ਮੈਚ ਦੌਰਾਨ ਭਾਰਤ ਤੇ ਨੀਦਰਲੈਂਡ ਦੇ ਖ਼ਿਡਾਰੀ। ਹਾਕੀ ਵਿਸ਼ਵ ਕੱਪ : ਨੀਦਰਲੈਂਡ ਤੋਂ 3-1 ਨਾਲ ਹਾਰੀ ਭਾਰਤੀ ਟੀਮ ਭਾਰਤ ਦੀਆਂ ਸੈਮੀਫਾਈਨਲ ਉਮੀਦਾਂ ਨੂੰ ਲੱਗਾ ਝਟਕਾ

ਐਮਸਟਲਵੀਨ, 22 ਅਗਸਤ (ਪੀ. ਟੀ. ਆਈ.)-ਭਾਰਤੀ ਪੁਰਸ਼ ਹਾਕੀ ਟੀਮ ਨੂੰ ਪੁਰਸ਼ ਹਾਕੀ ਵਿਸ਼ਵ ਕੱਪ 2026 ਦੇ ਦੂਜੇ ਦੌਰ ਦੇ ਆਪਣੇ ਪਹਿਲੇ ਮੈਚ ਵਿਚ ਨੀਦਰਲੈਂਡਜ਼ ਤੋਂ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਭਾਰਤ ਇਹ ਮੈਚ 3-1 ਨਾਲ ਹਾਰ ਗਿਆ, ਜਿਸ ਨਾਲ ਹਰਮਨਪ੍ਰੀਤ ਸਿੰਘ ਦੀ ਟੀਮ ਦੀਆਂ ਸੈਮੀਫਾਈਨਲ ਉਮੀਦਾਂ ਨੂੰ ਵੱਡਾ ਝਟਕਾ ਲੱਗਾ ਹੈ। ਹਾਲਾਂਕਿ, ਭਾਰਤ ਨੇ ਮੈਚ ਦੌਰਾਨ 7 ਪੈਨਲਟੀ ਕਾਰਨਰ ਹਾਸਲ ਕੀਤੇ ਪਰ ਉਹ ਸਿਰਫ਼ ਇਕ ਨੂੰ ਗੋਲ ’ਚ ਬਦਲਣ ਵਿਚ ਕਾਮਯਾਬ ਰਹੇ। ਨੀਦਰਲੈਂਡਜ਼ ਤੋਂ ਹਾਰ ਤੋਂ ਬਾਅਦ ਭਾਰਤ ਜ਼ੀਰੋ ਅੰਕਾਂ ਨਾਲ ਆਪਣੇ ਗਰੁੱਪ ’ਚ ਸਭ ਤੋਂ ਹੇਠਾਂ ਹੈ, ਜਦੋਂਕਿ ਨੀਦਰਲੈਂਡਜ਼ 6 ਅੰਕਾਂ ਤੱਕ ਸਿਖਰਲੇ ਸਥਾਨ ’ਤੇ ਪਹੁੰਚ ਗਿਆ ਹੈ। ਇੰਗਲੈਂਡ ਤਿੰਨ ਅੰਕਾਂ ਨਾਲ ਗਰੁੱਪ ’ਚ ਦੂਜੇ ਸਥਾਨ ’ਤੇ ਹੈ। ਭਾਰਤ ਹੁਣ ਦੌਰ ਦੇ ਆਪਣੇ ਦੂਜੇ ਮੈਚ ਵਿਚ ਅਰਜਨਟੀਨਾ ਦਾ ਸਾਹਮਣਾ ਕਰੇਗਾ।