ਮੰਤਰੀ ਲਾਲ ਚੰਦ ਕਟਾਰੂਚੱਕ ਨੇ ਮਾਰਿਆ ਗੈਸ ਏਜੰਸੀ ’ਤੇ ਛਾਪਾ, ਕਾਰਵਾਈ ਦੇ ਦਿੱਤੇ ਹੁਕਮ

ਦੀਨਾਨਗਰ, (ਗੁਰਦਾਸਪੁਰ), 19 ਮਾਰਚ- ਪੰਜਾਬ ਵਿਚ ਗੈਸ ਸੰਕਟ ਪ੍ਰਤੀ 'ਆਪ' ਸਰਕਾਰ ਸੁਚੇਤ ਹੋ ਗਈ ਹੈ। ਅੱਜ ਖੁਰਾਕ ਅਤੇ ਸਿਵਲ ਸਪਲਾਈ ਮੰਤਰੀ ਲਾਲਚੰਦ ਕਟਾਰੂਚੱਕ ਨੇ ਇਕ ਗੈਸ ਏਜੰਸੀ 'ਤੇ ਛਾਪਾ ਮਾਰਿਆ। ਮੰਤਰੀ ਨੇ ਦੀਨਾਨਗਰ ਦੇ ਕਸਬੇ ਤਾਰਾਗੜ੍ਹ ਵਿਚ ਗੈਸ ਏਜੰਸੀ ਦਾ ਦੌਰਾ ਕੀਤਾ। ਲੋਕ ਸਵੇਰੇ 4-5 ਵਜੇ ਤੋਂ ਲਾਈਨਾਂ ਵਿਚ ਖੜ੍ਹੇ ਸਨ, ਪਰ ਏਜੰਸੀ ਸਵੇਰੇ 9 ਵਜੇ ਤੱਕ ਨਹੀਂ ਖੁੱਲ੍ਹੀ। ਲਗਭਗ 400 ਲੋਕਾਂ ਨੂੰ ਲਾਈਨ ਵਿਚ ਖੜ੍ਹੇ ਦੇਖ ਕੇ ਮੰਤਰੀ ਗੁੱਸੇ ਵਿਚ ਆ ਗਏ।

ਇਨ੍ਹਾਂ ਵਿਚੋਂ ਬਹੁਤ ਸਾਰੇ ਲੋਕਾਂ ਨੂੰ ਤਿੰਨ ਦਿਨਾਂ ਤੋਂ ਸਿਲੰਡਰ ਨਹੀਂ ਮਿਲੇ ਸਨ। ਮੰਤਰੀ ਨੇ ਤੁਰੰਤ ਪਠਾਨਕੋਟ ਦੇ ਡੀ.ਐਫ.ਐਸ.ਸੀ. ਰਾਜ ਰਿਸ਼ੀ ਮਹਿਰਾ ਨੂੰ ਫ਼ੋਨ ਕੀਤਾ। ਉਨ੍ਹਾਂ ਦੱਸਿਆ ਕਿ ਲੋਕ ਪ੍ਰੇਸ਼ਾਨ ਸਨ ਅਤੇ ਕੋਈ ਵੀ ਏਜੰਸੀ ਸਟਾਫ਼ ਮੌਜੂਦ ਨਹੀਂ ਸੀ। ਸਿਰਫ਼ ਇਕ ਸਟੋਰਕੀਪਰ ਮੌਜੂਦ ਸੀ ਅਤੇ ਉਹ ਵੀ ਗੋਦਾਮ ਨਹੀਂ ਖੋਲ੍ਹ ਰਿਹਾ ਸੀ। ਉਨ੍ਹਾਂ ਕਿਹਾ ਕਿ ਅਜਿਹੇ ਹਾਲਾਤ ਵਿਚ ਲੋਕਾਂ ਦਾ ਮਜ਼ਾਕ ਬਣਾਇਆ ਜਾ ਰਿਹਾ ਹੈ, ਉਨ੍ਹਾਂ ਵਿਰੁੱਧ ਕਾਰਵਾਈ ਕਰੋ। ਮੰਤਰੀ ਨੇ ਏਜੰਸੀ ਅਧਿਕਾਰੀਆਂ ਵਿਰੁੱਧ ਕਾਰਵਾਈ ਦੇ ਹੁਕਮ ਦਿੱਤੇ।