ਕੈਬ ਡਰਾਈਵਰ ਨੇ ਲੜਕੀ ਨੂੰ ਅਸ਼ਲੀਲ ਸੁਨੇਹੇ ਭੇਜੇ, ਵਿਰੋਧ ਕਰਨ 'ਤੇ ਦਿੱਤੀਆਂ ਧਮਕੀਆਂ
ਅਜੀਤ ਡੈਸਕ
01-02-2026
ਪੀੜਤਾਂ ਮੁਤਾਬਿਕ, 27 ਜਨਵਰੀ ਦੀ ਰਾਤ ਕਰੀਬ 12 ਵਜੇ ਉਹ ਸੈਕਟਰ-26 ਸਥਿਤ ਆਪਣੇ ਕੰਮਕਾਜ ਵਾਲੀ ਥਾਂ ਤੋਂ ਘਰ ਵਾਪਸੀ ਲਈ ਇਨਡਰਾਈਵ ਐਪ ਰਾਹੀਂ ਕੈਬ ਬੁੱਕ ਕੀਤੀ ਸੀ | ਕੈਬ ਨੂੰ ਰਾਮ ਨਾਮਕ ਡਰਾਈਵਰ ਨੇ ਮਨਜ਼ੂਰ ਕੀਤਾ | ਕੈਬ ਬੁੱਕ ਹੋਣ ਤੋਂ ਬਾਅਦ ਡਰਾਈਵਰ ਨੇ ਲੜਕੀ ਨੂੰ ਇਕੱਲੀ ਹੋਣ ਬਾਰੇ ਪੁੱਛਿਆ ਅਤੇ ਫਿਰ ਲਗਾਤਾਰ ਆਪੱਤੀਜਨਕ ਸੁਨੇਹੇ ਭੇਜਣ ਲੱਗ ਪਿਆ | ਲੜਕੀ ਵਲੋਂ ਵਿਰੋਧ ਕਰਨ 'ਤੇ ਦੋਸ਼ੀ ਨੇ ਪਹਿਲਾਂ ਮਾਫ਼ੀ ਮੰਗੀ ਅਤੇ ਬਾਅਦ ਵਿਚ ਧਮਕੀਆਂ ਦੇਣ ਲੱਗ ਪਿਆ | ਲੜਕੀ ਦਾ ਕਹਿਣਾ ਹੈ ਕਿ ਉਸ ਨੇ 28 ਜਨਵਰੀ ਨੂੰ ਸੈਕਟਰ-26 ਥਾਣੇ ਵਿਚ ਲਿਖਤੀ ਸ਼ਿਕਾਇਤ ਦੇ ਕੇ ਅਸ਼ਲੀਲ ਸੁਨੇਹਿਆਂ ਦੇ ਸਕ੍ਰੀਨਸ਼ਾਟ ਅਤੇ ਡਰਾਈਵਰ ਦੀ ਪੂਰੀ ਜਾਣਕਾਰੀ ਪੁਲਿਸ ਨੂੰ ਸੌਂਪੀ, ਪਰ ਇਸ ਦੇ ਬਾਵਜੂਦ ਐੱਫ. ਆਈ. ਆਰ. ਦਰਜ ਨਹੀਂ ਕੀਤੀ ਗਈ |
ਜਿਸ ਤੋਂ ਬਾਅਦ ਵਿਚ ਪੁਲਿਸ ਵਲੋਂ ਦੋਹਾਂ ਧਿਰਾਂ ਨੂੰ ਥਾਣੇ ਬੁਲਾਕੇ ਸਮਝੌਤਾ ਕਰਵਾ ਦਿੱਤਾ ਗਿਆ | ਥਾਣੇ ਵਿਚ ਉਕਤ ਕੈਬ ਡਰਾਈਵਰ ਨੇ ਆਪਣੀ ਗ਼ਲਤੀ ਕਬੂਲ ਕਰਦੇ ਹੋਏ ਲੜਕੀ ਤੋਂ ਮਾਫ਼ੀ ਮੰਗੀ |
ਇਸ ਮਾਮਲੇ 'ਤੇ ਚੰਡੀਗੜ੍ਹ ਟ੍ਰਾਈਸਿਟੀ ਡਰਾਈਵਰ ਯੂਨੀਅਨ ਦੇ ਪ੍ਰਧਾਨ ਅਮਨਦੀਪ ਸਿੰਘ ਨੇ ਕਿਹਾ ਕਿ ਅਜਿਹੇ ਮਾਮਲਿਆਂ ਵਿਚ ਸਮਝੌਤਾ ਨਹੀਂ, ਸਗੋਂ ਕਾਨੂੰਨੀ ਕਾਰਵਾਈ ਹੋਣੀ ਚਾਹੀਦੀ ਹੈ ਅਤੇ ਮੁਲਜ਼ਮ ਖ਼ਿਲਾਫ਼ ਸਖ਼ਤ ਕਦਮ ਚੁੱਕੇ ਜਾਣੇ ਚਾਹੀਦੇ ਹਨ |
