ਪੈਰਿਸ - ਪ੍ਰਦਰਸ਼ਨਕਾਰੀਆਂ ਅਤੇ ਦੰਗਾ-ਰੋਕੂ ਪੁਲਿਸ ਵਿਚਕਾਰ ਝੜਪ ਹੋਣ ਕਾਰਨ ਪ੍ਰਦਰਸ਼ਨ ਹੋਏ ਹਿੰਸਕ

ਪੈਰਿਸ, 25 ਅਕਤੂਬਰ - ਪੈਰਿਸ ਵਿਚ ਪ੍ਰਦਰਸ਼ਨਕਾਰੀਆਂ ਅਤੇ ਦੰਗਾ-ਰੋਕੂ ਪੁਲਿਸ ਵਿਚਕਾਰ ਝੜਪ ਹੋਣ ਕਾਰਨ ਪ੍ਰਦਰਸ਼ਨ ਹਿੰਸਕ ਹੋ ਗਏ ਹਨ। ਵਧਦੀ ਮਹਿੰਗਾਈ ਅਤੇ ਰਹਿਣ-ਸਹਿਣ ਦੀ ਲਾਗਤ ਵਿਰੁੱਧ  ਦੇਸ਼ ਵਿਆਪੀ ਵਿਰੋਧ ਪ੍ਰਦਰਸ਼ਨਾਂ ਦੌਰਾਨ ਰਾਜਧਾਨੀ ਪੈਰਿਸ ਸਮੇਤ ਕਈ ਸ਼ਹਿਰਾਂ ਵਿਚ ਹਿੰਸਕ ਝੜਪਾਂ ਹੋਈਆਂ।
ਫਰਾਂਸ ਦੇ ਗ੍ਰਹਿ ਮੰਤਰਾਲੇ ਦੇ ਅਨੁਸਾਰ, ਦੇਸ਼ ਭਰ ਵਿਚ ਹੋਏ ਪ੍ਰਦਰਸ਼ਨਾਂ ਵਿਚ ਲਗਭਗ 410,000 ਲੋਕਾਂ ਨੇ ਹਿੱਸਾ ਲਿਆ, ਜਿਨ੍ਹਾਂ ਵਿਚੋਂ 110,000 ਇਕੱਲੇ ਪੈਰਿਸ ਵਿਚ ਹੋਏ। ਦੰਗਾ ਵਿਰੋਧੀ ਪੁਲਿਸ ਨੇ ਪੈਰਿਸ ਅਤੇ ਹੋਰ ਪ੍ਰਭਾਵਿਤ ਸ਼ਹਿਰਾਂ (ਜਿਵੇਂ ਕਿ ਲਿਓਨ, ਮਾਰਸੇਲੀ, ਲਿਲ, ਟੂਲੂਸ ਅਤੇ ਰੇਨਸ) ਵਿਚ ਭੀੜ ਨੂੰ ਕਾਬੂ ਕਰਨ ਲਈ ਅੱਥਰੂ ਗੈਸ ਅਤੇ ਪਾਣੀ ਦੀਆਂ ਤੋਪਾਂ ਦੀ ਵਰਤੋਂ ਕੀਤੀ।
ਪੈਰਿਸ ਦੇ ਪੋਰਟੇ ਡੀ ਵਿੰਸੇਨਸ ਅਤੇ ਹੋਰ ਇਲਾਕਿਆਂ ਵਿਚ ਨਕਾਬਪੋਸ਼ ਪ੍ਰਦਰਸ਼ਨਕਾਰੀਆਂ ਨੇ ਪੁਲਿਸ 'ਤੇ ਪੱਥਰ, ਕੱਚ ਦੀਆਂ ਬੋਤਲਾਂ ਅਤੇ ਪਟਾਕੇ ਸੁੱਟੇ ਅਤੇ ਅੱਗ ਲਗਾ ਦਿੱਤੀ ਅਤੇ ਸੜਕਾਂ 'ਤੇ ਭੰਨਤੋੜ ਕੀਤੀ। ਹਿੰਸਕ ਝੜਪਾਂ ਅਤੇ ਤਣਾਅ ਤੋਂ ਬਾਅਦ ਪੈਰਿਸ ਸਮੇਤ ਦੇਸ਼ ਭਰ ਵਿਚ ਸੈਂਕੜੇ ਲੋਕਾਂ ਨੂੰ ਹਿਰਾਸਤ ਵਿੱਚ ਲਿਆ ਗਿਆ ਹੈ। ਸਥਿਤੀ ਨੂੰ ਸੰਭਾਲਣ ਲਈ, ਫਰਾਂਸੀਸੀ ਪ੍ਰਸ਼ਾਸਨ ਨੇ ਦੇਸ਼ ਭਰ ਵਿਚ 70,000 ਤੋਂ ਵੱਧ ਸੁਰੱਖਿਆ ਕਰਮਚਾਰੀ ਅਤੇ ਪੁਲਿਸ ਬਲ ਤਾਇਨਾਤ ਕੀਤੇ ਸਨ।