ਮੁੰਬਈ, 24 ਸਤੰਬਰ (ਪੀ.ਟੀ.ਆਈ.)-ਕਾਂਗਰਸ ਆਗੂ ਰਾਹੁਲ ਗਾਂਧੀ ਨੇ ਆਈ.ਆਈ.ਟੀ. ਬੰਬੇ ਦੇ ਮ੍ਰਿਤਕ ਵਿਦਿਆਰਥੀ ਸਾਹਿਲ ਵਾਕੋਡੇ ਦੇ ਮਾਪਿਆਂ ਨਾਲ ਗੱਲਬਾਤ ਕੀਤੀ ਅਤੇ ਉਨ੍ਹਾਂ ਨੂੰ ਆਪਣੇ ਪੁੱਤਰ ਲਈ ਇਨਸਾਫ਼ ਦੀ ਮੰਗ ਕਰਨ ਦੀ ਲੜਾਈ ’ਚ ਹਰ ਸੰਭਵ ਮਦਦ ਦਾ ਭਰੋਸਾ ਦਿੱਤਾ। ਪਾਰਟੀ ਸੂਤਰਾਂ ਨੇ ਵੀਰਵਾਰ ਨੂੰ ਕਿਹਾ ਕਿ ਗਾਂਧੀ ਨੇ ਰਵਿੰਦਰ ਅਤੇ ਸੋਨਾਲੀ ਵਾਕੋਡੇ ਨੂੰ ਉਸ ਵੇਲੇ ਵੀਡੀਓ ਕਾਲ ਕੀਤੀ ਜਦੋਂ ਉਹ ਵਾਸ਼ਿਮ ਜ਼ਿਲ੍ਹੇ ਤੋਂ ਮੁੰਬਈ ਆ ਰਹੇ ਸਨ। ਲਗਭਗ 17 ਮਿੰਟ ਦੀ ਕਾਲ ਦੌਰਾਨ, ਗਾਂਧੀ ਨੇ ਸਾਹਿਲ ਦੇ ਮਾਪਿਆਂ ਨੂੰ ਭਰੋਸਾ ਦਿੱਤਾ ਕਿ ਉਹ ਉਨ੍ਹਾਂ ਦੇ ਨਾਲ ਹਨ ਅਤੇ ਉਨ੍ਹਾਂ ਨੂੰ ਹਰ ਸੰਭਵ ਮਦਦ ਦਾ ਭਰੋਸਾ ਦਿੱਤਾ। ਇੰਡੀਅਨ ਯੂਥ ਕਾਂਗਰਸ ਦੇ ਪ੍ਰਧਾਨ ਉਦੈ ਭਾਨੂ ਚਿਬ ਅਤੇ ਇਸ ਦੀ ਮਹਾਰਾਸ਼ਟਰ ਇਕਾਈ ਦੇ ਮੁਖੀ ਸ਼ਿਵਰਾਜ ਮੋਰੇ ਕਾਲ ਦੌਰਾਨ ਸਾਹਿਲ ਦੇ ਮਾਪਿਆਂ ਦੇ ਨਾਲ ਸਨ। ਮੁੰਬਈ ਪੁਲਿਸ ਦੀ ਕ੍ਰਾਈਮ ਬ੍ਰਾਂਚ ਪਹਿਲਾਂ ਹੀ ਸਾਹਿਲ ਦੀ ਮੌਤ ਦੀ ਜਾਂਚ ਕਰ ਰਹੀ ਹੈ, ਜਿਸ ਨੂੰ 18 ਸਤੰਬਰ ਦੀ ਸ਼ਾਮ ਨੂੰ ਉਸਦੇ ਹੋਸਟਲ ਦੇ ਕਮਰੇ ’ਚ ਫਾਹੇ ਨਾਲ ਲਟਕਿਆ ਹੋਇਆ ਪਾਇਆ ਗਿਆ ਸੀ, ਜਦੋਂ ਉਸ ਨੂੰ ਮਿਡ-ਸੈਮੇਸਟਰ ਪ੍ਰੀਖਿਆ ਦੌਰਾਨ ਕਥਿਤ ਤੌਰ ’ਤੇ ਮੋਬਾਈਲ ਫੋਨ ਦੀ ਵਰਤੋਂ ਕਰਕੇ ਚੈਟ ਜੀ.ਟੀ.ਪੀ.ਤੱਕ ਪਹੁੰਚ ਕਰਨ ਲਈ ਫੜਿਆ ਗਿਆ ਸੀ।
