ਤਿਤਲੀਆਂ ਵਰਗੇ ਨਾਜ਼ੁਕ ਅਤੇ ਬੁਲੰਦੀ 'ਤੇ ਝਿਲਮਿਲ ਕਰਦੇ ਸਿਤਾਰਿਆਂ ਵਰਗੇ ਸ਼ਿਅਰ ਲਿਖਣ ਵਾਲਾ ਮੁਕੇਸ਼ ਆਲਮ ਪੰਜਾਬੀ, ਹਿੰਦੀ ਤੇ ਉਰਦੂ ਵਿਚ ਗ਼ਜ਼ਲ ਕਹਿੰਦਾ ਹੈ | ਉਸ ਕੋਲ ਕਿਸੇ ਵੀ ਸਮੱਸਿਆ ਨੂੰ ਸੂਖਮਤਾ ਨਾਲ ਪੇਸ਼ ਕਰਨ ਦੀ ਕਲਾ ਹੈ | 14 ਅਗਸਤ 1969 ਨੂੰ ਪੈਦਾ ਹੋਏ ਆਲਮ ਦੀ ਰਿਹਾਇਸ਼ ਲੁਧਿਆਣਾ ਵਿਖੇ ਹੈ ਤੇ ਉਸ ਦਾ ਨਿੱਜੀ ਕਾਰੋਬਾਰ ਹੈ | ਉਹ ਦੂਰ ਦੂਰ ਤੱਕ ਉਰਦੂ ਮੁਸ਼ਾਇਰਿਆਂ ਵਿਚ ਸ਼ਾਮਿਲ ਹੁੰਦਾ ਹੈ ਤੇ ਪੰਜਾਬੀ ਕਵੀ ਦਰਬਾਰਾਂ ਵਿਚ ਵੀ ਆਲਮ ਦੀ ਹਾਜ਼ਰੀ ਦਿਲਕਸ਼ ਮਾਹੌਲ ਸਿਰਜਦੀ ਹੈ | ਪੰਜਾਬੀ ਗ਼ਜ਼ਲ ਦੇ ਨਾਲ ਨਾਲ ਆਲਮ ਗੀਤ ਅਤੇ ਛੰਦ ਬੰਦ ਕਵਿਤਾ ਵੀ ਲਿਖਦਾ ਹੈ | ਉਸ ਦੀਆਂ ਲਿਖਤਾਂ ਨੂੰ ਕਈ ਸਨਮਾਨ ਵੀ ਪ੍ਰਾਪਤ ਹੋ ਚੁੱਕੇ ਹਨ | 'ਚਿਰਾਗ਼ੋਂ ਕੇ ਹਵਾਲੇ ਸੇ', 'ਇਸ਼ਕ ਮੇਰੀ ਸੁਲਤਾਨੀ ਮੇਂ' ਪੁਸਤਕਾਂ ਤੋਂ ਇਲਾਵਾ 'ਛਣਕੰਙਣਾ' ਉਸ ਦਾ ਪੰਜਾਬੀ ਕਾਵਿ ਸੰਗ੍ਰਹਿ ਹੈ ਜਿਸ ਵਿਚ ਬਹੁਗਿਣਤੀ ਗ਼ਜ਼ਲਾਂ ਹਨ | ਪੇਸ਼ ਹਨ ਗ਼ਜ਼ਲਕਾਰ ਮੁਕੇਸ਼ ਆਲਮ ਦੀਆਂ ਦੋ ਗ਼ਜ਼ਲਾਂ-
-ਮੋਬਾਈਲ : 99884-44002
ਜ਼ਿੰਦਗੀ ਨੂੰ ਕੀ ਇਹ ਮੌਕਾ ਮਿਲ ਸਕੇਗਾ ਮਰਦਿਆਂ?
ਸੋਚਦਾ ਹਾਂ, ਜਾਣ ਲੱਗੇ ਬਿਸਤਰਾ ਤਹਿ ਕਰਦਿਆਂ |
ਰਿਸ਼ਤਿਆਂ ਦਾ, ਰੁਤਬਿਆਂ ਦਾ ਕੀ ਕਰਾਂ, ਇਹ ਸੋਚਦਾਂ,
ਮੈਂ ਪਹਾੜੀ ਚੜ੍ਹਨ ਵੇਲੇ ਬੋਝ ਹਲਕਾ ਕਰਦਿਆਂ |
ਮੈਲ ਮਨਫ਼ੀ ਹੋ ਗਈ ਜਿੱਦਾਂ ਨਿਤਰਦੇ ਨੀਰ 'ਚੋਂ,
ਪੀੜ ਖਾਰਿਜ ਹੋ ਗਈ ਤੇਰੇ ਤਸੀਹੇ ਜਰਦਿਆਂ |
ਰਾਗ ਤੇਰਾ ਖਹਿ ਗਿਆ ਅੱਜ ਫਿਰ ਮੇਰੇ ਵੈਰਾਗ ਸੰਗ,
ਜ਼ਖ਼ਮ ਫਿਰ ਉੱਚੜ ਗਏ ਆਠਰਦਿਆਂ ਆਠਰਦਿਆਂ |
ਰੀਝ ਹੈ 'ਆਲਮ' ਹੀ ਸਾਰਾ ਮਿਲ ਪਵੇ ਐਪਰ ਇਹ ਮਨ,
ਛਾਨਣੀ ਹੈ, ਛਾਨਣੀ ਵਿੱਚ ਨੀਰ ਕਿੱਦਾਂ ਭਰ ਦਿਆਂ?
•
•
ਕੋਈ ਮੌਸਮ, ਕੋਈ ਆਲਮ ਹਮੇਸ਼ਾ ਥਿਰ ਨਹੀਂ ਰਹਿੰਦਾ |
ਕਿ ਜਾਦੂ ਕੋਈ ਵੀ ਹੋਵੇ ਜ਼ਿਆਦਾ ਚਿਰ ਨਹੀਂ ਰਹਿੰਦਾ |
ਕੋਈ ਪੱਥਰ ਭਲਾ ਕਦ ਰੋਕ ਸਕਦੈ ਵਗਦੀਆਂ ਨਦੀਆਂ,
ਨਹੀਂ ਰਹਿਣਾ ਹੈ ਜਿਸਨੇ ਦਿਲ 'ਚ ਉਹ ਆਿਖ਼ਰ ਨਹੀਂ ਰਹਿੰਦਾ |
ਮੈਂ ਆਪਣੀ ਹੋਂਦ ਦੇ ਸ਼ੀਸ਼ੇ ਹਜ਼ਾਰਾਂ ਵਾਰ ਧੋ ਬੈਠਾਂ,
ਮੇਰਾ ਇੱਕ ਅਸਲ ਦਾ ਚਿਹਰਾ ਹੈ ਜੋ ਹਾਜ਼ਿਰ ਨਹੀਂ ਰਹਿੰਦਾ |
ਉਹ ਤੇਰੇ ਦਰ 'ਤੇ ਬੈਠੇ ਪਾਪ ਧੋਵਣ ਦੇ ਕਰਨ ਹੀਲੇ,
ਮੈਂ ਤੈਨੂੰ ਸੋਚ ਹੀ ਲੈਂਦਾ ਹਾਂ ਤਾਂ ਕਾਫ਼ਿਰ ਨਹੀਂ ਰਹਿੰਦਾ |
ਇਹ ਪਗੜੀ ਭਾਲਦੀ ਫਿਰਦੀ ਹੈ ਮੈਨੂੰ ਅਹੁਦਿਆਂ ਤਾਈਾ,
ਤੇ ਮੇਰੇ ਪੈਰ ਨੇ ਉਸ ਰਾਹ 'ਤੇ ਜਿੱਥੇ ਸਿਰ ਨਹੀਂ ਰਹਿੰਦਾ |
ਮੇਰੇ 'ਆਲਮ' ਨੂੰ ਰੱਖੋ ਨਾਲ ਐ ਪਰਵਾਸੀਓ ਚਿੜੀਓ,
ਤੁਹਾਡੇ ਵਾਂਗ ਇਹ ਵੀ ਘਰ 'ਚ ਬਹੁਤਾ ਚਿਰ ਨਹੀਂ ਰਹਿੰਦਾ |
