ਅੰਮਿ੍ਤਸਰ, 3 ਅਪ੍ਰੈਲ (ਸੁਰਿੰਦਰ ਕੋਛੜ)-ਲਹਿੰਦੇ ਪੰਜਾਬ 'ਚ ਮਰੀਅਮ ਨਵਾਜ਼ ਦੀ ਅਗਵਾਈ ਵਾਲੀ ਸੂਬਾਈ ਸਰਕਾਰ ਵਲੋਂ ਗਾਵਾਂ ਅਤੇ ਮੱਝਾਂ ਪਾਲਣ 'ਤੇ ਟੈਕਸ ਲਗਾਉਣ ਦੀਆਂ ਤਿਆਰੀਆਂ ਚੱਲ ਰਹੀਆਂ ਹਨ | ਪਾਕਿਸਤਾਨੀ ਮੀਡੀਆ ਰਿਪੋਰਟਾਂ ਅਨੁਸਾਰ ਪੰਜਾਬ ਸਰਕਾਰ ਪ੍ਰਤੀ ਗਾਂ ਅਤੇ ਮੱਝ 'ਤੇ ਰੋਜ਼ਾਨਾ 30 ਪਾਕਿਸਤਾਨੀ ਰੁਪਏ ਦੀ ਫ਼ੀਸ ਲਗਾ ਸਕਦੀ ਹੈ | ਲਹਿੰਦੇ ਪੰਜਾਬ ਦੀ ਸਰਕਾਰ ਇਸ ਪਹਿਲਕਦਮੀ ਨੂੰ 'ਗ੍ਰੀਨ ਐਨਰਜੀ' ਵਜੋਂ ਪੇਸ਼ ਕਰ ਰਹੀ ਹੈ | ਇਸ ਯੋਜਨਾ ਨੂੰ 'ਸੁਥਰਾ ਪੰਜਾਬ' ਬਾਇਓਗੈਸ ਪ੍ਰੋਗਰਾਮ ਦਾ ਹਿੱਸਾ ਦੱਸਿਆ ਜਾ ਰਿਹਾ ਹੈ | ਇਹ ਪ੍ਰੋਗਰਾਮ ਦਸੰਬਰ 2024 'ਚ ਲਹਿੰਦੇ ਪੰਜਾਬ 'ਚ ਸ਼ੁਰੂ ਕੀਤਾ ਗਿਆ ਸੀ | ਦੂਜੇ ਪਾਸੇ, ਵਿਰੋਧੀ ਪਾਰਟੀਆਂ ਨੇ ਇਸ ਫ਼ੈਸਲੇ ਦੀ ਸਖ਼ਤ ਆਲੋਚਨਾ ਕੀਤੀ ਹੈ, ਇਸ ਨੂੰ 'ਗੋਬਰ ਟੈਕਸ' ਦਾ ਨਾਂਅ ਦਿੱਤਾ ਹੈ | ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਹ ਕਦਮ ਦਰਸਾਉਂਦਾ ਹੈ ਕਿ ਸਰਕਾਰ ਵਿੱਤੀ ਦਬਾਅ ਹੇਠ ਹੈ ਅਤੇ ਹੁਣ ਨਵੇਂ ਤਰੀਕਿਆਂ ਰਾਹੀਂ ਪੈਸਾ ਇਕੱਠਾ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਹੈ | ਇਹ ਸਪਸ਼ਟ ਤੌਰ 'ਤੇ ਦਰਸਾਉਂਦਾ ਹੈ ਕਿ ਪਾਕਿਸਤਾਨ ਦੇ ਸਭ ਤੋਂ ਵੱਡੇ ਸੂਬੇ 'ਚ ਆਮਦਨ ਦੇ ਅਸਲ ਸਰੋਤ ਖ਼ਤਮ ਹੋ ਗਏ ਹਨ | ਜਾਣਕਾਰੀ ਅਨੁਸਾਰ ਲਹਿੰਦੇ ਪੰਜਾਬ ਦੀ ਸਰਕਾਰ ਨੇ ਇਸ ਫ਼ੀਸ ਨੂੰ ਲਾਗੂ ਕਰਨ ਲਈ ਸੂਬੇ 'ਚ ਲਗਭਗ 168 ਪਸ਼ੂ ਕਾਲੋਨੀਆਂ ਦੀ ਪਛਾਣ ਕੀਤੀ ਹੈ | ਇਹ ਫ਼ੀਸ ਇਨ੍ਹਾਂ ਕਾਲੋਨੀਆਂ 'ਚ ਲਗਭਗ 50 ਲੱਖ ਗਾਵਾਂ ਅਤੇ ਮੱਝਾਂ 'ਤੇ ਲਗਾਈ ਜਾ ਸਕਦੀ ਹੈ | ਇਸ ਨਵੀਂ ਯੋਜਨਾ ਤਹਿਤ ਪਸ਼ੂ ਮਾਲਕਾਂ ਤੋਂ ਪ੍ਰਤੀ ਜਾਨਵਰ ਰੋਜ਼ਾਨਾ ਫ਼ੀਸ ਲਈ ਜਾਵੇਗੀ |
