ਜ਼ੀਰਾ, 8 ਜੁਲਾਈ (ਰਜਨੀਸ਼ ਕਥੂਰੀਆ)- ਬੀਤੇ ਦਿਨ ਜ਼ੀਰਾ-ਮਖੂ ਰਾਸ਼ਟਰੀ ਮਾਰਗ ’ਤੇ ਇੱਕ ਤੇਜ਼ ਰਫਤਾਰ ਨਿਊ ਦੀਪ ਬੱਸ ਡਰਾਈਵਰ ਵੱਲੋਂ ਇੱਕ ਐਕਟਿਵਾ ਚਾਲਕ ਵਿਅਕਤੀ ਨੂੰ ਦਰੜ ਕੇ ਮਾਰਨ ਦੇ ਦੋਸ਼ ਵਿਚ ਥਾਣਾ ਸਿਟੀ ਜ਼ੀਰਾ ਦੀ ਪੁਲਿਸ ਨੇ ਬੱਸ ਚਾਲਕ ਖਿਲਾਫ ਮੁਕੱਦਮਾ ਦਰਜ ਕਰ ਲਿਆ ਹੈ। ਹਰਪ੍ਰੀਤ ਸਿੰਘ ਪੁੱਤਰ ਅਜਮੇਰ ਸਿੰਘ ਵਾਸੀ ਪਿੰਡ ਮਹੀਆਂਵਾਲਾ ਖੁਰਦ ਨੇ ਥਾਣਾ ਸਿਟੀ ਜ਼ੀਰਾ ਦੀ ਪੁਲਿਸ ਨੂੰ ਦਰਜ ਕਰਵਾਏ ਬਿਆਨ ਵਿਚ ਦੱਸਿਆ ਹੈ ਕਿ ਉਸ ਦਾ ਚਾਚਾ ਗੁਰਮੇਲ ਸਿੰਘ ਐਕਟਿਵਾ ’ਤੇ ਸਵਾਰ ਹੋ ਕੇ ਕਚਹਿਰੀ ਜ਼ੀਰਾ ਆਪਣੇ ਨਿੱਜੀ ਕੰਮ ਲਈ ਜ਼ੀਰਾ ਸ਼ਹਿਰ ਤੋਂ ਜਾ ਰਹੇ ਸਨ। ਉਸ ਨੇ ਦੱਸਿਆ ਕਿ ਚਾਚੇ ਗੁਰਮੇਲ ਸਿੰਘ ਤੋਂ ਕਰੀਬ ਅੱਧਾ ਕਿੱਲਾ ਪਿੱਛੇ ਉਹ ਆਪਣੇ ਮੋਟਰਸਾਈਕਲ ’ਤੇ ਸਵਾਰ ਹੋ ਕੇ ਆਪਣੇ ਚਾਚੇ ਗੁਰਮੇਲ ਸਿੰਘ ਦੇ ਮਗਰ ਜਾ ਰਿਹਾ ਸੀ ਤਾਂ ਰਸ਼ਤੇ ’ਚ ਇਕ ਬੱਸ ਕੰਪਨੀ ਨਿਊ ਦੀਪ ਨੰਬਰ ਪੀ.ਬੀ.04- ਏ.ਡੀ./1894 ਜਿਸ ਨੂੰ ਡਰਾਈਵਰ ਤੇਜ ਰਫਤਾਰ ਅਤੇ ਲਾਪਰਵਾਹੀ ਨਾਲ ਚਲਾ ਰਿਹਾ ਸੀ ਅਤੇ ਓਵਰਟੇਕ ਕਰ ਰਿਹਾ ਸੀ। ਜਿਸ ਨੇ ਬੱਸ ਸਿੱਧੀ ਲਿਆ ਕੇ ਉਸ ਦੇ ਚਾਚਾ ਗੁਰਮੇਲ ਸਿੰਘ ਦੀ ਸਕੂਟਰੀ ਤੇ ਚੜਾ ਦਿੱਤੀ। ਜਿਸ ਨਾਲ ਗੁਰਮੇਲ ਸਿੰਘ ਦੀ ਮੌਤ ਹੋ ਗਈ। ਥਾਣਾ ਸਿਟੀ ਜ਼ੀਰਾ ਦੀ ਪੁਲਿਸ ਨੇ ਨਾਮਾਲੂਮ ਬੱਸ ਡਰਾਈਵਰ ਦੇ ਖਿਲਾਫ ਵੱਖ-ਵੱਖ ਧਾਰਾਵਾਂ ਦੇ ਤਹਿਤ ਮੁਕੱਦਮਾ ਦਰਜ ਕਰਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
