ਸਿੱਖ ਵਿਦਵਾਨ ਖੋਜ ਕਰ ਕੇ ਕਰਤਾਰਪੁਰ ਸਾਹਿਬ ਦੇ ਆਬਾਦ ਹੋਣ ਦੀ ਸਹੀ ਤਾਰੀਖ਼ ਦਾ ਲਗਾਉਣ ਪਤਾ-ਤਰਲੋਚਨ ਸਿੰਘ

ਅੰਮ੍ਰਿਤਸਰ, 2 ਜੁਲਾਈ (ਸੁਰਿੰਦਰ ਕੋਛੜ)-ਸਾਬਕਾ ਸੰਸਦ ਮੈਂਬਰ ਤਰਲੋਚਨ ਸਿੰਘ ਨੇ ਸੁਝਾਅ ਦਿੱਤਾ ਹੈ ਕਿ ਦੇਸ਼-ਵਿਦੇਸ਼ ਦੀਆਂ ਸਿੱਖ ਜਥੇਬੰਦੀਆਂ, ਗੁਰਦੁਆਰਾ ਕਮੇਟੀਆਂ ਅਤੇ ਵਿਦਵਾਨ ਇੱਕਜੁੱਟ ਹੋ ਕੇ ਸ੍ਰੀ ਕਰਤਾਰਪੁਰ ਸਾਹਿਬ ਦੇ ਆਬਾਦ ਹੋਣ ਦੀ ਸਹੀ ਤਾਰੀਖ਼ ਦਾ ਪਤਾ ਲਗਾਉਣ। ਉਨ੍ਹਾਂ ਕਿਹਾ ਕਿ ਇਸ ਬਾਰੇ ‘ਚ ਵੱਖ-ਵੱਖ ਦਾਅਵਿਆਂ ਦੇ ਕਾਰਨ ਸਹੀ ਸਾਲ ਨੂੰ ਸਾਬਤ ਕਰਨ ਲਈ ਵਿਦਵਾਨਾਂ ਨੂੰ ਪਾਕਿ ਦੇ ਪੁਰਾਲੇਖਾਂ ਜਾਂ ਜਨਮ ਸਾਖੀਆਂ ਤੋਂ ਕੁਝ ਪ੍ਰਮਾਣਿਕ ਇਤਿਹਾਸਕ ਅੰਕੜੇ ਪ੍ਰਾਪਤ ਕਰਨੇ ਪੈਣਗੇ ਅਤੇ ਸੰਭਾਵਿਤ ਮਹੀਨਾ ਜਾਂ ਤਰੀਕ ਲੱਭਣੀ ਹੋਵੇਗੀ। ਤਰਲੋਚਨ ਸਿੰਘ ਨੇ ਕਿਹਾ ਕਿ ਪਾਕਿਸਤਾਨ ਦੇ ਮੌਜੂਦਾ ਜ਼ਿਲ੍ਹਾ ਨਾਰੋਵਾਲ ਦੀ ਤਹਿਸੀਲ ਸ਼ਕਰਗੜ੍ਹ ਦੇ ਕਰਤਾਰਪੁਰ ਸਾਹਿਬ ਵਿਖੇ ਸਿੱਖ ਧਰਮ ਦੇ ਬਾਨੀ ਗੁਰੂ ਨਾਨਕ ਦੇਵ ਜੀ ਨੇ ਆਪਣੀ ਗ੍ਰਹਿਸਤ ਸੰਭਾਲੀ, ਖ਼ੁਦ ਆਪਣੇ ਹੱਥੀ ਖੇਤੀਬਾੜੀ ਕੀਤੀ ਅਤੇ ਸਿੱਖੀ ਦਾ ਉਪਦੇਸ਼ ਦਿੱਤੇ। ਉਨ੍ਹਾਂ ਕਿਹਾ ਕਿ ਜ਼ਿਆਦਾਤਰ ਦਸਤਾਵੇਜ਼ਾਂ, ਖੋਜ-ਪੱਤਰਾਂ ਅਤੇ ਸ਼੍ਰੋਮਣੀ ਕਮੇਟੀ ਦੇ ਕੈਲੰਡਰਾਂ ‘ਚ ਸ੍ਰੀ ਕਰਤਾਰਪੁਰ ਸਾਹਿਬ ਦੇ ਆਬਾਦ ਹੋਣ ਬਾਰੇ 1522 ਈ. ਦਾ ਜ਼ਿਕਰ ਹੈ, ਜਦਕਿ ਕੁਝ ਵਿਦਵਾਨਾਂ ਦਾ ਮੰਨਣਾ ਹੈ ਕਿ ਗੁਰੂ ਸਾਹਿਬ ਨੇ 1521 ਈ. ‘ਚ ਕਰਤਾਰਪੁਰ ਸਾਹਿਬ ਆਬਾਦ ਕੀਤਾ ਅਤੇ ਪੰਥ ਰਤਨ ਗਿਆਨੀ ਗਿਆਨ ਸਿੰਘ ਅਨੁਸਾਰ 13 ਮਾਘ ਸੰਮਤ 1572 ਨੂੰ ਗੁਰੂ ਨਾਨਕ ਦੇਵ ਜੀ ਨੇ ਕਰਤਾਰਪੁਰ ਦੀ ਨੀਂਹ ਰੱਖੀ।