ਸ਼ਾਹਰੁਖ ਖ਼ਾਨ ਨੇ ਅਮਰੀਕਾ ’ਚ ਬਣਾਇਆ ਆਪਣਾ ਕ੍ਰਿਕਟ ਸਟੇਡੀਅਮ

ਲਾਸ ਏਜੰਲਸ, 2 ਜੁਲਾਈ (ਇੰਟ.)-ਬਾਲੀਵੁੱਡ ਸੁਪਰਸਟਾਰ ਅਤੇ ਕੋਲਕਾਤਾ ਨਾਈਟ ਰਾਈਡਰਜ਼ (ਕੇ.ਕੇ.ਆਰ.) ਦੇ ਸਹਿ-ਮਾਲਕ ਸ਼ਾਹਰੁਖ ਖਾਨ ਦਾ ਇਕ ਲੰਬੇ ਸਮੇਂ ਦਾ ਸੁਪਨਾ ਆਖਰਕਾਰ ਸਕਾਰ ਹੋ ਗਿਆ ਹੈ। ਉਹ ਹੁਣ ਏਂਜਲਸ, ਅਮਰੀਕਾ ’ਚ ਇਕ ਕ੍ਰਿਕਟ ਗਰਾਊਂਡ ਦੇ ਮਾਲਕ ਬਣ ਗਏ ਹਨ। ਜਿਸਦਾ ਅੱਜ ਉਨ੍ਹਾਂ ਵਲੋਂ ਉਦਘਾਟਨ ਕੀਤਾ ਗਿਆ। ਇਸ ਖਾਸ ਮੌਕੇ ’ਤੇ ਸੋਸ਼ਲ ਮੀਡੀਆ ’ਤੇ ਇਕ ਭਾਵਨਾਤਮਕ ਪੋਸਟ ਸਾਂਝੀ ਕਰਦੇ ਹੋਏ, ਸ਼ਾਹਰੁਖ ਨੇ ਇਸਨੂੰ ਇਕ ਸੁਪਨੇ ਦੇ ਸੱਚ ਹੋਣ ਵਜੋਂ ਦੱਸਿਆ। ਉਨ੍ਹਾਂ ਲਿਖਿਆ ਕਿ ਜੋ ਪਹਿਲਾਂ ਸੁਪਨਾ ਸੀ ਉਹ ਹੁਣ ਹਕੀਕਤ ਬਣ ਗਿਆ ਹੈ। ਲਾਸ ਏਂਜਲਸ ਦੇ ਨਾਈਟ ਰਾਈਡਰਜ਼ ਕ੍ਰਿਕਟ ਗਰਾਊਂਡ ’ਚ ਤੁਹਾਡਾ ਸਵਾਗਤ ਹੈ। ਜ਼ਿਕਰਯੋਗ ਹੈ ਕਿ 128 ਸਾਲਾਂ ਦੇ ਲੰਬੇ ਇੰਤਜ਼ਾਰ ਤੋਂ ਬਾਅਦ 2028 ਦੇ ਲਾਸ ਏਂਜਲਸ ਓਲੰਪਿਕ ਵਿਚ ਕ੍ਰਿਕਟ ਦੀ ਵਾਪਸੀ ਹੋ ਰਹੀ ਹੈ ਤੇ ਪ੍ਰਸ਼ੰਸਕ ਇਸ ਬਾਰੇ ਬਹੁਤ ਉਤਸ਼ਾਹਿਤ ਹਨ। ਚੱਲ ਰਹੇ ਮਹਿਲਾ ਟੀ-20 ਵਿਸ਼ਵ ਕੱਪ ਦੌਰਾਨ ਕਈ ਮਹਿਲਾ ਟੀਮਾਂ ਪਹਿਲਾਂ ਹੀ ਓਲੰਪਿਕ ਲਈ ਕੁਆਲੀਫਾਈ ਕਰ ਚੁੱਕੀਆਂ ਹਨ। ਇਹ ਮੈਚ ਸ਼ਾਹਰੁਖ ਖਾਨ ਦੀ ਮਲਕੀਅਤ ਵਾਲੇ ਸਟੇਡੀਅਮ ’ਚ ਵੀ ਹੋਣਗੇ। ਮੈਦਾਨ ਦੇ ਮੁੱਖ ਵਰਗ ’ਚ ਅੱਠ ਪਿੱਚਾਂ ਹਨ ਤੇ ਇਹ ਆਈ.ਸੀ.ਸੀ. ਦੇ ਆਯਾਮੀ ਮਿਆਰਾਂ ਦੀ ਪਾਲਣਾ ਕਰਦੀਆਂ ਹਨ। ਇਸ ਤੋਂ ਇਲਾਵਾ, 6 ਫਲੱਡ ਲਾਈਟ ਟਾਵਰ ਹਨ, ਹਰ ਇਕ 120 ਫੁੱਟ ਉੱਚਾ ਹੈ।