ਲੁਧਿਆਣਾ, 2 ਜੁਲਾਈ (ਭੁਪਿੰਦਰ ਸਿੰਘ ਬੈਂਸ)-ਬੁੱਧਵਾਰ ਦੇਰ ਰਾਤ ਹੋਈ ਬਰਸਾਤ ਤੋਂ ਬਾਅਦ ਪੱਖੋਵਾਲ ਰੋਡ ਸਥਿਤ ਸ਼ਹੀਦ ਭਗਤ ਸਿੰਘ ਨਗਰ (474 ਏਕੜ ਸਕੀਮ) ਵਿਚ ਸਿਟੀ ਸੈਂਟਰ ਦੇ ਜੀ ਬਲਾਕ ਗੇਟ ਨੰਬਰ 2 ਤੋਂ ਐਚ ਬਲਾਕ ਵੱਲ ਜਾਂਦੀ ਸੜਕ ਅਤੇ ਟਿਊਬਵੈੱਲ ਨੇੜੇ ਸੜਕ ਕਈ ਥਾਵਾਂ ਤੋਂ ਬੁਰੀ ਤਰ੍ਹਾਂ ਧਸ ਗਈ, ਜਿਸ ਕਾਰਨ ਇਲਾਕੇ ਵਿਚ ਚਿੰਤਾ ਦਾ ਮਾਹੌਲ ਬਣ ਗਿਆ। ਜਾਣਕਾਰੀ ਅਨੁਸਾਰ ਹਾਲ ਹੀ ਵਿਚ ਬਰਸਾਤੀ ਪਾਣੀ ਅਤੇ ਸੀਵਰੇਜ ਨਿਕਾਸੀ ਲਈ ਸੜਕ ਪੁੱਟ ਕੇ ਪਾਈਪ ਪਾਏ ਗਏ ਸਨ, ਪਰ ਕੰਮ ਦੌਰਾਨ ਤਕਨੀਕੀ ਮਿਆਰਾਂ ਦੀ ਪਾਲਨਾ ਨਾ ਹੋਣ ਕਾਰਨ ਪਹਿਲੀ ਹੀ ਬਰਸਾਤ ਵਿਚ ਸੜਕ ਨੇ ਜਵਾਬ ਦੇ ਦਿੱਤਾ। ਸਥਾਨਕ ਵਸਨੀਕਾਂ ਵਲੋਂ ਪਹਿਲਾਂ ਵੀ ਇਸ ਕੰਮ ਸਬੰਧੀ ਚਿੰਤਾ ਜਤਾਈ ਗਈ ਸੀ ਅਤੇ ਸਬੰਧਿਤ ਅਧਿਕਾਰੀਆਂ ਨੂੰ ਦੱਸਿਆ ਗਿਆ ਸੀ। ਇਸ ਸਬੰਧੀ ਇਲਾਕਾ ਨਿਵਾਸੀਆਂ ਵਲੋਂ ਮਨੁੱਖੀ ਅਧਿਕਾਰ ਕਮਿਸ਼ਨਰ, ਏ.ਡੀ.ਸੀ. ਦਫ਼ਤਰ, ਇੰਪਰੂਵਮੈਂਟ ਟਰੱਸਟ ਅਤੇ ਨਗਰ ਨਿਗਮ ਨੂੰ ਸ਼ਿਕਾਇਤਾਂ ਅਤੇ ਮੰਗ ਪੱਤਰ ਵੀ ਸੌਂਪੇ ਗਏ ਸਨ, ਪਰ ਕਿਸੇ ਵੀ ਵਿਭਾਗ ਵਲੋਂ ਸਮੇਂ ਸਿਰ ਲੋੜੀਂਦੀ ਕਾਰਵਾਈ ਨਹੀਂ ਕੀਤੀ ਗਈ। ਇਲਾਕਾ ਨਿਵਾਸੀਆਂ ਦਾ ਕਹਿਣਾ ਹੈ ਕਿ ਸਿਟੀ ਸੈਂਟਰ ਖੇਤਰ ਵਿਚ ਰਿਟੇਨਿੰਗ ਦੀਵਾਰ ਅਧੂਰੀ ਪਈ ਹੈ। ਕਈ ਸੁਰੱਖਿਆ ਚਾਦਰਾਂ ਚੋਰੀ ਹੋ ਚੁੱਕੀਆਂ ਹਨ ਜਾਂ ਟੁੱਟੀਆਂ ਹੋਈਆਂ ਹਨ, ਜਦਕਿ ਸਟਰੀਟ ਲਾਈਟਾਂ ਦੀ ਹਾਲਤ ਵੀ ਖ਼ਰਾਬ ਹੈ, ਉਥੇ ਲਗਾਤਾਰ ਚੋਰੀ ਦੀਆਂ ਘਟਨਾਵਾਂ ਵੀ ਵਾਪਰ ਰਹੀਆਂ ਹਨ, ਪਰ ਪ੍ਰਸ਼ਾਸਨ ਵਲੋਂ ਕੋਈ ਪ੍ਰਭਾਵਸ਼ਾਲੀ ਕਦਮ ਨਹੀਂ ਚੁੱਕਿਆ ਜਾ ਰਿਹਾ। ਇਲਾਕਾ ਨਿਵਾਸੀਆਂ ਨੇ ਮੰਗ ਕੀਤੀ ਹੈ ਕਿ ਪ੍ਰਭਾਵਿਤ ਖੇਤਰ ਦੀ ਤੁਰੰਤ ਘੇਰਾਬੰਦੀ ਕਰਕੇ ਸੜਕ ਦੀ ਮੁਰੰਮਤ ਕਰਵਾਈ ਜਾਵੇ ਤਾਂ ਜੋ ਕਿਸੇ ਵੱਡੇ ਹਾਦਸੇ ਤੋਂ ਬਚਿਆ ਜਾ ਸਕੇ।
