ਬਰਨਾਲਾ, 10 ਅਪ੍ਰੈਲ (ਅਸ਼ੋਕ ਭਾਰਤੀ)-ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਉਗਰਾਹਾਂ ਜ਼ਿਲ੍ਹਾ ਬਰਨਾਲਾ ਵਲੋਂ ਪਾਵਰ ਰਾਜ ਕਾਰਪੋਰੇਸ਼ਨ ਦੇ ਐੱਸ.ਈ. ਨੂੰ ਮੰਗ-ਪੱਤਰ ਦਿੱਤਾ ਗਿਆ | ਇਸ ਮੌਕੇ ਜ਼ਿਲ੍ਹਾ ਪ੍ਰਧਾਨ ਚਮਕੌਰ ਸਿੰਘ ਨੈਣੇਵਾਲ ਨੇ ਕਿਹਾ ਕਿ ਕਣਕ ਦੀ ਫ਼ਸਲ ਪੱਕੀ ਹੋਣ ਕਰ ਕੇ ਬਿਜਲੀ ਬੋਰਡ ਵਲੋਂ ਧਿਆਨ ਰੱਖਦੇ ਹੋਏ ਕਿ ਕਿਸਾਨ ਦੀ ਫ਼ਸਲ ਦਾ ਕੋਈ ਜਾਨੀ ਮਾਲੀ ਨੁਕਸਾਨ ਨਾ ਹੋ ਜਾਵੇ, ਖੇਤੀ ਖੇਤਰ ਵਿਚ ਵਰਤੋਂ ਹੋਣ ਵਾਲੀ ਖੇਤੀ ਮੋਟਰਾਂ ਦੀ ਸਪਲਾਈ ਰਾਤ ਇਕ ਵਜੇ ਤੋਂ ਸਵੇਰੇ ਪੰਜ ਵਜੇ ਤੱਕ ਕਰ ਦਿੱਤੀ ਗਈ ਸੀ | ਜਿਸ ਕਰ ਕੇ ਕਿਸਾਨਾਂ ਨੂੰ ਇਸ ਟਾਈਮ ਦੀ ਦਿੱਕਤ ਆਉਂਦੀ ਸੀ, ਨਾਲ ਹੀ ਲਾਈਨਾਂ ਦੀਆਂ ਤਾਰਾਂ ਢਿੱਲੀਆਂ ਹੋਣ ਕਰ ਕੇ ਬਿਜਲੀ ਦੀ ਚਿੰਗਾਰੀ ਪੈਣ ਦਾ ਵੀ ਡਰ ਹੁੰਦਾ ਹੈ | ਐੱਸ.ਈ. ਵਲੋਂ ਖੇਤੀ ਖੇਤਰ ਵਿਚ ਵਰਤੋਂ ਹੋਣ ਮੋਟਰਾਂ ਦੀ ਸਪਲਾਈ ਸਵੇਰੇ 7 ਤੋਂ 9 ਵਜੇ ਤੱਕ ਸਪਲਾਈ ਦੇਣ ਵਿਸ਼ਵਾਸ ਦਿੱਤਾ ਗਿਆ ਹੈ | ਇਸ ਮੌਕੇ ਸੂਬਾ ਆਗੂ ਰੂਪ ਸਿੰਘ ਛੰਨਾ, ਕੁਲਜੀਤ ਸਿੰਘ ਵਜੀਦਕੇ, ਰਾਮ ਸਿੰਘ ਸੰਘੇੜਾ, ਮਾਨ ਸਿੰਘ ਗੁਰਮ, ਨਰਿੱਪਜੀਤ ਸਿੰਘ ਬਡਬਰ, ਬਲਜਿੰਦਰ ਸਿੰਘ ਧੌਲਾ, ਹਰੀ ਸਿੰਘ ਭਗਤਪੁਰਾ ਆਦਿ ਆਗੂ ਹਾਜ਼ਰ ਸਨ |
