ਜਗਰਾਉਂ, 6 ਜੁਲਾਈ (ਸ਼ਮਸ਼ੇਰ ਸਿੰਘ ਗਾਲਿਬ)-10 ਜੁਲਾਈ ਨੂੰ ਚੰਡੀਗੜ੍ਹ ਧਰਨੇ ’ਚ ਵਹੀਰਾਂ ਘੱਤ ਕੇ ਜਾਣ ਦੀ ਤਿਆਰੀ ਲਈ ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਉਗਰਾਹਾਂ ਬਲਾਕ ਸਿੱਧਵਾਂ ਦੇ ਪਿੰਡ ਸਵੱਦੀ ਖੁਰਦ, ਰਾਮਗੜ੍ਹ ਭੁੱਲਰ ,ਮਲਸੀਂਹਾ ਭਾਈਕੇ, ਰਸੂਲਪੁਰ ਤੇ ਬੁਜ਼ਰਗ ਵਿਖੇ ’ਚ ਬਲਾਕ ਆਗੂ ਰਾਮ ਸਰਨ ਸਿੰਘ, ਖ਼ਜਾਨਚੀ ਪਰਮਜੀਤ ਸਿੰਘ ਸਵੱਦੀ ਤੇ ਦਵਿੰਦਰ ਸਿੰਘ ਮਲਸੀਂਹਾ ਭਾਈਕੇ ਦੀ ਅਗਵਾਈ ਹੇਠ ਮੀਟਿੰਗਾਂ ਕੀਤੀਆਂ ਗਈਆਂ। ਇਸ ਮੌਕੇ ਜ਼ਿਲ੍ਹਾ ਮੀਤ ਪ੍ਰਧਾਨ ਮਨੋਹਰ ਸਿੰਘ ਕਲਾੜ ਤੇ ਯੁਵਰਾਜ ਸਿੰਘ ਘੁਡਾਣੀ ਨੇ ਮੀਟਿੰਗਾਂ ਨੂੰ ਸੰਬੋਧਨ ਕਰਦਿਆਂ 10 ਜੁਲਾਈ ਨੂੰ ਚੰਡੀਗੜ੍ਹ ਵਿਖੇ ਰੋਸ ਪ੍ਰਦਰਸ਼ਨ ਸਬੰਧੀ ਵਹੀਰਾਂ ਘੱਤ ਕੇ ਜਾਣ ਦਾ ਸੁਨੇਹਾ ਦਿੰਦੇ ਹੋਏ ਕਿਹਾ ਕਿ ਕੇਂਦਰ ਸਰਕਾਰ ਵੱਲੋਂ ਡੀਜ਼ਲ ,ਪੈਟਰੋਲ ਤੇ ਰਸੋਈ ਗੈਸ ਦੀਆਂ ਕੀਮਤਾਂ ਨੂੰ ਅਸਮਾਨੀ ਚਾੜਿਆ ਜਾ ਰਿਹਾ ਹੈ, ਭਾਰਤ ਅਮਰੀਕਾ ਮੁਕਤ ਵਪਾਰ ਸਮਝੌਤਾ ਨੂੰ ਲਾਗੂ ਕਰਨ ਲਈ ਅਤੇ ਅਮਰੀਕਾ ਦੇ ਦਬਾਅ ਸਦਕਾ ਉਨ੍ਹਾਂ ਦੀਆਂ ਸ਼ਰਤਾਂ ਨੂੰ ਮੰਨਿਆ ਜਾ ਰਿਹਾ ਹੈ ਜਿਸ ਨਾਲ ਭਾਰਤ ’ਚ ਅਮਰੀਕਾ ਤੋਂ ਆਉਣ ਵਾਲੀਆਂ ਵਸਤੂਆਂ ,ਫਸਲਾਂ ’ਤੇ ਕੋਈ ਟੈਕਸ ਨਹੀਂ ਲੱਗੇਗਾ ਉਧਰੋਂ ਮੱਕੀ, ਸੋਇਆਬੀਨ, ਦੁੱਧ, ਫ਼ਲ ਤੇ ਹੋਰ ਚੀਜ਼ਾਂ ਸਸਤੇ ਰੇਟ ’ਤੇ ਇਧਰ ਭੇਜੀਆਂ ਜਾਣਗੀਆਂ ,ਜਿਸ ਨਾਲ ਕਿਸਾਨੀ ਤੇ ਹੋਰ ਜਨਤਾ ਤਬਾਹ ਹੋਵੇਗੀ। ਆਗੂਆਂ ਨੇ ਹੋਰ ਕਿਹਾ ਕਿ ਪੰਜਾਬ ਸਰਕਾਰ ਵੱਲੋਂ ਜ਼ਮੀਨਾਂ ਹੜੱਪਣ ਲਈ ਫਿਰ ਨਵ ਸੋਧਿਆ ਲੈਂਡ ਪੂਲਿੰਗ ਲਿਆ ਕੇ ਕਿਸਾਨਾਂ ਨੂੰ ਖੇਤੀ ’ਚੋਂ ਬਾਹਰ ਕੱਢਣ ਦੀਆਂ ਕੋਸ਼ਿਸ਼ਾਂ ਕੀਤੀਆਂ ਜਾ ਰਹੀਆਂ ਹਨ, ਇੰਨ੍ਹਾਂ ਨੀਤੀਆਂ ਦੇ ਖ਼ਿਲਾਫ 10 ਜੁਲਾਈ ਨੂੰ ਧਰਨੇ ਮੁਜ਼ਾਹਰੇ ਵਿੱਚ ਵੱਡੀ ਗਿਣਤੀ ਵਿੱਚ ਕਿਸਾਨਾਂ ਮਜ਼ਦੂਰਾਂ ਨੂੰ ਸ਼ਾਮਿਲ ਹੋਣ ਲਈ ਅਪੀਲ ਕੀਤੀ। ਇਸ ਮੌਕੇ ਪ੍ਰੇਮ ਸਿੰਘ ਬੁਜ਼ਰਗ, ਜਗਦੇਵ ਸਿੰਘ ਰਾਮਗੜ੍ ਭੁੱਲਰ ਪਿੰਡ ਦੇ ਆਗੂ ਤੇ ਕਿਸਾਨ ਸ਼ਾਮਿਲ ਹੋਏ ਸਨ।
