ਪਠਾਨਕੋਟ, 28 ਜੁਲਾਈ (ਸੁਮਿਤ)-ਪਠਾਨਕੋਟ ਜ਼ਿਲ੍ਹਾ ਤੈਰਾਕੀ ਸੰਘ (ਪੀ.ਡੀ.ਐਸ.ਏ.) ਦੇ ਤੈਰਾਕਾਂ ਨੇ ਸੰਗਰੂਰ ਵਿਚ ਆਯੋਜਿਤ 49ਵੀਂ ਜੂਨੀਅਰ ਅਤੇ 48ਵੀਂ ਸੀਨੀਅਰ ਪੰਜਾਬ ਰਾਜ ਤੈਰਾਕੀ ਚੈਂਪੀਅਨਸ਼ਿਪ ’ਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਜ਼ਿਲ੍ਹੇ ਦਾ ਨਾਮ ਰੌਸ਼ਨ ਕੀਤਾ। ਪਠਾਨਕੋਟ ਦੇ ਖਿਡਾਰੀਆਂ ਨੇ ਕੁੱਲ 26 ਤਮਗੇ ਜਿੱਤ ਕੇ ਵੱਡੀ ਉਪਲੱਬਧੀ ਹਾਸਲ ਕੀਤੀ, ਜਿਨ੍ਹਾਂ ’ਚ 9 ਸੋਨੇ, 10 ਚਾਂਦੀ ਤੇ 7 ਕਾਂਸੀ ਦੇ ਤਮਗੇ ਸ਼ਾਮਿਲ ਹਨ। ਮੁਕਾਬਲੇ ਦਾ ਸਭ ਤੋਂ ਵੱਡਾ ਆਕਰਸ਼ਣ ਕੈਟਾਗਰੀ-1ਏ ਬਾਲਿਕਾ ਵਰਗ ਦੀ ਚੈਂਪੀਅਨ ਟਰਾਫੀ ਰਹੀ, ਜਿਸ ‘ਤੇ ਪਠਾਨਕੋਟ ਦੀਆਂ ਧੀਆਂ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਕਬਜ਼ਾ ਜਮਾਇਆ ਤੇ ਪੂਰੇ ਜ਼ਿਲ੍ਹੇ ਦਾ ਮਾਣ ਵਧਾਇਆ। ਇਹ ਉਪਲੱਬਧੀ ਜ਼ਿਲ੍ਹਾ ਤੈਰਾਕੀ ਸੰਘ ਦੇ ਜਨਰਲ ਸਕੱਤਰ ਗੁਰਲਾਲ ਸਿੰਘ ਰਿਆੜ ਤੇ ਪ੍ਰਧਾਨ ਮਨਨ ਮਹਾਜਨ ਦੀ ਅਗਵਾਈ ਹੇਠ ਸਾਲਾਂ ਤੋਂ ਕੀਤੇ ਜਾ ਰਹੇ ਲਗਾਤਾਰ ਯਤਨਾਂ ਅਤੇ ਨੌਜਵਾਨ ਪ੍ਰਤਿਭਾਵਾਂ ਨੂੰ ਉਤਸ਼ਾਹਿਤ ਕਰਨ ਦੀ ਵਚਨਬੱਧਤਾ ਦਾ ਨਤੀਜਾ ਹੈ। ਇਸੇ ਕਰਕੇ ਅੱਜ ਪਠਾਨਕੋਟ ਪੰਜਾਬ ਦੀਆਂ ਅਗੇਤੀ ਤੈਰਾਕੀ ਇਕਾਈਆਂ ਵਿਚ ਆਪਣੀ ਵਿਲੱਖਣ ਪਛਾਣ ਬਣਾ ਚੁੱਕਾ ਹੈ। ਜੇਤੂ ਖਿਡਾਰੀਆਂ ਵਿਚ ਵਿਨਾਇਕਾ ਮਹਾਜਨ ਨੇ 3 ਸੋਨੇ, 2 ਚਾਂਦੀ ਅਤੇ 2 ਕਾਂਸੀ ਦੇ ਤਮਗੇ, ਸਿੱਧੀ ਜੋਸ਼ੀ ਨੇ 4 ਸੋਨੇ ਅਤੇ 1 ਚਾਂਦੀ ਦਾ ਤਮਗਾ, ਅਵਨੀ ਛਾਬੜਾ ਨੇ 2 ਸੋਨੇ ਤੇ 1 ਕਾਂਸੀ ਦਾ ਤਮਗਾ, ਧ੍ਰਿਤੀ ਮਹਾਜਨ ਨੇ 1 ਸੋਨੇ, 1 ਚਾਂਦੀ ਤੇ 1 ਕਾਂਸੀ ਦਾ ਤਮਗਾ, ਰਿੱਧੀ ਜੋਸ਼ੀ ਨੇ 2 ਚਾਂਦੀ ਅਤੇ 1 ਕਾਂਸੀ ਦਾ ਤਮਗਾ, ਰਸ਼ਮੀਨ ਕੌਰ ਨੇ 3 ਚਾਂਦੀ ਦੇ ਤਮਗੇ, ਰਿੱਧਿਮਾ ਸ਼ਰਮਾ ਨੇ 1 ਚਾਂਦੀ ਦਾ ਤਮਗਾ, ਅਵਿਨਾਸ਼ ਕੁਮਾਰ ਨੇ 2 ਚਾਂਦੀ ਅਤੇ 1 ਕਾਂਸੀ ਦਾ ਤਮਗਾ ਅਤੇ ਆਹਾਨਾ ਸ਼ਰਮਾ ਨੇ 1 ਕਾਂਸੀ ਦਾ ਤਮਗਾ ਜਿੱਤਿਆ। ਸੰਘ ਨੇ ਟੀਮ ਮੈਨੇਜਰ ਦੀਪਕ ਰਾਂਦੇਵ ਵਲੋਂ ਕੀਤੇ ਸ਼ਾਨਦਾਰ ਤਾਲਮੇਲ ਅਤੇ ਪੂਰੇ ਆਯੋਜਨ ਦੌਰਾਨ ਦਿੱਤੇ ਸਮਰਪਿਤ ਸਹਿਯੋਗ ਦੀ ਭਰਪੂਰ ਸ਼ਲਾਘਾ ਕੀਤੀ। ਇਸ ਦੇ ਨਾਲ ਹੀ ਅਮਨਦੀਪ ਕੌਰ ਦੇ ਅਥਾਹ ਸਮਰਪਣ ਅਤੇ ਹਰ ਸਾਲ ਉੱਤਮ ਤੈਰਾਕ ਤਿਆਰ ਕਰਨ ਵਿਚ ਉਨ੍ਹਾਂ ਦੇ ਮਹੱਤਵਪੂਰਨ ਯੋਗਦਾਨ ਦੀ ਵੀ ਵਿਸ਼ੇਸ਼ ਪ੍ਰਸ਼ੰਸਾ ਕੀਤੀ ਗਈ। ਪਠਾਨਕੋਟ ਜ਼ਿਲ੍ਹਾ ਤੈਰਾਕੀ ਸੰਘ ਨੇ ਪੰਜਾਬ ਸਵੀਮਿੰਗ ਐਸੋਸੀਏਸ਼ਨ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਬਲਰਾਜ ਸ਼ਰਮਾ ਤੇ ਜ਼ਿਲ੍ਹਾ ਤੈਰਾਕੀ ਸੰਘ, ਸੰਗਰੂਰ ਦਾ ਸ਼ਾਨਦਾਰ ਮਹਿਮਾਨਨਵਾਜ਼ੀ ਅਤੇ ਮੁਕਾਬਲੇ ਦੇ ਸਫਲ ਤੇ ਸੁਚਾਰੂ ਆਯੋਜਨ ਲਈ ਵਿਸ਼ੇਸ਼ ਧੰਨਵਾਦ ਪ੍ਰਗਟ ਕੀਤਾ।
