ਨੂਰਪੁਰ ਬੇਦੀ, 7 ਮਾਰਚ (ਰਾਜੇਸ਼ ਚੌਧਰੀ ਤਖਤਗੜ੍ਹ)-ਧੀਆਂ ਹੁਣ ਹਰ ਖੇਤਰ 'ਚ ਵੱਡੀਆਂ ਤੇ ਮਾਣਮੱਤੀਆਂ ਉਪਲਬਧੀਆਂ ਹਾਸਿਲ ਕਰ ਰਹੀਆਂ ਹਨ | ਪਿੰਡ ਤਖਤਗੜ੍ਹ ਤੋਂ ਰਾਣਾ ਧਰਮਪਾਲ ਤੇ ਉਨ੍ਹਾਂ ਦੇ ਸਮੂਹ ਪਰਿਵਾਰ ਦੀ ਹੋਣਹਾਰ ਭਾਣਜੀ ਨੰਦਨੀ ਠਾਕੁਰ ਨੇ ਵੱਡੀ ਉਪਲਬਧੀ ਹਾਸਿਲ ਕਰਦੇ ਹੋਏ ਯੂ. ਪੀ. ਐਸ. ਸੀ. ਕੰਬਾਈਡ ਜੀਓ ਸਾਇੰਟਿਸਟ ਪ੍ਰੀਖਿਆ 2025 ਵਿਚ ਆਲ ਇੰਡੀਆ 'ਚ ਪਹਿਲਾ ਰੈਂਕ ਪ੍ਰਾਪਤ ਕਰਕੇ ਆਪਣੇ ਨਾਨਕੇ ਪਰਿਵਾਰ, ਪਿੰਡ ਤੇ ਇਲਾਕੇ ਦਾ ਨਾਂਅ ਰੌਸ਼ਨ ਕੀਤਾ ਹੈ | ਊਨਾ ਜ਼ਿਲੇ੍ਹ ਦੇ ਪਿੰਡ ਪੰਜਾਬਰ ਦੀ ਰਹਿਣ ਵਾਲੀ ਨੰਦਨੀ ਠਾਕੁਰ ਪਿਤਾ ਸੰਜੇ ਠਾਕੁਰ ਤੇ ਮਾਤਾ ਰਾਜ ਰਾਣੀ ਦੀ ਹੋਣਹਾਰ ਬੇਟੀ ਹੈ | ਉਸ ਦੇ ਨਾਨਕੇ ਪਿੰਡ ਤਖਤਗੜ੍ਹ ਵਿਖੇ ਪਹੁੰਚਣ 'ਤੇ ਵਿਸ਼ੇਸ਼ ਸਨਮਾਨ ਸਮਾਰੋਹ ਕਰਵਾਇਆ | ਜਿਸ ਦੌਰਾਨ ਵਿਸ਼ੇਸ਼ ਤੌਰ 'ਤੇ ਹਲਕਾ ਵਿਧਾਇਕ ਐਡਵੋਕੇਟ ਦਿਨੇਸ਼ ਚੱਢਾ ਪਹੁੰਚੇ ਤੇ ਉਨ੍ਹਾਂ ਨੰਦਨੀ ਠਾਕੁਰ ਨੂੰ ਸਨਮਾਨ ਚਿੰਨ੍ਹ ਦੇ ਕੇ ਸਨਮਾਨਿਤ ਕੀਤਾ | ਵਿਧਾਇਕ ਚੱਢਾ ਨੇ ਕਿਹਾ ਕਿ ਨੰਦਨੀ ਠਾਕੁਰ ਨੇ ਸਖ਼ਤ ਮਿਹਨਤ ਤੇ ਲਗਨ ਨਾਲ ਇਹ ਮੁਕਾਮ ਹਾਸਿਲ ਕਰਕੇ ਇਲਾਕੇ ਦੀਆਂ ਧੀਆਂ ਲਈ ਇਕ ਪ੍ਰੇਰਣਾ ਸਰੋਤ ਬਣੀ ਹੈ | ਨੰਦਨੀ ਠਾਕੁਰ ਨੇ ਦੱਸਿਆ ਕਿ ਉਸ ਦੀ ਚੋਣ ਜੀਓ ਫਿਜੀਸਿਸਟ ਦੇ ਤੌਰ 'ਤੇ ਹੋਈ ਹੈ ਅਤੇ ਹੁਣ ਉਸ ਨੂੰ ਛੇ ਮਹੀਨੇ ਦੀ ਵਿਸ਼ੇਸ਼ ਸਿਖਲਾਈ ਦਿੱਤੀ ਜਾਵੇਗੀ | ਸਿਖਲਾਈ ਪੂਰੀ ਹੋਣ ਤੋਂ ਬਾਅਦ ਉਹ ਜੀਓ ਫਿਜੀਸਿਸਟ ਵਜੋਂ ਆਪਣੀ ਸੇਵਾ ਨਿਭਾਏਗੀ | ਉਸ ਨੇ ਆਪਣੀ ਸਫਲਤਾ ਦਾ ਸਿਹਰਾ ਆਪਣੇ ਮਾਤਾ-ਪਿਤਾ ਤੇ ਅਧਿਆਪਕਾਂ ਨੂੰ ਦਿੱਤਾ ਅਤੇ ਕਿਹਾ ਕਿ ਉਨ੍ਹਾਂ ਦੀ ਹੌਸਲਾ ਅਫਜ਼ਾਈ ਅਤੇ ਮਾਰਗਦਰਸ਼ਨ ਨਾਲ ਹੀ ਉਹ ਇਹ ਉਪਲਬਧੀ ਹਾਸਿਲ ਕਰ ਸਕੀ ਹੈ | ਇਸ ਮੌਕੇ ਪਿੰਡ ਦੇ ਮੁਹਤਬਰ ਵਿਅਕਤੀਆਂ ਤੇ ਰਿਸ਼ਤੇਦਾਰਾਂ ਨੇ ਵੀ ਨੰਦਨੀ ਠਾਕੁਰ ਨੂੰ ਵਧਾਈ ਦਿੱਤੀ ਅਤੇ ਉਸ ਦੇ ਉਜਲੇ ਭਵਿੱਖ ਲਈ ਸ਼ੁੱਭਕਾਮਨਾਵਾਂ ਦਿੱਤੀਆਂ | ਇਸ ਮੌਕੇ ਪਿੰਡ ਦੀ ਗ੍ਰਾਮ ਪੰਚਾਇਤ ਸਮੇਤ ਹੋਰ ਵੀ ਪਤਵੰਤੇ ਹਾਜ਼ਰ ਸਨ |
