿਚ ਵਾਪਸ ਭੇਜਣਾ ਉਨ੍ਹਾਂ ਦੇ ਆਤਮਵਿਸ਼ਵਾਸ ਨੂੰ ਹੋਰ ਕਮਜ਼ੋਰ ਕਰ ਸਕਦਾ ਹੈ। ਉਨ੍ਹਾਂ ਅਨੁਸਾਰ ਇਸ ਸਮੇਂ ਬਾਬਰ ਨੂੰ ਸਿਰਫ਼ ਮੈਚ ਖੇਡਣ ਦੀ ਬਜਾਏ ਆਪਣੀਆਂ ਤਕਨੀਕੀ ਸਮੱਸਿਆਵਾਂ 'ਤੇ ਕੰਮ ਕਰਨ ਦੀ ਲੋੜ ਹੈ।
ਜ਼ਿਕਰਯੋਗ ਹੈ ਕਿ ਬਾਬਰ ਆਜ਼ਮ ਪਾਕਿਸਤਾਨ ਦੇ ਪ੍ਰਮੁੱਖ ਬੱਲੇਬਾਜ਼ਾਂ ਵਿਚੋਂ ਇਕ ਹਨ ਅਤੇ ਉਨ੍ਹਾਂ ਤੋਂ ਟੀਮ ਨੂੰ ਕਾਫ਼ੀ ਉਮੀਦਾਂ ਰਹਿੰਦੀਆਂ ਹਨ। ਹੁਣ ਦੇਖਣਾ ਹੋਵੇਗਾ ਕਿ ਪਾਕਿਸਤਾਨ ਕ੍ਰਿਕਟ ਬੋਰਡ ਮੁਹੰਮਦ ਯੂਸਫ਼ ਦੀ ਇਸ ਸਲਾਹ 'ਤੇ ਕੀ ਕਦਮ ਚੁੱਕਦਾ ਹੈ ਅਤੇ ਬਾਬਰ ਆਪਣੀ ਪੁਰਾਣੀ ਲੈਅ ਕਿਵੇਂ ਹਾਸਲ ਕਰਦੇ ਹਨ।
