ਮਾਛੀਵਾੜਾ ਸਾਹਿਬ, 14 ਜੁਲਾਈ (ਅਲਬੇਲਾ) - ਨੇੜ੍ਹਲੇ ਪਿੰਡਾਂ ਵਿਚ ਕੁੱਝ ਆਦਮਖ਼ੋਰ ਕੁੱਤਿਆਂ ਦਾ ਪ੍ਰਕੋਪ ਦੇਖਣ ਨੂੰ ਮਿਲਿਆ ਜਿਸ ’ਤੇ ਸਬੰਧਿਤ ਵਿਭਾਗ ਨੇ ਕਾਰਵਾਈ ਕਰਦਿਆਂ ਇਨ੍ਹਾਂ ਨੂੰ ਨੱਥ ਪਾਈ ਅਤੇ ਹੁਣ ਤਾਜ਼ਾ ਮਾਮਲੇ ਵਿਚ ਮਾਛੀਵਾੜਾ ਸ਼ਹਿਰ ’ਚ ਇੱਕ ਪਸ਼ੂਆਂ ਦੇ ਵਾੜ੍ਹੇ ਵਿਚ ਖੜ੍ਹਾ ਗਊ ਦਾ ਵੱਛਾ ਆਦਮਖ਼ੋਰ ਕੁੱਤੇ ਨੋਚ-ਨੋਚ ਕੇ ਖਾ ਗਏ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਸਥਾਨਕ ਕੂਕਾ ਕਾਲੋਨੀ ਨੇੜ੍ਹੇ ਇੱਕ ਪਸ਼ੂ ਪਾਲਕ ਵਲੋਂ ਵਾੜ੍ਹਾ ਬਣਾ ਕੇ 2 ਗਊਆਂ ਰੱਖੀਆਂ ਸਨ। ਰਾਤ ਨੂੰ ਆਦਮਖ਼ੋਰ ਕੁੱਤੇ ਇਸ ਵਾੜ੍ਹੇ ਵਿਚ ਵੜ ਗਏ ਅਤੇ ਗਊ ਦਾ ਇੱਕ ਛੋਟਾ ਜਿਹਾ ਵੱਛਾ ਨੋਚ-ਨੋਚ ਕੇ ਖਾ ਗਏ। ਸਵੇਰੇ ਜਦੋਂ ਪਸ਼ੂ ਪਾਲਕ ਵਾੜ੍ਹੇ ਵਿਚ ਪੁੱਜਾ ਤਾਂ ਦੇਖਿਆ ਕਿ ਆਦਮਖ਼ੋਰ ਕੁੱਤੇ ਇਸ ਗਊ ਦੇ ਵੱਛੇ ਦਾ ਮਾਸ ਪੂਰੀ ਤਰ੍ਹਾਂ ਖਾ ਚੁੱਕੇ ਸਨ ਜਦਕਿ ਪਿੱਛੇ ਹੱਡੀਆਂ ਹੀ ਬਚੀਆਂ ਸਨ। ਪਸ਼ੂ ਪਾਲਕ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਇਹ ਕੁੱਤੇ ਮਨੁੱਖੀ ਜੀਵਨ ਲਈ ਖ਼ਤਰਾ ਖੜਾ ਹੋ ਚੁੱਕੇ ਹਨ ਕਿਉਂਕਿ ਇਹ ਕਦੇ ਵੀ ਹਮਲਾ ਕਰਕੇ ਕਿਸੇ ਦਾ ਜਾਨੀ ਨੁਕਸਾਨ ਕਰ ਸਕਦੇ ਹਨ।
