ਮਜਾਰੀ/ਸਾਹਿਬਾ, 4 ਅਪ੍ਰੈਲ (ਨਿਰਮਲਜੀਤ ਸਿੰਘ ਚਾਹਲ)-ਇੱਕ ਪਾਸੇ ਪੰਜਾਬ ਸਰਕਾਰ ਵੱਲੋਂ ਕਣਕ ਦੀ ਖ਼ਰੀਦ 1 ਅਪ੍ਰੈਲ ਤੋਂ ਸ਼ੁਰੂ ਕਰਨ ਦੇ ਪ੍ਰਬੰਧ ਮੁਕੰਮਲ ਕਰਨ ਦੇ ਦਾਅਵੇ ਕੀਤੇ ਜਾ ਰਹੇ ਹਨ | ਦੂਜੇ ਪਾਸੇ ਬਲਾਚੌਰ ਦੇ ਬਲਾਕ ਸੜੋਆ ਅਧੀਨ ਆਉਂਦੀਆਂ ਕਰਾਵਰ, ਸਾਹਿਬਾ, ਬਕਾਪੁਰ ਤੇ ਸੜੋਆ ਦਾਣਾ ਮੰਡੀਆਂ ਦੀ ਅਜੇ ਤੱਕ ਮਾਰਕੀਟ ਕਮੇਟੀ ਵੱਲੋਂ ਕੋਈ ਸਫ਼ਾਈ ਤੱਕ ਨਹੀਂ ਕਰਵਾਈ ਗਈ | ਇਹ ਸਾਰੀਆਂ ਮੰਡੀਆਂ ਦੀਆਂ ਫੜਾਂ ਘਾਹ-ਫੂਸ ਤੇ ਕਚਰੇ ਨਾਲ ਭਰੀਆਂ ਪਈਆਂ ਹਨ | ਕਿਸੇ ਵੀ ਮੰਡੀ ਵਿਚ ਅਜੇ ਤੱਕ ਕੋਈ ਵੀ ਲਾਈਟਾਂ ਤੇ ਪੀਣ ਵਾਲੇ ਪਾਣੀ ਦਾ ਪ੍ਰਬੰਧ ਨਹੀਂ ਕੀਤਾ ਗਿਆ | ਪਤਾ ਲੱਗਾ ਹੈ, ਇਨ੍ਹਾਂ ਮੰਡੀਆਂ ਦੀ ਸਫ਼ਾਈ ਦਾ ਕੰਮ ਕਿਸੇ ਠੇਕੇਦਾਰ ਨੂੰ ਅਲਾਟ ਕੀਤਾ ਹੋਇਆ ਹੈ | ਕਣਕ ਦੀ ਵਾਢੀ ਸ਼ੁਰੂ ਹੋਣ ਵਾਲੀ ਹੈ ਜੋ ਮੌਸਮ ਦੇ ਖ਼ਰਾਬ ਰਹਿਣ ਕਾਰਨ ਰੁਕੀ ਹੋਈ ਹੈ | ਇੱਕ ਪਾਸੇ ਮੰਡੀਆਂ ਦਾ ਸਫ਼ਾਈ ਪੱਖੋਂ ਬੁਰਾ ਹਾਲ ਹੈ ਤੇ ਦੂਜੇ ਪਾਸੇ ਆੜ੍ਹਤੀਆਂ ਦੀ ਹੜਤਾਲ ਕਾਰਨ ਕਿਸਾਨਾਂ ਨੂੰ ਕਣਕ ਦੀ ਖ਼ਰੀਦ ਨਾ ਹੋਣ ਦਾ ਫ਼ਿਕਰ ਸਤਾ ਰਿਹਾ ਹੈ | ਮੰਡੀਆਂ ਦੀਆਂ ਫੜਾਂ ਬਾਰੇ ਜਦੋਂ ਮਾਰਕੀਟ ਕਮੇਟੀ ਬਲਾਚੌਰ ਦੇ ਸਕੱਤਰ ਹਰਪ੍ਰੀਤ ਸਿੰਘ ਨਾਲ ਗੱਲਬਾਤ ਕੀਤੀ ਤਾਂ ਉਨ੍ਹਾਂ ਕਿਹਾ ਮੌਸਮ ਦੀ ਖ਼ਰਾਬੀ ਕਾਰਨ ਸਫ਼ਾਈ ਦੇ ਕੰਮ ਵਿਚ ਰੁਕਾਵਟ ਆਈ ਹੈ | ਜਲਦੀ ਹੀ ਫੜਾਂ ਦੀ ਸਫ਼ਾਈ ਕਰਨ, ਲਾਈਟਾਂ ਤੇ ਪੀਣ ਵਾਲੇ ਪਾਣੀ ਦਾ ਪ੍ਰਬੰਧ ਕਰ ਦਿੱਤਾ ਜਾਵੇਗਾ |
